QILIChBOY OVULIDAGI 22-SONLI MTTDA VATAN HIMOYaChILARI KUNIGA BAGʻIShLANGAN TADBIR OʻTKAZILDI
Yurtimizda 14-yanvar – Vatan himoyachilari kuni va Qurolli Kuchlarimiz tashkil etilganining 32 yilligi munosabati bilan keng miqyosdagi tantanali tadbirlar tashkil etilmoqda. Umumtaʼlim maktablari va maktabgacha taʼlim tashkilotlarida boʻlib oʻtayotgan bu kabi maʼnaviy-maʼrifiy tadbirlar yoshlar qalbidagi Vatanga muhabbat, yurtga sadoqat tuygʻularini yanada mustahkamlamoqda.
Shu yil 11-yanvar kuni Qilichboy ovulidagi 22-sonli maktabgacha taʼlim tashkilotida ham tarbiyalanuvchilar ishtirokida Vatan himoyachilari kuniga bagʻishlangan tadbir oʻtkazildi. Ushbu tadbirni tashkilot rahbari Nilufar Yusupova ochib berdi hamda bayram kechasiga tashrif buyurgan ota-onalarni, mehmonlarni, jajji kichkintoylarni Vatan himoyachilari kuni va Qurolli Kuchlarimiz tashkil etilganining 32 yilligi bilan qizgʻin qutladi. Shuningdek, Prezidentimiz rahnamoligida zamonaviy harbiy texnika, qurol-yarogʻ va malakali ofitser kadrlar bilan taʼminlangani, yurtimiz tinchligi, sarhadlarimiz daxlsizligi va xalqimiz osoyishtaligini himoya qilishga qodir Milliy armiyamiz shakllantirilganini faxru-iftixor bilan eʼtirof etib oʻtdi.
Shundan soʻng, jajji kichkintoylar bilan birgalikda Davlatimiz Madhiyasi kuylandi. Bolajonlar “Men ham askar boʻlaman” qoʻshigʻini gʻurur va faxr, harbiycha raqslar bilan ijro etishdi.
Tadbirga tashrif buyurgan Qilichboy ovulidagi Davlat xavfsizlik xizmati chegara qoʻshinlariga qarashli harbiy qism xizmatchisi Abbos Rustamovga soʻz berildi. Harbiy xizmatchi tashkilot tarbiyalanuvchilari, Vatanimizning boʻlgʻusi himoyachilarini va xodimlarini bayram bilan tabriklab, har yili 14-yanvar – Vatan himoyachilari kuni munosabati bilan Vatan ozodligi uchun kurashib shahid ketganlarni xotirlash va harbiylarimizning fidkorona xizmatini ulugʻlab tadbirlar oʻtkazish yaxshi anʼanaga aylanganini eʼtirof etdi. Bugungi kunda harbiy sohaga qaratilayotgan eʼtibor, yaratib berilayotgan shart-sharoitlar, keng koʻlamdagi imtiyozlar haqida atroflicha toʻxtalib oʻtdi. Ona Vatanga xizmat qilish, davlat chegaralari daxlsizligini taʼminlash, yurtimizning mudofaa qudratini yuksaltirish uchun bor kuch-gʻayratini sarf etib, jasorat bilan xizmat koʻrsatishlarini bildirdi va jajji kichkintoylarni kelajakda mard, jasur oʻgʻlonlar, yurt ravnaqiga hissa qoʻsha oladigan komil insonlar boʻlib voyaga yetishga ruhlantirdi.
Bolajonlar tadbirni ona Vatan, istiqlolni sharaflovchi, yurtimizdagi tinchlik-osoyishtalikni madh etuvchi sheʼrlar bilan davom ettirishdi. Harbiy liboslardagi jajji qizchalar ijrosidagi “Leytenant” qoʻshigʻi ham barchaga koʻtarinkilik, zavq ulashdi. Qizchalar qoʻshiq davomida harbiycha harakatlar bilan raqslar ijro etib, qalblaridagi gʻurur hislarini ifoda etishdi.
Askarcha liboslarini kiygan kichkintoylar harbiy tryuklarni mahorat bilan bajarishga harakat qilib, koʻngillarida burchga sadoqat tuygʻulari yanada mustahkamlanayotganini koʻrsatishdi. Tadbirni tomosha qilgan mehmonlar, ota-onalar ham yosh avlodning Vatanga munosib farzandlar boʻlib ulgʻayishayotganidan mamnun boʻlishdi va taʼlim-tarbiyani toʻgʻri yoʻlga qoʻygan 22-sonli maktabgacha taʼlim tashkiloti xodimlari, tarbiyachilariga oʻz minnatdorchiliklarini bildirishdi.
Tashkilotning musiqa rahbari Sunnatillo Xoʻjamurodov ijrosidagi Vatanni madh etuvchi va dillarga bayramona kayfiyat ulashuvchi kuy-qoʻshiqlar tadbirning yanada koʻtarinki oʻtishini taʼminladi. Qizgʻin va taassurotlarga boy oʻtgan tadbir kichkintoylar qalbida Vatanga muhabbat, yurtga sadoqat tuygʻularini shakllantirib, yanada mustahkamladi.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
