ДАРЁБЎЙИ МАҲАЛЛАСИДА ЯНГИ “ЛАЙЛО” ОИЛАВИЙ МТТ ИШ БОШЛАДИ

Амударё туманининг Дарёбўйи маҳалласи ҳудудидаги Амударё МТПга қарашли бино кимошди савдосига қўйиладиган бўлди. Қишлоқда ҳар қандай хабар шаҳардагига қараганда яшин тезлигида тарқалади. Чунки қишлоқда ҳамма бир-бирини яхши танийди, биров-бировга бегона эмас. Тадбиркор Элдорбек Қодиров ҳам бу хабарни энг биринчилардан бўлиб эшитди-ю, кўнглида узоқ вақтдан бери ўйлаб юрган режаси – оилавий мактабгача таълим ташкилоти фаолиятини йўлга қўйиш ҳақида ўйлаб қолди. Оила аъзолари билан ўйлашиб, кимошди савдосига қўйилаётган МТП биносининг ҳолатини бориб кўрди. Жиддий таъмирталаб ҳолатдаги бинони болалар таълим-тарбияси учун муносиб ҳолатга келтириш учун анчагина маблағ зарурлигини билиб турса-да, эзгу ниятидан қайтмади, керакли ҳужжатларини тахт қилиб қўйди ва кимошди савдосида иштирок этиб, ғолиб бўлди.

Шу кундан бошлаб Элдорбек Қодиров бино атрофини ободонлаштириш, жорий таъмирлаш ишларини бошлаб юборди. Қаровсизликдан сувоқлари кўчиб, намлик туфайли эшик ва дераза ромлари яроқсиз ҳолатга келиб қолган бино таъмири учун 400 млн. сўм ўз маблағини ажратган тадбиркор то бинода сўнгги пардозлаш ишлари битгунга қадар қурувчи-усталарга кўмакдош бўлди. Барча қурилиш-таъмирлаш ишлари ниҳоясига етказилгач, тадбиркор бино ичкарисидаги хоналарни замонавий мебеллар билан жиҳозлади. Болалар ички ўйинхонаси, ётоқхона, ҳатто ювиниш хонаси ва ошхона жиҳозларигача болалар психологияси, уларнинг ўзига хос дунёсига мос жиҳозлар билан жиҳозланишига эътибор қаратди.

Жорий йилнинг 10 февраль санасида тадбиркор Элдорбек Қодировнинг эзгу нияти амалга ошди ва 50 ўринли “Лайло” оилавий нодавлат мактабгача таълим ташкилоти Дарё бўйи маҳалласи болажонларини ўз бағрига олди.

Оилавий нодавлат МТТнинг очилиш маросимида Амударё туман ҳокимининг ўринбосари Нодир Камолов, туман ММТБ мудири Ялғош Шомуродов ҳамда Дарёбўйи МФЙ масъуллари иштирок этишди. Маросимда сўзга чиққан туман ММТБ бўлими мудири Ялғош Шомуродов тадбиркор Элдорбек Қодировга ёш авлод таълим-тарбияси йўлидаги шарафли ва хайрли ишларида омад тилади.

Барча шароитларга эга “Лайло” оилавий нодавлат мактабгача таълим ташкилоти фойдаланишга топширилиши муносабати билан 6 нафар фуқаронинг доимий иш билан бандлиги таъминланди.

Фарзандларимиз камолоти йўлидаги ҳар қандай иш эзгу ва хайрлидир. Тадбиркор Элдорбек Қодировнинг саъй-ҳаракатлари туфайли Дарёбўйи маҳалласининг турли ташкилот ва корхоналарда ишловчи ёш оналари,шунингдек, фарзандларини замонавий мактабгача таълим ташкилотига беришни хоҳловчи уй бекалари ва ёш оилалари учун айни муддао бўлди. Мазкур оилавий мактабгача таълим ташкилотида болажонларнинг мактабгача таълими ва тарбияси учун барча зарур шарт-шароитлар мавжуд. Тарбияланувчилар турфа ўйинчоқлар уларнинг фикрлаш, нутқий қобилиятларини ривожлантиришга қаратилган қизиқарли машғулотлар билан қамраб олинган.

- Халқимизнинг ўз ҳаётидан рози яшашларига кўмаклашиш бурчимиз, - дейди Элдорбек Қодиров. – Элдошларимга озми-кўпми , нафим тегаётганидан хурсандман.

Айни пайтда Дарёбўйи маҳаллалик болажонларни ўз бағрига олган оилавий мактабгача таълим ташкилоти фаолиятидан ота-оналар ҳам мамнун.

Робия ЙЎЛДОШЕВА.