ЭКОЛОГИК ҲОЛАТНИ ЯХШИЛАШ – ДОЛЗАРБ МАСАЛА
Давлат барқарор ривожланиш принципига мувофиқ, атроф-муҳитни яхшилаш, тиклаш ва муҳофаза қилиш, экологик мувозанатни сақлаш бўйича чора-тадбирларни амалга оширади.
Конституциянинг 49-моддасидан.
Ҳозирги даврда жаҳон ҳамжамиятини ташвишга солаётган глобал муаммолардан бири – экология муаммосидир. Статистик маълумотларга кўра, ҳар йили дунёда 7 млн. киши ҳаво ифлослиги таъсиридан вафот этмоқда, унумдор ерлар чўлларга айланмоқда.
Экология муаммоси бутун дунё мамлакатлари аҳолисини ташвишга солаётган бир даврда бизнинг юртимиз ҳам бундан мустасно эмас. Бироқ давлатимизнинг фуқаролар фаровон ва юқори қадр-қимматга эга ҳаётий муҳитда яшашига эришиш борасида изчил чора-тадбирлар олиб бораётганлиги қувонарли ҳолдир. Бу Асосий Қонунимиз – Конституциямизнинг 49-моддасида ҳам ўз ифодасини топган. Ушбу моддада “Ҳар ким қулай атроф-муҳитга, унинг ҳолати тўғрисидаги ишончли ахборотга эга бўлиш ҳуқуқига эга” деб белгиланган. Шунингдек, давлат барқарор ривожланиш принципига мувофиқ атроф-муҳитни яхшилаш, тиклаш ва муҳофаза қилиш, экологик мувозанатни сақлаш бўйича чора-тадбирларни амалга ошириши белгиланган.
Бу борада туманимизда ҳам тизимли ишлар амалга оширилаяпти.
Қорақалпоғистон Республикаси Экология, атроф-муҳитни муҳофаза қилиш ва иқлим ўзгариши вазирлигининг Амударё тумани бўлими томонидан 2023 йилнинг 11 ойи давомида туманимиз ҳудудида табиатга зарар етказилишининг олдини олиш мақсадида ноқонуний чиқинди ташлаб, атроф-муҳитни ифлослантираётган, ҳайвонот ва ўсимлик дунёсини, сув ва сувдан фойдаланиш тўғрисидаги қонун-қоидалар талабларига риоя қилмасдан ичимлик ва оқава сувларнинг ифлосланишига йўл қўйиш ҳолатлари назоратга олиниб, ушбу ҳуқуқбузарликларни содир этган шахсларга чоралар кўрилди. Шунингдек, йиғилиб қолган чиқиндилар, ўсимлик қолдиқлари ва хазонларни ёқиб юбориб, атмосфера ҳавосининг ифлосланишига йўл қўяётган фуқароларга тушунтириш ишлари олиб борилиб, огоҳлантиришлар берилди, экологик назорат тадбирлари давомида ЎЗР МЖтКнинг белгиланган моддаларига асосан атроф-муҳит ифлосланишига йўл қўйиш бўйича жами 125та ҳуқуқбузарликлар аниқланиб, маъмурий баённомалар расмийлаштирилди ва 335 319 000 сўм миқдорида жарималар ундирилди. Вазирлар Маҳкамасининг тегишли Қарорларига асосан атроф-муҳитни ифлослантирганлиги ва чиқиндилар ташлагани учун 157та корхона ва ташкилотларга жами 211 359 174 сўм компенсация тўлами ҳисобланиб, давлат ҳисобига ундирилди.
Ўзбекистон Республикаси Президенти Ш.М.Мирзиёев ташаббуси билан амалга оширилаётган “Яшил макон” умуммиллий лойиҳаси доирасида дарахт экиш бўйича эълон қилинган “Долзарб 40 кунлик”да кўчат экишни самарали ташкил этиш юзасидан туманимизда ҳам чора-тадбирлар белгиланиб, 2023 йил куз мавсумида 489500 дона манзарали ва мевали дарахт кўчатлари ва қаламчаларини экиш режалаштирилган эди. Ушбу дарахт кўчатлари ва қаламчалар туманимиздаги барча корхона ва ташкилотлар, овул, маҳалла фуқаролар йиғинлари маъмурий бинолари атрофларига, автомобиль йўллари бўйларига экилди.
Она табиатимизни асраш, унинг мусаффолигини сақлаш борасида амалга оширилаётган бу каби саъй-ҳаракатлар келгусида ўзининг ижобий самараларини беради, албатта.
Нурбек УЗОҚБОЕВ,
Қорақалпоғистон Республикаси Экология, атроф-муҳитни муҳофаза қилиш
ва иқлим ўзгариши вазирлигининг Амударё туман бўлими бошлиғи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
