DARYoBOʻYI MAHALLASIDA YaNGI “LAYLO” OILAVIY MTT ISh BOShLADI

Amudaryo tumanining Daryoboʻyi mahallasi hududidagi Amudaryo MTPga qarashli bino kimoshdi savdosiga qoʻyiladigan boʻldi. Qishloqda har qanday xabar shahardagiga qaraganda yashin tezligida tarqaladi. Chunki qishloqda hamma bir-birini yaxshi taniydi, birov-birovga begona emas. Tadbirkor Eldorbek Qodirov ham bu xabarni eng birinchilardan boʻlib eshitdi-yu, koʻnglida uzoq vaqtdan beri oʻylab yurgan rejasi – oilaviy maktabgacha taʼlim tashkiloti faoliyatini yoʻlga qoʻyish haqida oʻylab qoldi. Oila aʼzolari bilan oʻylashib, kimoshdi savdosiga qoʻyilayotgan MTP binosining holatini borib koʻrdi. Jiddiy taʼmirtalab holatdagi binoni bolalar taʼlim-tarbiyasi uchun munosib holatga keltirish uchun anchagina mablagʻ zarurligini bilib tursa-da, ezgu niyatidan qaytmadi, kerakli hujjatlarini taxt qilib qoʻydi va kimoshdi savdosida ishtirok etib, gʻolib boʻldi.

Shu kundan boshlab Eldorbek Qodirov bino atrofini obodonlashtirish, joriy taʼmirlash ishlarini boshlab yubordi. Qarovsizlikdan suvoqlari koʻchib, namlik tufayli eshik va deraza romlari yaroqsiz holatga kelib qolgan bino taʼmiri uchun 400 mln. soʻm oʻz mablagʻini ajratgan tadbirkor to binoda soʻnggi pardozlash ishlari bitgunga qadar quruvchi-ustalarga koʻmakdosh boʻldi. Barcha qurilish-taʼmirlash ishlari nihoyasiga yetkazilgach, tadbirkor bino ichkarisidagi xonalarni zamonaviy mebellar bilan jihozladi. Bolalar ichki oʻyinxonasi, yotoqxona, hatto yuvinish xonasi va oshxona jihozlarigacha bolalar psixologiyasi, ularning oʻziga xos dunyosiga mos jihozlar bilan jihozlanishiga eʼtibor qaratdi.

Joriy yilning 10-fevral sanasida tadbirkor Eldorbek Qodirovning ezgu niyati amalga oshdi va 50-oʻrinli “Laylo” oilaviy nodavlat maktabgacha taʼlim tashkiloti Daryo boʻyi mahallasi bolajonlarini oʻz bagʻriga oldi.

Oilaviy nodavlat MTTning ochilish marosimida Amudaryo tuman hokimining oʻrinbosari Nodir Kamolov, tuman MMTB mudiri Yalgʻosh Shomurodov hamda Daryoboʻyi MFY masʼullari ishtirok etishdi. Marosimda soʻzga chiqqan tuman MMTB boʻlimi mudiri Yalgʻosh Shomurodov tadbirkor Eldorbek Qodirovga yosh avlod taʼlim-tarbiyasi yoʻlidagi sharafli va xayrli ishlarida omad tiladi.

Barcha sharoitlarga ega “Laylo” oilaviy nodavlat maktabgacha taʼlim tashkiloti foydalanishga topshirilishi munosabati bilan 6 nafar fuqaroning doimiy ish bilan bandligi taʼminlandi.

Farzandlarimiz kamoloti yoʻlidagi har qanday ish ezgu va xayrlidir. Tadbirkor Eldorbek Qodirovning saʼy-harakatlari tufayli Daryoboʻyi mahallasining turli tashkilot va korxonalarda ishlovchi yosh onalari,shuningdek, farzandlarini zamonaviy maktabgacha taʼlim tashkilotiga berishni xohlovchi uy bekalari va yosh oilalari uchun ayni muddao boʻldi. Mazkur oilaviy maktabgacha taʼlim tashkilotida bolajonlarning maktabgacha taʼlimi va tarbiyasi uchun barcha zarur shart-sharoitlar mavjud. Tarbiyalanuvchilar turfa oʻyinchoqlar ularning fikrlash, nutqiy qobiliyatlarini rivojlantirishga qaratilgan qiziqarli mashgʻulotlar bilan qamrab olingan.

- Xalqimizning oʻz hayotidan rozi yashashlariga koʻmaklashish burchimiz, - deydi Eldorbek Qodirov. – Eldoshlarimga ozmi-koʻpmi , nafim tegayotganidan xursandman.

Ayni paytda Daryoboʻyi mahallalik bolajonlarni oʻz bagʻriga olgan oilaviy maktabgacha taʼlim tashkiloti faoliyatidan ota-onalar ham mamnun.

Robiya YOʻLDOShEVA.