Қорақалпоқ тили – қорақалпоқ халқининг миллий ғурури

Тил – ҳар бир миллатнинг улкан бойлиги, беназир қадрияти ва бебаҳо мулки ҳисобланади. Ҳар бир халқ, ҳар бир элат, ўзи ҳурмат ва эҳтиром қиладиган тилга эга. Тилда ана шу тилнинг ижодкори бўлган халқ, элатнинг тарихи ва маданияти акс этади. Айни замонда, тил ижтимоий тараққиётда улуғвор аҳамият касб этади. Тил – ҳар бир миллат ўзлигининг ажралмас белгисидир.

1989 йил 1 декабрь — Қорақалпоғистон тарихидаги муҳим саналардан биридир. Шу куни қорақалпоқ тилига давлат тили мақоми берилган. Ҳар йили бу сана кенг нишонланиб келинади.

Ушбу сана муносабати билан 23 ноябрь куни Амударё туманидаги 76-сонли мактаб фаоллар залида “Ана тилим – миллий мақтанышым» деб номланган тадбир бўлиб ўтди. Унда мактабнинг устоз-мураббийлари ҳамда ўқувчилари, ота-оналар иштирок этдилар.

Тадбирни мактаб директорининг маънавий-маърифий ишлари бўйича ўринбосари Дилфуза Якубова очиб берди ҳамда ўқувчиларни ушбу муҳим сана билан табриклади.

Таъкидланганидек, тил – бу халқнинг тарихини, маданий меросини, турмуш тарзини, урф-одат ва анъаналарини ўзида мужассам этган бебаҳо хазинадир. Шу боис ҳам сўнгги йилларда юртимизда қорақалпоқ тилини асраб-авайлашга, уни янада бойитишга давлат сиёсати даражасида эътибор қаратилмоқда.

Бунинг мисоли тариқасида қорақалпоқ тилидаги янги дарсликлар ва қўлланмаларнинг, бадиий китобларнинг, монографияларнинг нашрдан чиқарилаётгани, мазкур тилни ривожлантиришга бағишланган илмий анжуманлар ва бошқа тадбирларнинг ташкил этилаётгани, Ибройим Юсупов номидаги қорақалпоқ тили ва адабиёти фанини чуқур ўргатишга ихтисослашган ижод мактабининг фаолияти йўлга қўйилганганини алоҳида қайд этиш зарур.

Шунингдек, лотин алифбосидаги «Қорақалпоқ тилининг орфографик луғати» чоп этилгани қорақалпоқ тилини ривожлантиришга бўлган юксак эътибор ва ғамхўрлик ифодасидир.

Мазкур тадбирда мактабнинг 5-, 6-, 7-синфлар ўқувчилари фаол қатнашдилар. Ўқувчилар томонидан қорақалпоқ тилида шеърлар ижро этилди, уни асраб-авайлаш билан боғлиқ мулоҳазалар билдирилди.

Тадбир давомида сўзга чиққан ўқитувчилар қорақалпоқ тили неча асрлардан буён аждодларимиздан бизга безавол ўтиб келаётгани, халқимизнинг ўзлигини намоён қилишида, Қорақалпоғистоннинг ижтимоий-сиёсий, маънавий-маърифий тараққиётида, жамиятнинг ривожланишида муҳим ўрин эгаллаб келаётгани, унинг бебаҳо мерос, юртимиз тарихини, миллий қадриятларимиз, урф-одат ва дастурларимизни ўзида мужассам этган бебаҳо хазина эканлигини таъкидлаб ўтдилар.

Тадбирда юртимизда қорақалпоқ тили ва адабиётини янада ривожлантиришга қаратилган эътибор тобора кучайиб бораётгани, қорақалпоқ адабиёти вакилларининг ижод мактаблари ташкил этилиши қорақалпоқ тили ва адабиётининг бой хазинаси, нафосатини ёш авлод қалбига сингдиришда муҳим аҳамият касб этаётгани хусусида сўз юритилди.

«Ана тилим – миллий мақтанышым» деб номланган тадбир барча ўқувчиларда катта таассуротлар қолдирди. 5-, 8-синфлар ўқувчилари қорақалоқ адабиёти намуналаридан ажойиб шеърлар ҳамда куй-қўшиқлар ижро қилдилар. Тадбир кўтаринки руҳда ҳамда байрамона тарзда ўтди.

Севара Исмоилова