МАНҒИТ ДЕҲҚОН БОЗОРИ ҲУДУДИДА ЁНҒИН ХАВСИЗЛИГИНИ ТАЪМИНЛАШ ЮЗАСИДАН ТАДБИР БЎЛИБ ЎТДИ
Сўнгги вақтларда мамлакатимизнинг турли ҳудудларида жойлашган бозор мажмуаларида, бозорлар ҳудудларидаги савдо шохобчаларида тез-тез турли кўринишдаги ёнғин ҳолатлари содир бўлаётгани ҳеч кимга сир эмас. Мутахассис ва экспертларнинг хулосаларига кўра, ёнғинлар асосан ёнғин хавфсизлиги қоидаларига эътиборсизлик, электр энергияси жиҳозларидан нотўғри фойдаланиш, кўпчилик ҳолларда ёш болаларнинг қаровсиз қолдирилиши, шунингдек, ёнғин содир бўлган мажмуалар ҳудудидаги кўпчилик савдо шохобчаларида электр энергияси ва табиий газ тармоқларига ноқонуний, тақиқланган жиҳоз ва ускуналар асосида уланиш орқали юз бермоқда.
Халқимиз бекорга ёнғин ҳодисаси билан боғлиқ фожеалар содир бўлганда “ёнғин – тилсиз ёв иборасини яратиб, “ўт – олов балосидан сақласин”, дея илтижоли дуолар қилишмайди. Чунки, ёнғин келтирган зарар, вайронагарчилик, ҳатто айрим ҳолатларда кузатилаётган инсон ҳаётига бўлган таҳдидни ҳеч нарса билан қоплаб бўлмайди. Шу боис, ёнғин хавфсизлиги қоидаларига амал қилиш, юз бериши мумкин бўлган салбий ҳолатларнинг олдини олиш ҳар биримизнинг зиммамиздаги бурчимиздир.
Қорақалпоғистон Республикаси Фавқулодда вазиятлар бошқармасининг тегишли топшириғи ижросини таъминлаш мақсадида Амударё туман Фавқулодда вазиятлар бўлими мутахассислари томонидан амалга оширилаётган чора-тадбирлар режасига кўра, ёнғин хавфсизлиги қоидаларига амал қилиш юзасидан аҳоли кенг қатламларини жалб қилган ҳолда мунтазам равишда ўтказилиб келинаётган тарғибот-ташвиқот ишлари ҳам ўз самарасини бермоқда.
Хусусан, жорий йилнинг 31 январь санасида Амударё тумани Фавқулодда вазиятлар бўлими ходимлари, тегишли соҳа вакиллари, туман электр тармоқлари корхонаси, газ таъминоти корхонаси ходимлари томонидан ҳамкорликда ўтказилган назорат ва тарғибот-ташвиқот тадбирида ҳам Манғит Деҳқон бозори ҳудудидаги савдо шохобчаларининг ёнғинга қарши зарур жиҳоз ва ускуналар билан таъминланганлик даражаси текширувдан ўтказилиб, мавжуд камчиликларни бартараф этиш чоралари кўрилди.
Шунингдек, бозор ҳудудида фаолият олиб борувчи тадбиркорлик субъектлари, бозор расталари оралиғида ёнғин ўчириш автомобилларининг эркин ҳаракатланиши учун шароитларнинг мавжудлиги, ёнғинга қарши сув ҳавзаларининг созлиги кўриб чиқилиб, масъуллар иштирокида алоҳида муҳокама этилди ва ёнғин билан боғлиқ фавқулодда вазиятларнинг олдини олиш ва уларни бартараф этиш бўйича зарур таклифлар, тушунча ва тавсиялар берилди.
Тадбир давомида бозор ҳудудидаги савдо шохобчаларида ёнғинга қарши қалқончалар мавжудлиги, бирламчи ёнғин ўчириш воситалари билан таъминланганлиги, бундан ташқари, бозор ҳудудида эвакуация йўлакларининг созлиги, сунъий тўсиқлар билан тўсиб қўйилмаганлиги алоҳида назоратдан ўтказилиб, бозор ҳудудида ёнғин хавфсизлиги қоидаларига амал қилиш бўйича бозор маъмурияти ва масъул ходимларга керакли тавсиялар, таклифлар билдирилди.
Бўлиб ўтган назорат, тарғибот ва ташвиқот тадбири Манғит Деҳқон бозори мажмуаси ҳудудида фаолият олиб борувчи тадбиркорлар, савдо шохобчалари ишчилари учун ёнғин хавфсизлигини таъминлаш борасидаги зарурий билим ва тушунчаларини бойитгани билан муҳим аҳамият касб этди.
З.Аҳмедов, Амударё тумани ФВБ бошлиғи, капитан.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
