ЧЕТ ТИЛЛАРНИ ЎРГАНИШДА ЯНА БИР ҚАДАМ
Бугунги кунда Республикамизда чет тилларини ўрганишга қаратилган эътибор тобора ошиб бормоқда. Жорий йилнинг январь ойида Тошкент шаҳридаги А.Авлоний номидаги ХТХҚТМОМИ да ташкил этилган инглиз тили тренер-ўқитувчиларини ўқитиш курсларида махсус ўқув-режа дастурига мувофиқ "Чет тили ўқитувчиларининг касбий маҳоратини ошириш бўйича ҳар ҳафталик курсларни ўтказиш тартиби тўғрисида низом” талаблари асосида ўқув-семинари ўтказилди. Ушбу семинарнинг ўқув режа-дастури Ўзбекистон Республикаси Президентининг 2012 йил 10 декабрдаги "Чет тилларни ўрганиш тизимини янада такомиллаштириш чора-тадбирлари тўғрисида”ги қарорига асосан ишлаб чиқилди. Ушбу дастур хорижий тил тренер-ўқитувчиларининг касбий салоҳияти ва педагогик маҳоратини ривожлантириш, илғор хорижий тажрибаларни ўрганиш ҳамда умумтаълим мактабларида чет тилларини ўқитишда замонавий таълим технологияларидан фойдаланиш бўйича билим, кўникма ва малакаларини такомиллаштиришни мақсад қилган.
Маълумки, Президентимизнинг юқоридаги қарори ижросини таъминлаш жараёнида инглиз тилини билиш даражаларини аниқлашда Европа стандартлари даражалари (СЕFR) бош кўрсаткич қилиб олинган эди. Унга кўра Ўзбекистон Республикаси Халқ таълими Вазирлиги томонидан Ўзбекистон таълим стандартларига мос келувчи инглиз тилини билиш даражалари ишлаб чиқилди.
Эндиликда айнан инглиз тили ўқитувчиларидан кутилаётган натижа эса мана шу билиш даражаларининг муносибини эгаллашгина бўлиб қолмоқда.
Мана шу талабдан келиб чиқиб, А.Авлоний номидаги ХТХҚТМОМИ да ташкил этилган 5 кунлик малака ошириш семинари ўзининг биринчи босқичида бир қанча вилоятларга мезбонлик қилди. Жумладан, 26-30 январь кунлари ташкил этилган дарсларда Самарқанд, Бухоро, Тошкент вилояти ҳамда Қорақалпоғистон Республикасидан танланган тренер-ўқитувчилари иштирок этишди.
Улар орасида нафақат маълум йиллик таълим маҳоратига эга бўлган ўқитувчилар, балки эндигина ўқитувчилик фаолиятини бошлаган ёш мутахассислар ҳам бор эди. Ёш кадрлар орасида ўзимнинг ҳам иштирок қилишим менда чексиз мамнуният, шу билан биргаликда улкан масъулият ҳиссини уйғотди.
Дарслар давомида маҳоратли тренерлар томонидан семинардан кўзланган мақсад бўйича тайёрланган маърузалар ташкил қилинди. Бу биз учун жуда катта имконият бўлди. Бу имконият елкамизга бир қадар масъулият ҳам юклайди. Шу билан бирга улуғ, келажаги буюк ишларга ундайди. Тил ўргатишдек масъулиятли касбни ўзларига шараф деб билган устозларимизга улкан зафарлар ҳамда мустаҳкам кучғайрат, чет тилларни чин дилдан ўрганишга бел боғлаган ўқувчиларимизга эса сўнмас ихлос тилайман.
Дилноза ҚУРБОНОВА,
16-сонли
ихтисослаштирилган мактабнинг инглиз тили фани ўқитувчиси.
(Фото - http://www.turkistonpress.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
