ТАЗЙИҚ ВА ЗЎРАВОНЛИКНИНГ ОЛДИНИ ОЛИШГА ҚАРАТИЛГАН СЕМИНАР-ТРЕНИНГ ЎТКАЗИЛДИ

Мамлакатимизда гендер тенгликни таъминлаш, зўравонликнинг ҳар қандай турларига кескин барҳам бериш, айниқса, жинсий зўравонликнинг олдини олишга қаратилган қонун ва қонуности ҳужжатлари мазмун-моҳиятини кенг халқ оммасига тушунтириш юзасидан тизимли ишлар амалга оширилмоқда. Бу борада таълим-тарбия муассасаларида, маҳаллаларда, идора ва ташкилотларда ўтказилаётган ҳуқуқий, маънавий-маърифий ва психологик суҳбатлар, семинар-тренинглар муҳим аҳамият касб этмоқда.

Жорий йилнинг 6 январь санасида Амударё тумани ММТБ тасарруфидаги 82-сонли мактабда бўлиб ўтган маънавий-маърифий, психологик семинар-тренинг ҳам хотин-қизларни тазйиқ ва зўравонликдан ҳимоя қилиш ва ҳаётимизда баъзан учраб турадиган бу каби иллатларга кескин барҳам беришга қаратилгани билан муҳим аҳамият касб этди.

Тадбирда Амударё туман ҳокими ўринбосари, оила ва хотин-қизлар бўлими бошлиғи Гўзал Сабурова, хотин-қизларни реабилитация қилиш Қорақалпоғистон Республикаси Амударё намунали туманлараро Маркази директори Гавҳар Чимбайбоева, Амударё туман ММТБ мудири Ялғаш Шомуродов, ММТБ ташҳис Маркази услубчиси Нурбек Сейтбоев, тумандаги мактаб ва мактабгача таълим муассасаларининг амалиётчи-психологлари иштирок этдилар.

“ Тазйиқ ва зўравонликнинг турлари” мавзусидаги семинар-тренингда 84-сонли мактабнинг амалиётчи-психологи Нигора Сапарова, 27-сонли мактабнинг амалиётчи психологи Мавлуда Тўраева, 71-сонли, 12-сонли мактабларнинг амалиётчи-психологлари Шаҳноза Усмонова ҳамда Гулнора Шариповалар семинар-тренинг кун тартибидаги мавзу юзасидан илмий-амалий ва назарий машғулотлар олиб бордилар.

Хусусан, Қонунчилик палатаси томонидан 2019 йил 17 августда қабул қилинган ва Сенат томонидан 2019 йил 23 августда маъқулланган “Хотин-қизларни тазйиқ ва зўравонликдан ҳимоя қилиш тўғрисида”ги Ўзбекистон Республикаси Қонунининг мазмун-моҳияти, ушбу Қонундаги асосий тушунчалар, яъни зўравонликнинг турлари ҳақида батафсил маълумотлар бердилар. Айниқса, жинсий зўравонлик, жисмоний зўравонлик, зўравонлик, иқтисодий зўравонлик, руҳий зўравонлик, тазйиқ бўйича зарур тушунчалар юзасидан бўлган маърузалар иштирокчиларда катта қизиқиш уйғотди.

Шунингдек, тадбир давомида тазйиқ ва зўравонликнинг, жинсий зўравонликнинг олдини олиш, жабрланувчининг хоҳиш-иродасига қарши таъқиб этиш, жинсий зўрлаш ва унинг ёқимсиз оқибатлари, ёшлар тарбиясига салбий таъсири, аёл-қизларга нисбатан ахлоқсиз ҳаракатлар содир этиш орқали уларнинг номусига, нафсониятига тегиш каби иллатларга барҳам бериш борасида фикр алмашувлар ҳам ўтказилди.

Иштирокчилар маъсулларга, семинар-тренинг машғулотларини олиб борган тренинг-психологларга ўзларини қизиқтирган саволлар билан мурожаат қилдилар. Барча саволларга маъсуллар ҳаётий мисоллар асосида тегишли жавоблар беришди.

Робия ЙЎЛДОШЕВА.