ҚОРАҚАЛПОҚ ТИЛИГА ДАВЛАТ ТИЛИ МАҚОМИ БЕРИЛГАНИНИНГ 34 ЙИЛЛИГИ КЕНГ НИШОНЛАНДИ
Тил – миллат кўзгуси, миллий-маънавий ифтихори. Ҳар қандай халқнинг жаҳон ҳамжиҳамиятидаги ўрни ва нуфузи унинг тили, тил орқали миллий-маънавий қадриятлари нечоғлик қадр топгани билан белгиланади. Шу боис, ҳар бир халқ ўз тилининг умри боқийлиги, замонлар силсиласидан соф ва ўзига хос жаранги билан авлоддан-авлодга ўтиб, буюк маънавий мерос, ифтихор тимсоли сифатида ўтиб, қадр топиши учун интилади ва давлат рамзлари қаторида ҳамиша юксак мақомда бўлиши учун интилади.
Шу нуқтаи назардан олиб қарайдиган бўлсак, қоралпоқ тили ҳам ўзининг лексик бойлиги, гўзал жаранги билан кўплаб ёндош ва қардош халқларни ўзига мафтун этиб келади. Хусусан, қорақалпоқ тили афоризмларга бойлиги, синонимик қаторларининг хилма-хиллиги, антоним, пароним, омоним сўзларнинг ўзига хос жозибаси билан ажралиб туради ва ана шу ўзига хослик туфайли қорақалпоқ шоир ва ёзувчилари яратган бадиий асарлар намуналари халқ орасида жуда тез оммалашиб кетади.
Амударё туманидаги 30-сонли умумтаълим мактабида қорақалпоқ тилига давлат тили мақоми берилганининг 34 йиллиги муносабати билан бўлиб ўтган “Тил – миллат ойнаси” мавзусидаги адабий-мусиқий ва маънавий-маърифий тадбирда қорақалпоқ тилининг нуфузи, қадр-қиммати хусусида муфассал сўз юритилди.
Аввало тадбир ўтказиладиган мактаб саҳнаси қорақалпоқ шоир ва ёзувчиларининг етук асарлари, қорақалпоқ тилининг тараққиёт босқичлари ҳақидаги қорақалпоқ олимларининг илмий мақолалари, шунингдек, қорақалпоқ халқининг ўзига хос, бетакрор урф-одат ва анъаналарини акс эттирувчи кўргазмали воситалар, ўқувчилар томонидан тайёрланган суратлар, альбомлар ва гуллар билан безатилди.
Тадбирда ўқувчи-ёшлар қорақалпоқ халқининг урф-одат ва анъаналари халқидаги саҳна кўринишларини намойиш этиб, тўй-маросимлар ва байрамларда йигит ва қизларнинг топқирлиги, эпчиллиги ва ҳозиржавобликларини ўзида мужассам этган айтишувларини ниҳоятда жозибадорлик билан ижро қилиб бердилар.
Шундан сўнг, ҳар бир синф ўқувчилари томонидан тайёрланган қорақалпоқ халқ рақслари, миллий ўйинлар, шеърий баҳслар маромига етказиб ижро этилди. Айниқса, халқона, бахшиёна тарздаги шеърий баҳслар, қорақалпоқча куй-қўшиқлар, фақат қорақалпоқларгагина хос бўлган айтишувлар тадбир иштирокчиларига кўтаринки кайфият бағишлаб, ҳар бир қалбда қорақалпоқ тилининг ўзига хос товланишларига, сержаранг оҳангига чексиз меҳр-муҳаббат уйғотди.
Бўлиб ўтган мазкур тадбир ўқувчи-ёшлар қалбида қорақалпоқ тилига нисбатан меҳр-муҳаббат, бағрикенглик, миллатлараро тотувлик ва ушбу тилда сўзлашишдан фахрланиш туйғуларини янада мустаҳкамлади.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
