AMUDARYoDA HARBIY XIZMATChILAR IMTIYoZLI TAVSIYaNOMA UChUN IMTIHON TOPShIRDILAR

Maʼlumki, yurtimizda Oʻzbekiston Respublikasi Qurolli Kuchlarida muddatli harbiy xizmatni oʻtayotgan askarlar har yili oliy taʼlim muassasalariga oʻqishga kirishda qoʻshimcha ball beradigan harbiy qism komandirining imtiyozli tavsiyanomalarini qoʻlga kiritish uchun respublika boʻylab test sinovlaridan oʻtishadi. Shu kunlarda Qoraqalpogʻiston Respublikasi hududidagi Davlat xavfsizlik xizmati Chegara qoʻshinlariga qarashli harbiy qismlarda xizmat burchini oʻtayotgan muddatli harbiy xizmatchilar ham oliy taʼlim muassasalariga oʻqishga kirishda imtiyoz beruvchi tavsiyanomaga ega boʻlish uchun test sinovlaridan oʻtib, imtihon topshirdilar.

15-fevral kuni Amudaryo muhandislik texnikumida boʻlib oʻtgan test sinovlarida tuman hududidagi harbiy qismlarda oʻz burchini oʻtayotgan Vatan himoyasidagi yigitlar oʻzlarining egallagan bilim va koʻnikmalarini sinovdan oʻtkazdilar.

Imtihonga tashrif buyurgan askarlar dastlab Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligining Qoraqalpogʻiston Respublikasi boʻlimi masʼullari tomonidan yoʻriqnoma bilan tanishtirildi. Nazoratchilar guvohligida test topshiriqlari kitoblari muhri ochilib, tarqatilganidan soʻng, askarlar test savollari bilan tanishib chiqishdi va javoblarni belgilashga kirishdilar.

Maʼlumki, askarlar yigitlik burchini bajarishga kirishgan kundan boshlab, muddatli harbiy xizmatchilarga malakali ofitser va serjantlar tomonidan jismoniy tayyorgarlikdan tashqari turli yoʻnalishlarda nazariy bilimlar ham muntazam berib boriladi. Testda ularning oʻtgan davr mobaynida egallagan bilimlari sinovdan oʻtkaziladi.

Test sinovlari Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligi tomonidan olinadi. Bunda har bir askarning bir yil davomida toʻplagan bilimlari sinovdan oʻtkaziladi. Askarlarning bilimlari 100ta savol asosida baholanadi. Test jarayonidan norozi tomon test natijalari eʼlon qilingandan keyin ikki kun ichida murojaat qilishi kerak. Belgilangan tartib-qoidalar buzgan ishtirokchi testdan chetlashtiriladi.

Test sinovlari natijalariga koʻra, yuqori ball toʻplagan, intellektual salohiyati, jangovar mahorati yuksak posbonlar imtiyozli tavsiyanomalarga sazovor boʻladi. Mazkur tavsiyanomaga ega boʻlgan yigitlar respublikaning barcha oliy taʼlim muassasalariga oʻqishga kirishda oʻzi toʻplagan ballarning 50 foizi miqdorida qoʻshimcha ballni toʻplash imtiyoziga ega boʻladi. Shuningdek, askarlarning xizmati davomida harbiy qismda koʻrsatgan natijalari, ijobiy xulqi ham inobatga olinib, tegishli tavsiyanomasiga munosibligi belgilanadi.

Taʼkidlash joizki, muddatli harbiy xizmatni oʻtagan va harbiy qismlar qoʻmondonligining tavsiyanomasiga ega shaxslardan iborat abituriyentlar uchun oliy taʼlim muassasalariga oʻqishga kirish uchun ushbu shaxslar oʻrtasida oʻtkaziladigan tanlov asosida alohida kvotalar ajratish tartibi belgilanadi.

Oʻzbekiston Respublikasi Qurolli Kuchlari safida muddatli harbiy xizmatni oʻtab boʻlgan fuqarolarga harbiy qismlar qoʻmondonligi tomonidan oliy taʼlim muassasalariga oʻqishga kirish uchun berilgan imtiyozli tavsiyanomalar, ular berilgan sanadan boshlab, uch yil mobaynida amal qiladi.

Kelajakda oliy oʻquv yurtlarida tahsil olib, oʻzlari tanlagan kasb egasi boʻlishni maqsad qilgan harbiy xizmatchilar test sinovlarini aʼlo darajada uddalashga harakat qilib, muvaffaqiyatli yakunladilar.

O.Xudoyberganova.