Оқ олтин овулида биогумус тайёрлаш бўйича семинар ўтказилди

2023 йил 3 декабрь куни Амударё туманининг Оқ олтин овулида биогумус тайёрлаш бўйича амалга ошириладиган ишларнинг бориши масаласида семинар бўлиб ўтди.

Семинарда Қорақалпоғистон Республикаси Жўқорғи Кенгеси Раиси ўринбосари Рустам Сапарбоев, туман ҳокими Собир Хўжаметов, туман ҳокимининг қишлоқ ва сув хўжалиги масалалари бўйича ўринбосари Анвар Йўлдошев, туман Ободонлаштириш, Ветеринария ва чорвачилик бўлимлари, Қипчоқ давлат Ўрмон хўжалиги раҳбарлари, қишлоқ хўжалиги корхоналари масъуллари ҳамда фермер хўжаликлари раислари, тегишли соҳа вакиллари иштирок этдилар.

Биогумус – табиий тупроққа яқин бўлган ўғит тури бўлиб, чиришга мойил чиқиндилар – гўнг, хазонрезги, сомон, ўсимлик уюмларини Калифорния қизил чувалчанги организмидан ўтказиш орқали олинади.

У қорамтир рангда, қуруқ ва суюқ ҳолатда бўлади. Унинг таркибидаги микроорганизмлар тупроқнинг аэробик, анаэробик микроэлементлар билан бойитилишига шароит яратиб беради. Шунингдек, тупроқнинг механик зичлигини ҳам меъёрига келтиради.

Биогумус – уруғларнинг униб чиқишини сезиларли даражада тезлаштиради, кўчат ўсиши ва илдиз шаклланишини фаол равишда рағбатлантиради, тупроқни бойитади ва озуқа моддаларининг сўрилишини яхшилайди, кислоталиликни пасайтиради ва тупроқнинг тузилишини яхшилайди. У ўсимликларнинг турли касалликларга қарши иммунитетини оширади ва улардан кейин тикланишига ёрдам беради. Биогумус ўсимликнинг ноқулай экологик шароитларга қарши чидамлигини ошириб, гуллашини рағбатлантиради, меваларнинг пишишини тезлаштиради, уларнинг ҳосилдорлиги ва сифатини оширади.

Семинарда туман ҳокими Собир Хўжаметов сўзга чиқиб, биогумус тупроқни мукаммал даражада соғломлаштиришини, бошқа ҳар қандай органик моддалар билан яхши бирлашишини ва ҳосилнинг сифатини яхшилашга хизмат қилишини айтиб ўтди.

Жорий йилда туман бўйича жами 1 минг 110 тонна биогумус тайёрлаш режалаштирилган. Шундан, туман ҳокимлиги 200 тонна, Қипчоқ давлат Ўрмон хўжалиги 200 тонна, Ободонлаштириш бошқармаси 200 тонна ҳамда фермер хўжаликлари 510 тонна биогумус тайёрлаши режа қилинган.

Семинарда сўзга чиққан масъуллар охирги йилларда бу органик чиқинди қишлоқ хўжалиги соҳасида ва озиқ-овқат саноатида кенг кўламда қўлланилаётгани, унинг таркибидаги микроорганизмлар тупроқнинг аэробик, анаэробик, микроэлементлар билан бойитилишига шароит яратиб беришини ҳамда тупроқнинг механик зичлигини ҳам меъёрига келтиришини таъкидлаб ўтдилар.

Мутахассислар тупроққа биогумус солишнинг ҳам меъёрларига эътибор қаратиш лозимлигини алоҳида таъкидлаб ўтдилар. Унумдорлиги паст бўлган тупроқни лаборатория таҳлилларидан ўтказиб, мутахассисларнинг тавсияси асосида белгиланган миқдорда биогумус солинади. Биогумус солинган тупроқда етиштирилаётган экин касалликларга чидамли бўлиши ва эрта пишиб етилиши билан ҳам аҳамиятлидир.

Бунинг бир неча усуллари мавжуд. Ерга уруғ қадаётганда у билан бирга биогумус солиш ҳам яхши самара беради. Тупроққа қайси пайтда, қанча миқдорда биогумус солиш эса агротехнолог мутахассисларнинг тавсияси асосида амалга оширилиши ҳақида семинар иштирокчиларига соҳа мутахассислари томонидан батафсил маълумотлар берилди.

Туман ҳокимлиги Ахборот хизмати