АМУДАРЁДА ҲАРБИЙ ХИЗМАТЧИЛАР ИМТИЁЗЛИ ТАВСИЯНОМА УЧУН ИМТИҲОН ТОПШИРДИЛАР
Маълумки, юртимизда Ўзбекистон Республикаси Қуролли Кучларида муддатли ҳарбий хизматни ўтаётган аскарлар ҳар йили олий таълим муассасаларига ўқишга киришда қўшимча балл берадиган ҳарбий қисм командирининг имтиёзли тавсияномаларини қўлга киритиш учун республика бўйлаб тест синовларидан ўтишади. Шу кунларда Қорақалпоғистон Республикаси ҳудудидаги Давлат хавфсизлик хизмати Чегара қўшинларига қарашли ҳарбий қисмларда хизмат бурчини ўтаётган муддатли ҳарбий хизматчилар ҳам олий таълим муассасаларига ўқишга киришда имтиёз берувчи тавсияномага эга бўлиш учун тест синовларидан ўтиб, имтиҳон топширдилар.
15 февраль куни Амударё муҳандислик техникумида бўлиб ўтган тест синовларида туман ҳудудидаги ҳарбий қисмларда ўз бурчини ўтаётган Ватан ҳимоясидаги йигитлар ўзларининг эгаллаган билим ва кўникмаларини синовдан ўтказдилар.
Имтиҳонга ташриф буюрган аскарлар дастлаб Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлигининг Қорақалпоғистон Республикаси бўлими масъуллари томонидан йўриқнома билан таништирилди. Назоратчилар гувоҳлигида тест топшириқлари китоблари муҳри очилиб, тарқатилганидан сўнг, аскарлар тест саволлари билан танишиб чиқишди ва жавобларни белгилашга киришдилар.
Маълумки, аскарлар йигитлик бурчини бажаришга киришган кундан бошлаб, муддатли ҳарбий хизматчиларга малакали офицер ва сержантлар томонидан жисмоний тайёргарликдан ташқари турли йўналишларда назарий билимлар ҳам мунтазам бериб борилади. Тестда уларнинг ўтган давр мобайнида эгаллаган билимлари синовдан ўтказилади.
Тест синовлари Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги томонидан олинади. Бунда ҳар бир аскарнинг бир йил давомида тўплаган билимлари синовдан ўтказилади. Аскарларнинг билимлари 100та савол асосида баҳоланади. Тест жараёнидан норози томон тест натижалари эълон қилингандан кейин икки кун ичида мурожаат қилиши керак. Белгиланган тартиб-қоидалар бузган иштирокчи тестдан четлаштирилади.
Тест синовлари натижаларига кўра, юқори балл тўплаган, интеллектуал салоҳияти, жанговар маҳорати юксак посбонлар имтиёзли тавсияномаларга сазовор бўлади. Мазкур тавсияномага эга бўлган йигитлар республиканинг барча олий таълим муассасаларига ўқишга киришда ўзи тўплаган балларнинг 50 фоизи миқдорида қўшимча баллни тўплаш имтиёзига эга бўлади. Шунингдек, аскарларнинг хизмати давомида ҳарбий қисмда кўрсатган натижалари, ижобий хулқи ҳам инобатга олиниб, тегишли тавсияномасига муносиблиги белгиланади.
Таъкидлаш жоизки, муддатли ҳарбий хизматни ўтаган ва ҳарбий қисмлар қўмондонлигининг тавсияномасига эга шахслардан иборат абитуриентлар учун олий таълим муассасаларига ўқишга кириш учун ушбу шахслар ўртасида ўтказиладиган танлов асосида алоҳида квоталар ажратиш тартиби белгиланади.
Ўзбекистон Республикаси Қуролли Кучлари сафида муддатли ҳарбий хизматни ўтаб бўлган фуқароларга ҳарбий қисмлар қўмондонлиги томонидан олий таълим муассасаларига ўқишга кириш учун берилган имтиёзли тавсияномалар, улар берилган санадан бошлаб, уч йил мобайнида амал қилади.
Келажакда олий ўқув юртларида таҳсил олиб, ўзлари танлаган касб эгаси бўлишни мақсад қилган ҳарбий хизматчилар тест синовларини аъло даражада уддалашга ҳаракат қилиб, муваффақиятли якунладилар.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
