Ҳоким ва ёшлар учрашуви бўлиб ўтди

Бугунги кунда юртимизда келажак эгалари бўлган ёшларнинг ҳар томонлама етук ва баркамол инсон бўлиб камол топишлари йўлида амалга оширилаётган ишларнинг чек-чегараси йўқ. Яратилаётган имкониятлардан самарали фойдаланиб, ўзининг қобилияти, зеҳни, изланувчанлиги билан жамиятнинг ҳар жабҳасида тенгдошларига намуна бўлаётган ёшларимиз сони кун сайин ошиб бормоқда.  

Мамлакатимиз бўйлаб ёшлар сиёсати энг устувор йўналишлардан бири сифатида қаралиб, бу борада олиб борилаётган ислоҳотлар жамият ҳаётининг энг асосий бўғини бўлган ёш авлоднинг ҳар томонлама етук ва баркамол бўлиб вояга етишига қаратилгани билан аҳамиятлидир. Бу борадаги давлат сиёсатини амалга оширишда сайёр қабуллар ва учрашувларнинг ҳам ўрни алоҳида.

Жорий йилнинг 30 январь санасида Амударё тумани ҳокими Собир Хўжаметов туманимиздаги бир гуруҳ ёшлар билан учрашди. Туман Мактабгача ва мактаб таълими бўлимига қарашли 55-сонли умумтаълим мактабида ташкил этилган мазкур учрашувда Ойбек, Гулзор ва Олмазор маҳаллаларида истиқомат қилувчи ёшлар вакиллари иштирок этишди.

Шунингдек, учрашувда туман ҳокимининг Ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодир Камолов, туман Мудофаа ишлари бўйича бўлим бошлиғи Шерзод Муродов, туман Ёшлар ишлари агентлиги бошлиғи Сардор Исмоилов, овул ва маҳаллалардаги ҳоким ёрдамчилари, фуқаролар йиғинлари раислари, хотин-қизлар фаоллари, ёшлар етакчилари иштирок этдилар.

Учрашувда туман ҳокими Собир Хўжаметов сўзга чиқиб, сўнгги йилларда мамлакатимизда ёшлар сиёсати борасида олиб борилаётган ислоҳотлар натижасида ёшларни қўллаб-қувватлашнинг комплекс тизими яратилгани, билимли, кенг дунёқарашга эга ватанпарвар йигит-қизларни тарбиялаш давлат сиёсатининг устувор вазифаларидан бири этиб белгиланлигини алоҳида қайд этиб ўтди.

Шунингдек, туман ҳокими ёшларнинг қобилият ва истеъдодларини рўёбга чиқаришлари учун барча зарур шарт-шароитлар яратиб берилаётгани алоҳида таъкидлаб, уларни ушбу имкониятлардан унумли фойдаланишга, илм-фан ва касб-ҳунар сирларини пухта эгаллашга чақирди.

Учрашувда ёшларнинг таълим олиш, ўзини ўзи банд қилиш борасидаги муаммолари тинглангди ва атрофлича ўрганилди. Хусусан, олий таълим муассасаларида таълим олаётган бир гуруҳ ёшларнинг тўлов шартнома пулларини тўлашдаги муаммолари, сартарошлик, тикувчилик каби тадбиркорлик турлари билан шуғулланиш учун асбоб-ускуна сотиб олиш, ўзини ўзи банд қилиш учун кредит олиш борасидаги муаммолари тингланиб, уларни ҳал қилишга ёрдам бериладиган бўлди.

Учрашув давомида туман Мудофаа ишлари бўлими бошлиғи Шерзод Муродов ҳам сўзга чиқиб, ёшларни ҳарбий ватанпарварлик руҳида тарбиялаш борасида олиб борилаётган кенг кўламли чора-тадбирлар хусусида тўхталди ва ҳарбий хизматни ўташ тартиби ҳақида маълумотлар берди.

Тадбир очиқ мулоқот шаклида олиб борилди. Ёшлар ҳар соҳада ўзларини қийнаётган саволлар билан масъулларга мурожаат қилиб, саволларига тўлиқ жавоблар олдилар.

Чарос Арслонова, туман ҳокимининг Ахборот хизмати раҳбари.