Бой овул маҳалласи профилактика инспекторининг ҳисоботи тингланди
2024 йил 17 январь куни Амударё тумани Маданият марказида тумандаги Бой овул маҳалла фуқаролар йиғинининг профилактика инспектори, капитан Абай Тохтарбоев маҳалла фаоллари олдида ҳисобот берди.
Ҳисобот учрашувида тегишли соҳа мутасаддилари, маҳалла фуқаролар йиғини масъуллари, аҳоли вакиллари иштирок этдилар.
Ўзбекистон Республикаси Ички ишлар вазирлигининг 2017 йил 6 сентябрдаги “Ички ишлар органлари профилактика инспекторларининг ҳисоботини фуқаролар йиғинларида эшитиш тартиби тўғрисидаги низомни тасдиқлаш ҳақида”ги буйруғи ижросини таъминлаш юзасидан ўтказиладиган йиғилишда профилактика инспетори 2023 йил давомида амалга оширган ишлари юзасидан ҳисобот берди.
Ҳисоботда қайд этилишича, Ўзбекистон Республикаси Ички ишлар вазирлиги, Ўзбекистон Республикаси камбағалликни қисқартириш ва бандлик вазирлиги, Ўзбекистон Республикаси Ёшлар сиёсати ва спорт вазирлигининг 2023 йил 30 март кунги қўшма қарорига асосан, “Обод ва хавфсиз маҳалла” тамойили асосида маҳалла инспектори томонидан 42та ҳуқуқбузарлик содир этиш ёки ундан жабрланиш эҳтимоли юқори бўлган шахслар аниқланган ҳамда улар билан тушунтириш ишларини амалга оширган.
Маҳалла бешлиги билан ҳамкорликда ҳудудда бир қанча ишлар амалга оширилган. Хусусан, ҳудуддаги жиноят содир этиш эҳтимоли юқори бўлган нуқталар ва аҳоли гавжум жойларга, яъни Қиличбой ва Самарқанд кўчалари чорраҳасига, Тадбиркорлар кўчаси бўйида жойлашган “Юсуф Эшон бобо” жоме масжиди ёнига юқори сифатли видеокузатув камералари ўрнатилиб, маҳалла ҳудудига кириш ва чиқиш жойлари доимий назоратга олиш имконияти яратилган.
Ўғирлик жиноятининг олдини олиш мақсадида маҳалла ҳудудида жойлашган аҳолига хизмат кўрсатувчи 5та савдо-сотиқ дўконлари ва 2та қаровсиз қолган уйлар қўриқлаш хизматига олинган.
Маҳалла ҳудудида жойлашган 16-сонли мактабда доимий равишда “Давомат” ва “Тиғ” тадбирлари ўтказилиб борилган ҳамда маҳалла ҳудудида 140та ҳуқуқбузарликлар аниқланган. Шунингдек, ҳуқуқбузарлик содир этишга мойил бўлган, профилактик ҳисобга олинган 36 нафар шахслар билан доимий равишда профилактик ишлар амалга оширилган.
Маҳалла ҳудудидаги 3 нафар фуқаро Республика руҳий касалликлар диспансерига жойлаштирилган ва спиртли ичимликка ружу қўйган 3 нафар шахслар Республика Норкология диспансерига мажбурий ва ихтиёрий равишда даволанишга юборилган.
Йиғилишда профилактика инспектори ҳисоботидан кейин маҳалла ҳудудида жиноятчилик ва ҳуқуқбузарликларнинг олдини олиш бўйича амалга оширилаётган чора-тадбирлар муҳокама қилинди.
Муҳокамаларда ҳуқуқбузарликларнинг бир қисми тайинли иш жойига эга бўлмаган шахслар томонидан содир этилаётганини ҳисобга олган ҳолда энг аввало, ишсизликка барҳам бериш, аҳолини фойдали меҳнат билан кўпроқ банд қилиш лозимлиги таъкидланди. Бу бўйича профилактика инспектори билан бирга ҳудуддаги ташкилотлар раҳбарлари, тадбиркорлик субъектлари ҳам ҳамкорликда иш олиб боришлари лозимлиги қайд этилди.
Олиб борилган ишлар ва кўрилган тезкор чоралар натижасида 2023 йил якунига қадар маҳалла жиноятчилик даражаси юқори бўлган “қизил” тоифадан жиноятчилик нисбатан кам бўлган “сариқ” тоифага ўтказилган. Бунда албатта, профилактика инспекторининг маҳалла фуқаролар йиғини масъуллари билан ҳамкорликдаги фаолиятининг аҳамияти катта. Профилактика инспекторининг ҳисоботини эшитиш чоғида ана шу ҳамкорликни янада мустаҳкамлаш юзасидан фикрлар билдирилди.
Шу билан бирга йиғилишда жойларда учраётган жиноят ва ҳуқуқбузарликларнинг олдини олишда кенг жамоатчилик билан ҳамкорликда амалга оширилиши лозим бўлган вазифалар белгилаб олинди.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
