Boy ovul mahallasi profilaktika inspektorining hisoboti tinglandi

2024-yil 17-yanvar kuni Amudaryo tumani Madaniyat markazida tumandagi Boy ovul mahalla fuqarolar yigʻinining profilaktika inspektori, kapitan Abay Toxtarboyev mahalla faollari oldida hisobot berdi.

Hisobot uchrashuvida tegishli soha mutasaddilari, mahalla fuqarolar yigʻini masʼullari, aholi vakillari ishtirok etdilar.

Oʻzbekiston Respublikasi Ichki ishlar vazirligining 2017-yil 6-sentyabrdagi “Ichki ishlar organlari profilaktika inspektorlarining hisobotini fuqarolar yigʻinlarida eshitish tartibi toʻgʻrisidagi nizomni tasdiqlash haqida”gi buyrugʻi ijrosini taʼminlash yuzasidan oʻtkaziladigan yigʻilishda profilaktika inspetori 2023-yil davomida amalga oshirgan ishlari yuzasidan hisobot berdi.

Hisobotda qayd etilishicha, Oʻzbekiston Respublikasi Ichki ishlar vazirligi, Oʻzbekiston Respublikasi kambagʻallikni qisqartirish va bandlik vazirligi, Oʻzbekiston Respublikasi Yoshlar siyosati va sport vazirligining 2023-yil 30-mart kungi qoʻshma qaroriga asosan, “Obod va xavfsiz mahalla” tamoyili asosida mahalla inspektori tomonidan 42ta huquqbuzarlik sodir etish yoki undan jabrlanish ehtimoli yuqori boʻlgan shaxslar aniqlangan hamda ular bilan tushuntirish ishlarini amalga oshirgan.

Mahalla beshligi bilan hamkorlikda hududda bir qancha ishlar amalga oshirilgan. Xususan, hududdagi jinoyat sodir etish ehtimoli yuqori boʻlgan nuqtalar va aholi gavjum joylarga, yaʼni Qilichboy va Samarqand koʻchalari chorrahasiga, Tadbirkorlar koʻchasi boʻyida joylashgan “Yusuf Eshon bobo” jome masjidi yoniga yuqori sifatli videokuzatuv kameralari oʻrnatilib, mahalla hududiga kirish va chiqish joylari doimiy nazoratga olish imkoniyati yaratilgan.

Oʻgʻirlik jinoyatining oldini olish maqsadida mahalla hududida joylashgan aholiga xizmat koʻrsatuvchi 5ta savdo-sotiq doʻkonlari va 2ta qarovsiz qolgan uylar qoʻriqlash xizmatiga olingan.

Mahalla hududida joylashgan 16-sonli maktabda doimiy ravishda “Davomat” va “Tigʻ” tadbirlari oʻtkazilib borilgan hamda mahalla hududida 140ta huquqbuzarliklar aniqlangan. Shuningdek, huquqbuzarlik sodir etishga moyil boʻlgan, profilaktik hisobga olingan 36 nafar shaxslar bilan doimiy ravishda profilaktik ishlar amalga oshirilgan.

Mahalla hududidagi 3 nafar fuqaro Respublika ruhiy kasalliklar dispanseriga joylashtirilgan va spirtli ichimlikka ruju qoʻygan 3 nafar shaxslar Respublika Norkologiya dispanseriga majburiy va ixtiyoriy ravishda davolanishga yuborilgan.

Yigʻilishda profilaktika inspektori hisobotidan keyin mahalla hududida jinoyatchilik va huquqbuzarliklarning oldini olish boʻyicha amalga oshirilayotgan chora-tadbirlar muhokama qilindi.

Muhokamalarda huquqbuzarliklarning bir qismi tayinli ish joyiga ega boʻlmagan shaxslar tomonidan sodir etilayotganini hisobga olgan holda eng avvalo, ishsizlikka barham berish, aholini foydali mehnat bilan koʻproq band qilish lozimligi taʼkidlandi. Bu boʻyicha profilaktika inspektori bilan birga hududdagi tashkilotlar rahbarlari, tadbirkorlik subʼektlari ham hamkorlikda ish olib borishlari lozimligi qayd etildi.

Olib borilgan ishlar va koʻrilgan tezkor choralar natijasida 2023-yil yakuniga qadar mahalla jinoyatchilik darajasi yuqori boʻlgan “qizil” toifadan jinoyatchilik nisbatan kam boʻlgan “sariq” toifaga oʻtkazilgan. Bunda albatta, profilaktika inspektorining mahalla fuqarolar yigʻini masʼullari bilan hamkorlikdagi faoliyatining ahamiyati katta. Profilaktika inspektorining hisobotini eshitish chogʻida ana shu hamkorlikni yanada mustahkamlash yuzasidan fikrlar bildirildi.

Shu bilan birga yigʻilishda joylarda uchrayotgan jinoyat va huquqbuzarliklarning oldini olishda keng jamoatchilik bilan hamkorlikda amalga oshirilishi lozim boʻlgan vazifalar belgilab olindi.

Tuman hokimligi Axborot xizmati