ПИРОТЕХНИКА ВОСИТАЛАРИНИНГ ЗАРАРИ ХУСУСИДА ПРОФИЛАКТИК СУҲБАТ ЎТКАЗИЛДИ

Юртимизда янги йил байрами яқинлашгани сари айрим тадбиркорлар томонидан божхона назорат-ўтказиш пунктларини четлаб ўтган ҳолда ноқонуний равишда пиротехника воситаларини олиб кириш ва ушбу воситаларнинг олди-сотдиси билан шуғулланиш ҳолатлари билан боғлиқ ҳуқуқбузарликлар содир этилаётгани боис, жойларда айнан шундай вазиятларга йўл қўймаслик ва бахтсиз ҳодисаларнинг олдини олишга қаратилган чора-тадбирлар амалга оширилмоқда. Бу борада ИИБнинг жамоат хавфсизлиги бўлинмаси ҳуқуқбузарликлар профилактикаси инспекторлари томонидан таълим-тарбия муассасаларида, овул ва маҳаллаларда вояга етмаган ўсмир ёшлар иштирокида ўтказилаётган профилактик тадбирлар, “Осойишталик сабоқлари” мавзусидаги давра суҳбатлари, “Давомат”, “Хавфсиз тун”, “Тиғ” каби назорат тадбирлари муҳим аҳамият касб этмоқда.

Ана шундай маънавий-маърифий профилактик тадбирлардан бири жорий йилнинг 13 декабрь санасида Амударё туман Мактабгача ва мактаб таълими бўлими тасарруфидаги 38-сонли умумтаълим мактабида ҳам ўтказилди. Унда Амударё тумани Фавқулодда вазиятлар бўлими катта инспектори Беҳзод Аллаберганов, Амударё тумани Ички ишлар бўлими жамоат хавфсизлиги хизмати ҳуқуқбузарликлар профилактикаси инспектор-психологи, лейтенант Х.Сафарбоев, Ички ишлар бўлими жамоат хавфсизлиги бўлими ҳуқуқбузарликлар профилактикаси вояга етмаганлар масалалари бўйича инспектор-психологи, капитан Д.Аминов, 38-сонли умумтаълим мактаби ўқитувчилари ва мактабнинг 5-, 6-синфлар ўқувчилари иштирок этишди.

“Осойишталик сабоқлари” мавзусидаги мазкур тадбирни мактаб директорининг маънавий-маърифий ишлар бўйича ўринбосари Н.Юсупова очди ва Янги йил байрами арафасида вояга етмаган ўсмир-ёшлар орасида пиротехника воситаларидан ўйин сифатида фойдаланиш ҳолатлари учраб туриши, бунинг натижасида кўплаб бахтсиз ҳодисалар юз бериши ҳақида тўхталиб, бундай ҳолатларнинг олдини олиш ҳар бир ота-онанинг, ўқитувчи ва ўқувчи-ёшларнинг зиммасидаги масъулиятли вазифа эканлигини таъкидлади.

Шундан сўнг, мактаб инспектор-психологи, капитан Д.Аминов “Мактабда ва мактабдан ташқарида вояга етмаганларнинг хавфсизлигини таъминлаш, уларнинг пиротехника воситалари билан ўйнашларига йўл қўймаслик” мавзусида профилактик суҳбат ўтказди. Суҳбат жараёнида Д.Аминов вояга етмаганлар ва ўсмир-ёшлар ўртасида Янги йил байрами арафасида ва байрам кунлари назоратсизлик туфайли ҳуқуқбузарлик ҳолатлари содир этилаётгани, уларда пиротехник воситаларига қизиқиш ортиб бораётгани, натижада вояга етмаганларнинг ҳаёти учун хавфли ҳодисалар юз бераётганини ҳаётий мисоллар орқали сўзлаб берди. Ҳатто вояга етмаган ўсмир-ёшларнинг айнан шундай воситаларни ўйин қуролига айлантиришлари оқибатида кўплаб болалар жиддий жароҳатлар олиши натижасида умрбод ногирон бўлиб қолаётганлари, айрим ўсмир-ёшлар эса баъзи сохта тадбиркорлар воситачилигида пиротехника воситаларининг олди-сотдиси билан шуғулланаётганлари, бунинг оқибатида узрли сабабларсиз дарс қолдириш ҳолатлари ҳам содир бўлаётганини мисоллар тариқасида батафсил маълумотлар берди.

Тадбир давомида Амударё тумани Ички ишлар бўлими жамоат хавфсизлиги хизмати ҳуқуқбузарликлар профилактикаси вояга етмаганлар масалалари бўйича инспектор, психологи, лейтенант Х.Сафарбоев “маҳалла – мактаб – оила” ҳамкорлиги бу борада муҳим аҳамиятга эга эканлигини таъкидлаб, вояга етмаганларни назоратсиз қолдирмаслик, ўткир тиғли кесувчи асбоблар, пиротехника воситаларидан мактабда ва мактабдан ташқари вақтларда ўйин восита сифатида фойдаланишларига йўл қўймаслик, ҳар қандай ёшдаги боланинг қўлида шу каби нарсалар пайдо бўлса, уни, албатта, олиб қўйиш ва хавфсизлик чораларини кўриш зарурлигини таъкидлади.

Дарвоқе, пиротехника воситалари, улар қандай шаклда бўлишдан қатъий назар, нафақат вояга етмаганлар, балки барча ёшдаги инсонлар ҳаёти учун хавфлидир. Бу ҳақда “Осойишталик сабоқлари”мавзусидаги тадбирда атрофлича сўз юритилиб, тадбир иштирокчилари бўлган 5-6-синфлар ўқувчиларига масъуллар томонидан ҳаётий мисоллар орқали зарур тушунча ва тавсиялар берилди.

Шунингдек, пиротехника воситаларининг инсон саломатлиги, ҳаёти учун салбий оқибатлар келтириб чиқариши хусусидаги видеороликлар намойиш этилди. Ўқувчи-ёшлар ўзларини қизиқтирган саволлар билан мурожаат қилдилар ва барча саволларига масъуллар ҳаётий мисоллар орқали тегишли жавоблар бердилар.

Робия ЙЎЛДОШЕВА.