PIROTEXNIKA VOSITALARINING ZARARI XUSUSIDA PROFILAKTIK SUHBAT OʻTKAZILDI

Yurtimizda yangi yil bayrami yaqinlashgani sari ayrim tadbirkorlar tomonidan bojxona nazorat-oʻtkazish punktlarini chetlab oʻtgan holda noqonuniy ravishda pirotexnika vositalarini olib kirish va ushbu vositalarning oldi-sotdisi bilan shugʻullanish holatlari bilan bogʻliq huquqbuzarliklar sodir etilayotgani bois, joylarda aynan shunday vaziyatlarga yoʻl qoʻymaslik va baxtsiz hodisalarning oldini olishga qaratilgan chora-tadbirlar amalga oshirilmoqda. Bu borada IIBning jamoat xavfsizligi boʻlinmasi huquqbuzarliklar profilaktikasi inspektorlari tomonidan taʼlim-tarbiya muassasalarida, ovul va mahallalarda voyaga yetmagan oʻsmir yoshlar ishtirokida oʻtkazilayotgan profilaktik tadbirlar, “Osoyishtalik saboqlari” mavzusidagi davra suhbatlari, “Davomat”, “Xavfsiz tun”, “Tigʻ” kabi nazorat tadbirlari muhim ahamiyat kasb etmoqda.

Ana shunday maʼnaviy-maʼrifiy profilaktik tadbirlardan biri joriy yilning 13-dekabr sanasida Amudaryo tuman Maktabgacha va maktab taʼlimi boʻlimi tasarrufidagi 38-sonli umumtaʼlim maktabida ham oʻtkazildi. Unda Amudaryo tumani Favqulodda vaziyatlar boʻlimi katta inspektori Behzod Allaberganov, Amudaryo tumani Ichki ishlar boʻlimi jamoat xavfsizligi xizmati huquqbuzarliklar profilaktikasi inspektor-psixologi, leytenant X.Safarboyev, Ichki ishlar boʻlimi jamoat xavfsizligi boʻlimi huquqbuzarliklar profilaktikasi voyaga yetmaganlar masalalari boʻyicha inspektor-psixologi, kapitan D.Aminov, 38-sonli umumtaʼlim maktabi oʻqituvchilari va maktabning 5-, 6-sinflar oʻquvchilari ishtirok etishdi.

“Osoyishtalik saboqlari” mavzusidagi mazkur tadbirni maktab direktorining maʼnaviy-maʼrifiy ishlar boʻyicha oʻrinbosari N.Yusupova ochdi va Yangi yil bayrami arafasida voyaga yetmagan oʻsmir-yoshlar orasida pirotexnika vositalaridan oʻyin sifatida foydalanish holatlari uchrab turishi, buning natijasida koʻplab baxtsiz hodisalar yuz berishi haqida toʻxtalib, bunday holatlarning oldini olish har bir ota-onaning, oʻqituvchi va oʻquvchi-yoshlarning zimmasidagi masʼuliyatli vazifa ekanligini taʼkidladi.

Shundan soʻng, maktab inspektor-psixologi, kapitan D.Aminov “Maktabda va maktabdan tashqarida voyaga yetmaganlarning xavfsizligini taʼminlash, ularning pirotexnika vositalari bilan oʻynashlariga yoʻl qoʻymaslik” mavzusida profilaktik suhbat oʻtkazdi. Suhbat jarayonida D.Aminov voyaga yetmaganlar va oʻsmir-yoshlar oʻrtasida Yangi yil bayrami arafasida va bayram kunlari nazoratsizlik tufayli huquqbuzarlik holatlari sodir etilayotgani, ularda pirotexnik vositalariga qiziqish ortib borayotgani, natijada voyaga yetmaganlarning hayoti uchun xavfli hodisalar yuz berayotganini hayotiy misollar orqali soʻzlab berdi. Hatto voyaga yetmagan oʻsmir-yoshlarning aynan shunday vositalarni oʻyin quroliga aylantirishlari oqibatida koʻplab bolalar jiddiy jarohatlar olishi natijasida umrbod nogiron boʻlib qolayotganlari, ayrim oʻsmir-yoshlar esa baʼzi soxta tadbirkorlar vositachiligida pirotexnika vositalarining oldi-sotdisi bilan shugʻullanayotganlari, buning oqibatida uzrli sabablarsiz dars qoldirish holatlari ham sodir boʻlayotganini misollar tariqasida batafsil maʼlumotlar berdi.

Tadbir davomida Amudaryo tumani Ichki ishlar boʻlimi jamoat xavfsizligi xizmati huquqbuzarliklar profilaktikasi voyaga yetmaganlar masalalari boʻyicha inspektor, psixologi, leytenant X.Safarboyev “mahalla – maktab – oila” hamkorligi bu borada muhim ahamiyatga ega ekanligini taʼkidlab, voyaga yetmaganlarni nazoratsiz qoldirmaslik, oʻtkir tigʻli kesuvchi asboblar, pirotexnika vositalaridan maktabda va maktabdan tashqari vaqtlarda oʻyin vosita sifatida foydalanishlariga yoʻl qoʻymaslik, har qanday yoshdagi bolaning qoʻlida shu kabi narsalar paydo boʻlsa, uni, albatta, olib qoʻyish va xavfsizlik choralarini koʻrish zarurligini taʼkidladi.

Darvoqe, pirotexnika vositalari, ular qanday shaklda boʻlishdan qatʼiy nazar, nafaqat voyaga yetmaganlar, balki barcha yoshdagi insonlar hayoti uchun xavflidir. Bu haqda “Osoyishtalik saboqlari”mavzusidagi tadbirda atroflicha soʻz yuritilib, tadbir ishtirokchilari boʻlgan 5-6-sinflar oʻquvchilariga masʼullar tomonidan hayotiy misollar orqali zarur tushuncha va tavsiyalar berildi.

Shuningdek, pirotexnika vositalarining inson salomatligi, hayoti uchun salbiy oqibatlar keltirib chiqarishi xususidagi videoroliklar namoyish etildi. Oʻquvchi-yoshlar oʻzlarini qiziqtirgan savollar bilan murojaat qildilar va barcha savollariga masʼullar hayotiy misollar orqali tegishli javoblar berdilar.

Robiya YOʻLDOShEVA.