ҲАРБИЙЛАР ВА ЁШЛАР ИШТИРОКИДА ДАВРА СУҲБАТИ ТАШКИЛ ЭТИЛДИ
Қиличбой овулида Давлат хавфсизлик хизмати чегара қўшинларига қарашли ҳарбий қисмларда фаолият олиб бораётган бир гуруҳ ҳарбий хизматчилар ва мактаб ўқувчилари иштирокида “Армия ва халқ якдил” шиори остида ҳарбий-ватанпарварлик тадбири ўтказилди.
26 январь куни овулдаги Маданият марказида давра суҳбати тарзида ўтказилган ушбу тадбирнинг асосий мақсади ўсиб келаётган ёшларни комил инсон сифатида вояга етказиш, уларда она Ватанга садоқат ва муҳаббат ҳиссини шакллантириш, Миллий армиямизга ва қуролли кучлар соҳасига қизиқишини янада орттиришга қаратилди.
Сўзга чиққан ҳарбийлар суҳбат давомида мамлакатимиз ёшлари учун армия жасорат, матонат ва ҳақиқий қаҳрамонлик мактабига айланиб бораётгани алоҳида таъкидланди. Шунингдек, ёшларга Ўзбекистон Қуролли Кучларида сўнгги йилларда олиб борилаётган ислоҳотлар ва уларнинг самаралари, Давлат хавфсизлик хизмати чегара қўшинларига қарашли “Ёш чегарачи” академик-лицейи ҳақида батафсил маълумотлар беришди. Ушбу билим даргоҳига қабул қилиш тартиби, ўқиш жараёни ва ўқувчиларга яратилган имкониятлар, битирувчиларга бериладиган имтиёзлар ҳақида тўхталиб ўтишди. Ватан ҳимояси муқаддас ва шарафли бурч, армия ва ёшлар ҳамиша бирдам, ёшлар Ватан тинчлиги ва осойишталиги учун масъул эканлиги хусусида сўз юритишди.
Таъкидланганидек, бугунги кунда ёшларимизда ёт ғояларга қарши мафкуравий иммунитетни шакллантириш, она юрт тақдири учун масъулият туйғусини мустаҳкамлаш, уларни ўз касбига садоқатли ва ҳар томонлама етук кадрлар этиб тарбиялаш бўйича аниқ чора-тадбирлар кўриб чиқилган. Шу боис таълим муассасалари, меҳнат жамоалари ва маҳаллаларда ёш авлод вакиллари билан ҳарбий-ватанпарварлик йўналишидаги тадбирлар тизимли олиб борилмоқда.
Давра суҳбати давомида интернет нашрлари ва ижтимоий тармоқлардан тўғри фойдаланиш, қимор ўйинлари ва таваккалчиликка асосланган бошқа ўйинларнинг ёмон оқибатлари юзасидан ҳам маърузалар тингланди. Шунингдек, ёш авлодни эзгу қадриятларимизга ҳурмат руҳида тарбиялаш, аждодларимизнинг бой маънавий меросини асраб-авайлаш ҳар бир фуқаронинг асосий бурчига айланиши зарурлиги алоҳида таъкидланди.
Тадбирда ҳарбий хизматчилар давлат томонидан уларнинг оила аъзоларига яратиб берилаётган шарт-шароитлар ҳақида кенг тўхталиб, ижтимоий қўллаб-қувватлаш мақсадида мамлакатимизда ишлаб чиқарилган енгил автотранспорт воситаларини сотиб олиш учун имтиёзли кредитлар берилаётгани, Қуролли кучлар таркибига кирувчи вазирлик ва идораларнинг хизматдаги офицерлари, шартнома бўйича хизмат қилаётган сержантлар ва оддий аскарлар таркиби фарзандлари учун республика олий таълим муассасалари ҳамда ҳарбий олий таълим муассасаларига кириш учун қўшимча қабул квоталари ажратилаётгани хусусида ҳам маълумотлар бериб ўтишди.
Суҳбат жараёнида ёшлар ўртасида интерактив сўровномалар ўтказилиб, ҳарбий соҳада хизмат қилишга нафақат йигитлар, балки кўплаб қизларнинг ишиёқи баланд эканлиги аниқланди. Келажакда ушбу касб эгаси бўлиш истагини билдирган барча ёшларга мутахассислар томонидан кўрсатмалар берилди. Қизғин суҳбатларга бой бўлган тадбирда ёшлар ўзларини қизиқтирган барча саволларга етарли жавоблар олишди.
“Армия ва халқ якдил” шиори остида бўлиб ўтган ушбу ҳарбий-ватанпарварлик тадбири давомида ёшларда она Ватанга муҳаббат ва ҳарбий соҳага қизиқиши янада ортди.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
