ГРАНТ ЛОЙИҲАСИ ДОИРАСИДА ТАДБИР ЎТКАЗИЛДИ
Юртимизда ўсиб келаётган ёш авлодни маънавий-ахлоқий, жисмоний соғлом қилиб тарбиялаш, уларни барча соҳаларда изчиллик билан татбиқ этилаётган ислоҳотларнинг фаол иштирокчисига айлантиришга қаратилган чора-тадбирлар амалга оширилмоқда. Улар онгига Ватанга содиқлик ва келажаги учун дахлдорлик ҳиссини сингдириш, қалбида ёт ғоя ва қарашларнинг салбий таъсирига нисбатан мафкуравий иммунитетни шакллантиришга ҳисса қўшиш, экстремизм ва терроризмнинг бузғунчи ғояларига нисбатан муросасизликни шакллантириш жуда муҳим.
Ёш авлод таълим-тарбияси мактабгача ва умумий ўрта таълим муассасаларининггина эмас, кенг жамоатчилик, давлат ва нодавлат ташкилотларининг ҳам вазифасидир.
Амударё телевидениеси бунингдек улуғвор мақсад ижросига ҳисса қўшиш мақсадида Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат Фонди таъсис этган “Ёшларнинг маънавий-руҳий ва интеллектуал салоҳиятини ошириш” йўналишидаги давлат гранти танловида “Юксак маънавиятли ва ахлоқли ёшлар – келажак пойдевори” номли лойиҳаси билан қатнашиб, ғолиб бўлган эди ва лойиҳани муваффақиятли амалга ошириб келмоқда.
Шу йилнинг 23 ноябрида вояга етмаганлар ўртасида назоратсизлик ва ҳуқуқбузарликларнинг олдини олиш, ёшларнинг тунги вақтларда кўнгилочар масканларда ота-оналари ёки уларнинг ўрнини босувчи шахсларсиз юришларига, ўқувчиларнинг узрли сабабларсиз дарс қолдиришларига йўл қўймаслик борасида яхши натижаларга эришаётган тумандаги овул – маҳалла фуқаролар йиғинлари тажрибасини оммалаштириш мақсадида мазкур грант лойиҳаси доирасида Амударё телеканали ижодий жамоаси Тўлқин овулида бўлди.
Мазкур овулда учта умумий ўрта таълим мактаблари, 3та мактабгача таълим ташкилотларида вояга етмаганларга таълим-тарбия берилмоқда. Уларнинг бўш вақтларини мазмунли ташкил этиш, интеллектуал қобилиятларини ривожлантириш ва давримизга муносиб бўлиб вояга етишлари йўлида таълим-тарбия муассасалари фуқаролар йиғини, профилактика инспектори ва Ички ишлар бўлимидаги жамоат хавфсизлиги хизмати ҳуқуқбузарликлар профилактикаси бўлинмасининг вояга етмаганлар масалалари билан шуғулланувчи ҳудудий инспектор-психологи билан ҳамкорликда тизимли саъй-ҳаракатлар олиб боришаяпти. Натижада ҳудудда вояга етмаганлар орасида ҳуқуқбузарлик, назоратсиз бемаҳал кўнгилочар жойларда юриш ҳолатларига йўл қўйилмади.
Ўқувчиларнинг турли ижодий танловларда, билимлар ва спорт беллашувларида юқори натижаларни қайд этаётгани барчани қувонтиради. Мактаблар ўқувчилари орасида “Беш ташаббус олимпиадаси”нинг республика босқичи ғолиблари ҳам бор. Битирувчиларнинг олий таълим муассасаларига ўқишга кириш кўрсаткичлари йилдан йилга ошмоқда. Эришилаётган натижаларга қарамасдан вояга етмаганлар хулқ-атворини етарли назорат қилиб, уларни қунт билан ўқиб-ўрганишга ва салоҳиятини ривожлантиришга рағбатлантириш жуда муҳим.
Бу ҳақда овул фуқаролар йиғини фаоллар залида бўлиб ўтган йиғилишда ҳам батафсил сўз юритилди. Унда Амударё телеканали ижодий ходимлари, фуқаролар йиғини масъуллари, профилактика инспектори, ҳудуд инспектор-психологи, овул фаоллари, ота-оналар, ёшлар иштирок этдилар.
Тадбирни овул хотин-қизлар фаоли Гавҳар Боботоева очди ва олиб борди.
Кун тартибидаги мавзу юзасидан ҳудуд инспектор психологи Ҳусниддин Сафарбоев, 32-сонли мактаб директорининг маънавий-маърифий ишлар бўйича ўринбосари Худоёр Хўжамуродов, овул фаолларидан Гулчеҳра Тиллаева, Дилбар Матёқубова, Набижон Юсуповлар сўзга чиқдилар. Улар ёш авлод камоли йўлидаги овулда олиб борилаётган ишларга кенг тўхталдилар. Шунингдек, болаларни назоратсиз қолдирмаслик, уларнинг қизиқишларига эътибор бериб, қўшимча ўқишлари учун китоблар билан таъминлаш зарурлигини таъкидладилар.
Тадбирда бу борадаги ишларни яна ҳам жонлантириш бўйича таклифлар билдирилди.
Ойгул РАЖАБОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
