“Долзарб 40 кунлик” доирасида махсус профилактик тадбирлар ўтказилмоқда

Мамлакатимиз бўйлаб жиноятчилик ва ҳуқуқбузарликларнинг олдини олиш мақсадида “Долзарб 40 кунлик” махсус профилактик тадбирлари ўтказилмоқда. Тадбирлар доирасида ҳудудларда криминоген вазият барқарорлигини таъминлаш, ҳуқуқбузарлик ва жиноятларнинг олдини олиш чоралари кўрилмоқда.

Амударё туманида ҳам “Долзарб 40 кунлик” доирасида жиноятчилик ва ҳуқуқбузарликларнинг олдини олиш, жамоат тартибини сақлаш, ҳуқуқбузарликлар, айниқса, тунги вақтда содир этилиши мумкин бўлган жиноятларнинг олдини олиш мақсадида тунги профилактик тадбири ўтказилди.

Навбатдаги шундай тадбирда туман ҳокими Собир Хўжаметов, туман прокурори Азиз Рўзметов, Ички ишлар бўлими бошлиғи Жамоладдин Юсупов, солиқ инспекцияси бошлиғи Жаҳонгир Раҳимов ҳамда мутасадди ташкилотлар вакиллари, ёшлар етакчилари иштирок этдилар.

Тадбир аввалида Ички ишлар бўлими масъуллари томонидан тунги хизматга жалб этилган ходимлар билан хизмат олди йўриқномаси ўтказилиб, ҳудудларда тунги хизматга жалб этилган ходимларга ҳуқуқбузарликларни олдини олиш ҳамда жиноятчиликка қарши курашиш, фуқаролар осойишталигини таъминлаш, йўл-транспорт ҳодисаларининг барвақт олдини олишда амалга оширилиши лозим бўлган аниқ вазифалар юклатилди.

 “Долзарб – 40 кунлик” доирасидаги тадбирлар давомида туман ҳудудида барча йўналишларда профилактик тадбирлар амалга оширилиб, тунги вақтда мақсадсиз ва назоратсиз юрган вояга етмаган фуқаролар, хотин-қизлар ҳамда шубҳали шахслар, шунингдек қўпол турдаги қоидабузарлик содир этган ҳаракат иштирокчилари билан тушунтириш ишлари олиб борилмоқда. Айниқса, "қизил" тоифага кирувчи маҳаллаларда назорат кучайтирилиб, ҳайдовчиларнинг ҳужжатлари билан бир қаторда транспорт воситалари ҳам кўздан кечилмоқда.

Шу пайтгача “Долзарб -40 кунлик” тадбирлари доирасида олиб борилаётган тезкор қидирувлар давомида 2 нафар қидирувдаги шахслар ушланди, 2та очилмай қолган жиноят фош этилди.

Жамоат тартибини сақлаш, ҳуқуқбузарликларнинг олдини олиш йўналишида ҳуқуқбузарлик содир этган 54 нафар шахсга нисбатан маъмурий баённомалар расмийлаштирилди.

Бугунги кунгача ўтказилган тунги рейд тадбирлари давомида маъмурий қамоққа олиш билан боғлиқ ҳолатлар 19тани ташкил қилади. Тадбир бошидан буён жами 51 нафар шахслар содир қилган ҳуқуқбузарликлари учун профилактик ҳисобга олинган. Маҳаллаларда жиноятчилик ва ҳуқуқбузарликларнинг олдини олиш мақсадида спиртли ичимликка ружу қўйган 7 нафар шахслар мажбурий даволаниш муассасаларига ётқизилган. Шунингдек, маъмурий назоратда турган ҳамда илгари судланган 53 нафар шахслар билан профилактик суҳбатлар ўтказилган.

Шунингдек, йўл ҳаракати қоидаларини бузиш билан боғлиқ 15та ҳуқуқбузарликлар аниқланиб, тегишли тартибда маъмурий баённомалар расмийлаштирилган. Шунингдек, йўл ҳаракати қоидаларини қўпол равишда бузган 78 нафар ҳайдовчининг транспорт воситалари жарима майдонларига олиб кирилган.

Содир этилган жиноятлар юзасидан маҳалла ва овул фуқаролар йиғинларида жамоатчилик вакиллари иштирокида тарғибот-ташвиқот ишлари олиб борилмоқда.

Туман ҳудудида ҳуқуқбузарлик ва жиноятлар, транспорт йўлларида турли хавфли ҳодисалар содир этилишининг олдини олиш, аҳолининг тинчлик-осойишталигини сақлашда бу каби тадбирлар муҳим аҳамият касб этади.

Туман ҳокимлиги Ахборот хизмати