ҚИЛИЧБОЙ ОВУЛИДАГИ 22-СОНЛИ МТТДА ВАТАН ҲИМОЯЧИЛАРИ КУНИГА БАҒИШЛАНГАН ТАДБИР ЎТКАЗИЛДИ
Юртимизда 14 январь – Ватан ҳимоячилари куни ва Қуролли Кучларимиз ташкил этилганининг 32 йиллиги муносабати билан кенг миқёсдаги тантанали тадбирлар ташкил этилмоқда. Умумтаълим мактаблари ва мактабгача таълим ташкилотларида бўлиб ўтаётган бу каби маънавий-маърифий тадбирлар ёшлар қалбидаги Ватанга муҳаббат, юртга садоқат туйғуларини янада мустаҳкамламоқда.
Шу йил 11 январь куни Қиличбой овулидаги 22-сонли мактабгача таълим ташкилотида ҳам тарбияланувчилар иштирокида Ватан ҳимоячилари кунига бағишланган тадбир ўтказилди. Ушбу тадбирни ташкилот раҳбари Нилуфар Юсупова очиб берди ҳамда байрам кечасига ташриф буюрган ота-оналарни, меҳмонларни, жажжи кичкинтойларни Ватан ҳимоячилари куни ва Қуролли Кучларимиз ташкил этилганининг 32 йиллиги билан қизғин қутлади. Шунингдек, Президентимиз раҳнамолигида замонавий ҳарбий техника, қурол-яроғ ва малакали офицер кадрлар билан таъминлангани, юртимиз тинчлиги, сарҳадларимиз дахлсизлиги ва халқимиз осойишталигини ҳимоя қилишга қодир Миллий армиямиз шакллантирилганини фахру-ифтихор билан эътироф этиб ўтди.
Шундан сўнг, жажжи кичкинтойлар билан биргаликда Давлатимиз Мадҳияси куйланди. Болажонлар “Мен ҳам аскар бўламан” қўшиғини ғурур ва фахр, ҳарбийча рақслар билан ижро этишди.
Тадбирга ташриф буюрган Қиличбой овулидаги Давлат хавфсизлик хизмати чегара қўшинларига қарашли ҳарбий қисм хизматчиси Аббос Рустамовга сўз берилди. Ҳарбий хизматчи ташкилот тарбияланувчилари, Ватанимизнинг бўлғуси ҳимоячиларини ва ходимларини байрам билан табриклаб, ҳар йили 14 январь – Ватан ҳимоячилари куни муносабати билан Ватан озодлиги учун курашиб шаҳид кетганларни хотирлаш ва ҳарбийларимизнинг фидкорона хизматини улуғлаб тадбирлар ўтказиш яхши анъанага айланганини эътироф этди. Бугунги кунда ҳарбий соҳага қаратилаётган эътибор, яратиб берилаётган шарт-шароитлар, кенг кўламдаги имтиёзлар ҳақида атрофлича тўхталиб ўтди. Она Ватанга хизмат қилиш, давлат чегаралари дахлсизлигини таъминлаш, юртимизнинг мудофаа қудратини юксалтириш учун бор куч-ғайратини сарф этиб, жасорат билан хизмат кўрсатишларини билдирди ва жажжи кичкинтойларни келажакда мард, жасур ўғлонлар, юрт равнақига ҳисса қўша оладиган комил инсонлар бўлиб вояга етишга руҳлантирди.
Болажонлар тадбирни она Ватан, истиқлолни шарафловчи, юртимиздаги тинчлик-осойишталикни мадҳ этувчи шеърлар билан давом эттиришди. Ҳарбий либослардаги жажжи қизчалар ижросидаги “Лейтенант” қўшиғи ҳам барчага кўтаринкилик, завқ улашди. Қизчалар қўшиқ давомида ҳарбийча ҳаракатлар билан рақслар ижро этиб, қалбларидаги ғурур ҳисларини ифода этишди.
Аскарча либосларини кийган кичкинтойлар ҳарбий трюкларни маҳорат билан бажаришга ҳаракат қилиб, кўнгилларида бурчга садоқат туйғулари янада мустаҳкамланаётганини кўрсатишди. Тадбирни томоша қилган меҳмонлар, ота-оналар ҳам ёш авлоднинг Ватанга муносиб фарзандлар бўлиб улғайишаётганидан мамнун бўлишди ва таълим-тарбияни тўғри йўлга қўйган 22-сонли мактабгача таълим ташкилоти ходимлари, тарбиячиларига ўз миннатдорчиликларини билдиришди.
Ташкилотнинг мусиқа раҳбари Суннатилло Хўжамуродов ижросидаги Ватанни мадҳ этувчи ва дилларга байрамона кайфият улашувчи куй-қўшиқлар тадбирнинг янада кўтаринки ўтишини таъминлади. Қизғин ва таассуротларга бой ўтган тадбир кичкинтойлар қалбида Ватанга муҳаббат, юртга садоқат туйғуларини шакллантириб, янада мустаҳкамлади.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
