Қўмондон ва ёшлар учрашуви ўтказилди

Сўнгги йилларда мамлакатимизда ёшларни ҳарбий-ватанпарварлик руҳида тарбиялашга доир кенг кўламли ислоҳотлар амалга оширилмоқда. Бу борадаги ишлар самарадорлигини янги босқичга олиб чиқиш, мазкур йўналишда давлат ва нодавлат ташкилотлари ҳамда фуқаролик жамиятининг бошқа институтлари фаоллигини янада ошириш, ёшлар онгига ватанпарварлик, мардлик туйғуларини сингдириш мақсадида Ўзбекистон Республикаси Вазирлар Маҳкамасининг “Ёшларни ҳарбий-ватанпарварлик руҳида тарбиялаш ишлари самарадорлигини ошириш чора-тадбирлари тўғрисида” қарори қабул қилинди. Мазкур ҳужжат ёшларни ҳарбий ватанпарварлик руҳида тарбиялаш борасида ишларни янги босқичга олиб чиқишда муҳим дастуруламал бўлиб хизмат қилмоқда.

Жорий йилнинг 30 январь санасида Амударё тумани Маданият бўлими биносида ўтказилган қўмондон ва ёшлар учрашуви ҳам мазкур қарорда белгиланган чора-тадбирларнинг амалдаги ижроси бўлди.

Учрашувда шимоли-ғарбий ҳарбий округ қўшинлари қўмондони генерал майор Фарҳоджон Шерматов, туман ҳокими Собир Хожаметов, секторлар раҳбарлари, ҳоким ўринбосарлари, ёшлар етакчилари ҳамда бир гуруҳ ёшлар иштирок этдилар.

Шу ўринда қайд этиш жоизки, мазкур учрашув давлатимиз раҳбари томонидан жорий йилнинг 12 январь санасида ўтказган йиғилишида белгилаб берган ёшларни ҳарбий ватанпарварлик руҳида тарбиялаш, муддатли ҳарбий хизмат нуфузини ошириш, ёшларда муддатли ҳарбий хизмат қилиш борасидаги билимларни шакллантириш каби устувор вазифаларни амалга оширишга қаратилди.

Учрашувда шимоли-ғарбий ҳарбий округ қўшинлари қўмондони генерал майор Фарҳоджон Шерматов сўзга чиқиб, Ватан ҳимояси, уни асраб-авайлаш, Ватанга хизмат қилиш ҳар бир ўғил-қизнинг Ватан олдидаги фарзандлик бурчи эканлигини таъкидлаб, учрашувда иштирок этаётган йигитларнинг муддатли ҳарбий хизматга бўлган қизиқишларини янада оширди.

Шунингдек, учрашувда туман Фавқулодда вазиятлар бўлими бошлиғи Зафар Аҳмедов, туман Санитария-эпидемиялогик осойишталик ва жамоат саломатлиги маркази бошлиғи Гулмурод Бекиев, Хизр эли маҳалла фуқаролар йиғини ёшлар етакчиси Илёс Эгамовлар сўзга чиқиб, ўзларининг муддатли ҳарбий хизмат давомидаги таассуротлари, билим ва кўникмалари билан бўлишдилар.

Тадбирнинг расмий қисми ниҳоясига етгач, шимоли-ғарбий ҳарбий округ ҳарбий оркестр жамоаси, фахрий қоровул жамоаси ҳамда разведка қўшинлари қўл жанги жамоасининг қўл жангги бўйича кўргазмали чиқишлари, марш садолари остидаги ҳарбий саф юриши, ҳарбий техника ва қурол-аслаҳалар кўргазмаси ҳамда ҳарбий оркестр жамоасининг она Ватан ва Миллий армияни тараннум этувчи куй-қўшиқлари янгради.

Учрашув мобайнида туман ҳокими Собир Хўжаметов сўзга чиқиб, ёшларнинг муддатли ҳарбий хизматга боришлари уларнинг ҳар томонлама ривожланишларида муҳим ўрин тутишини қайд этиб ўтди ҳамда меҳмонларга ўз миннатдорчилигини билдирди.

Учрашув давомида тадбир иштирокчиларининг ҳарбий ва турли соҳадаги мурожаатларига шимоли-ғарбий ҳарбий округ қўмондони ва бошқа тегишли мутахассислар томонидан тўлиқ жавоблар берилди.

Чарос Арслонова, туман ҳокимининг Ахборот хизмати раҳбари.