ВАТАНПАРВАРЛИК ОЙЛИГИ ДОИРАСИДА ТАДБИРЛАР ДАВОМ ЭТМОҚДА
Ўзбекистон Республикаси Президентининг 2023 йил 14 декабрь кунги Фармойишига асосан 2023 йил 25 декабрь куни Амударё тумани Мудофаа ишлари бўлими томонидан Ўзбекистон Қуролли Кучлари ташкил этилганлигининг 32 йиллиги, Ватан ҳимоячилари куни байрами ҳамда Ватанпарварлик ойлиги муносабати билан турли тадбирлар ўтказилмоқда.
Ватанпарварлик ойлиги доирасидаги навбатдаги тадбир Амударё тумани Маданият бўлими биносида ўтказилди. Маълумки, мамлакатимиз бўйлаб 2023 йил 15 декабрдан 2024 йил 15 январгача Ватанпарварлик ойлиги ўтказилмоқда. Ойлик доирасида ёшларни ҳарбий-ватанпарварлик руҳида тарбиялаш, уларни Ватан ҳимоясидек шарафли касбга йўналтириш мақсадида Жалолиддин Мангуберди номидаги ҳарбий академик лицейи раҳбарияти билан ҳамкорликда ўтказилган ушбу тадбирдан кўзланган мақсал ҳарбий академик лицей фаолиятини кенг жамоатчиликка таништириш ва 9-синф битирувчиларидан иқтидорли ўқувчиларни ўқишга таклиф қилишдан иборат бўлди.
Мазкур тарғибот тадбири давомида Жалолиддин Мангуберди ҳарбий академик лицейи ўқитувчилари Шерзод Рўзметов ҳамда Шахзод Жуманиёзовлар семинар-тренинг ўтказишди. Унда Амударё тумани Мудофаа ишлари бўлими бошлиғи, подполковник Шерзод Муродов, Мудофаа ишлари бўлими бошлиғининг тарбиявий ва мафкуравий ишлар бўйича ўринбосари, Қуролли Кучлар хизматчиси Зокир Саъдуллаев, Ўзбекистон Республикаси "Veteran" жангчи-фахрий ва ногиронлари бирлашмаси Қорақалпоғистон Республикаси байналмилал жангчилари Амударё туманидаги вакили Баҳодир Жуманиёзов ва фахрий жангчилар, умумтаълим мактабларининг чақириққача бўлган тайёргарлик фани ўқитувчилари ва 9-синф ўқувчилари иштирок этдилар.
Тумандаги умумтаълим мактабларининг 9-синф ўқувчилари Жалолиддин Мангуберди номидаги ҳарбий академик лицейнинг амалий ва назарий ўқув машғулотлари, мазкур лицей битирувчиларининг Олий Ҳарбий билим юртларига ўқишга киришда қандай имтиёзларга эга бўлишлари, шунингдек, ҳарбий академик лицей курсантларига қўйиладиган асосий талаблар бўйича саволлар билан мурожаат қилдилар.
Айтиш жоизки, мазкур лицейнинг асосий вазифаси ўқувчиларда халқимизнинг маънавий-маърифий қадриятларига, маданияти ва урф-одатларига чуқур ҳурматни, уларда ҳалоллик, виждонийлик, ватанпарварлик, садоқат, фидокорлик сингари инсоний фазилатларни шакллантириш ҳисобланади.
Шунингдек, ўқувчиларда кенг дунёқараш, интеллектуал салоҳият, ижодий ҳамда таҳлилий фикрлашни ривожлантириш, табиий ва аниқ фанлар, хорижий тиллар ва замонавий ахборот технологиялари бўйича мустаҳкам билимларни шакллантириш, шунингдек, уларга ҳарбий ишдаги бошланғич билимларни сингдириш, Қуролли Кучлар ва давлат хизмати учун кадрлар захирасини шакллантириш мақсадида республиканинг олий, олий ҳарбий ва ҳарбийлаштирилган таълим муассасаларига ўқишга кириши учун муносиб номзодларни тайёрлаш ҳам лицейнинг вазифалари сирасига киради.
Лицей ўрта махсус таълим муассасаси ҳисобланади, лицейга қабул ва ўқув жараёни 2023/2024 ўқув йилидан бошланган. Лицейда ўқув жараёни давомийлиги икки йил бўлиб, йиллик қабул квотаси 150 нафарни ташкил этади.
Тарғибот семинар-тренинг давомида масъуллар иштирокчиларнинг барча саволларига жавоб бердилар. Тадбир сўнгида видеоролик намойиш этилди.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
