БОЙОВУЛ МАҲАЛЛАСИНИНГ НУРОНИЙ ОНАХОНЛАРИ ИШТИРОКИДА ДАВРА СУҲБАТИ ЎТКАЗИЛДИ

Ёши улуғ инсонларни қадрлаш, уларнинг ҳаёт тажрибасини ўрганиш, панд-у насиҳатларига доимо амал қилиш халқимизга хос қадрият ҳисобланади. Ушбу қадриятларни давом эттириш ҳамда юртимизда катта авлод вакилларининг тинчлик, осойишталикни мустаҳкамлашдаги иштирокини ошириш, ёшларни ватанпарварлик, миллий қадриятларимизга ҳурмат руҳида тарбиялашда уларнинг бой ҳаётий тажрибасидан фойдаланишга алоҳида эътибор қаратилмоқда.

Амударё телевидениесининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ҳам “Кексалар – хонадонларимиз файзи ва фариштаси” шиори остида турли тадбирлар ташкил этилмоқда. Кексаларни эъзозлаш, уларнинг панд-насиҳатларини ёшларга етказиш орқали жамиятда ўзаро ҳурмат ва меҳр-муҳаббат, юксак ахлоқий ва маънавий муҳитни шакллантириш борасида ҳудудларда “Бувижонлар мактаби” аъзолари томонидан амалга оширилаётган ишлар таништириб борилмоқда.

22 декабрь куни 16-сонли ихтисослаштирилган давлат умумтаълим мактабида мазкур грант лойиҳаси иш режасига кўра Бойовул маҳалласида “Бувижонлар мактаби” аъзолари, нуроний онахонлар, меҳнат фахрийлари иштирокида давра суҳбати ташкил этилди. Ушбу тадбирда лойиҳа ижрочилари, таҳририят ходимлари ва фуқаролар йиғини хотин-қизлар фаоли Ҳуснида Абдураҳмонова, маҳалла қизлари иштирок этишди.

Тадбирда дастлаб Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси иш режасига мувофиқ ўтказилаётган тадбирлар, танловлар хусусида маълумотлар берилди. Ушбу тадбирларнинг ёшларнинг бўш вақтларини мазмунли ўтказишларида, уларни китобхонликка жалб этишда муҳим аҳамият касб этаётгани таъкидлаб ўтилди. 

Тадбир давомида фахрий ўқитувчи Ҳайитгул Аллақова хонадонлар кўрки бўлган бобо ва бувижонлар қаноти остида фарзандларнинг улғайиб, камол топишида кўп ҳикмат мужассамлиги, бу ҳикматлар улуғ ёшдаги кексаларнинг ўзбекона тутумлари, оила аъзоларининг хулқ-атворидаги гўзал сифат ва фазилатларда намоён бўлишини эътироф этди.

Шунингдек, қиз боланинг одоби, кийиниш маданияти, миллий либослар ҳақида ҳам сўз юритиб, қадимда бувилар, оналар кийган либосларга таъриф берди. Ҳаётий тажрибаларидан мисоллар келтириб, қизларни ибо-ҳаёли, одоб-икромли, касб-ҳунарли бўлишга ундаб, ўз оиласининг кўрки, ота-онасининг фахри, жамиятга керакли инсонлар бўлиб улғайишларига тилак билдирди.

Маҳалладаги фаол онахонлар либос ҳар бир халқ миллий маданиятини, миллий қадриятларини ўзида акс эттирувчи энг муҳим белги эканлигини алоҳида таъкидлаб, миллий қадриятларимизга, момоларимизнинг умрбоқий удум ва анъаналарига ҳурмат билан қараш лозимлигини айтиб ўтишди.

Бойовул маҳалла фуқаролар йиғини хотин-қизлар фаоли Ҳуснида Абдураҳмонова ҳам либос нафақат инсоннинг ташқи кўриниши безаги, балки ундаги ахлоқ-одоб, маънавият ва маданиятнинг белгиси эканлигин, момо ва бувижонларимиз кийган миллий либослар ўзбек халқининг қадимий ва ўчмас маънавияти ва бой қадриятлари ўз ифодасини топганлигини таъкидлаб, маҳалла ҳудудида бу борада амалга оширилаётган ишлар хусусида сўзлаб ўтди.

Нуроний онахонлар “Мутаассиблик ва ёт ғоялар таъсирига тушиб қолмаслик”, “Миллий урф-одатлар ва анъаналар”, “Қиз бола одоби”, “Саришталик уй – фаришталик уй”, “Озодалик ва поклик – соғлик гарови”, “Оилаларда соғлом турмуш тарзини тўғри йўлга қўйиш”, “Тўғри овқатланиш – саломатлик гарови” мавзуларида қизлар билан дилдан суҳбат қуришди.

Амударё телевидениесининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ўтказилган тадбир бапрчага манзур бўлди.

О.Худойберганова