ҚУТУРИШ КАСАЛЛИГИНИНГ ОЛДИНИ ОЛИШ ЮЗАСИДАН ТУМАН ФАВҚУЛОДДА ВАЗИЯТЛАР БЎЛИМИ ТОМОНИДАН МАХСУС ТАКТИК-ЎҚУВ МАШҚИ ТАШКИЛ ЭТИЛДИ

Жорий йилнинг 20 февраль куни Амударё тумани ҳокими – Фуқаро муҳофазаси бошлиғининг тегишли қарори асосида туманнинг Олмазор маҳалласида махсус тактик-ўқув машқи ўтказилди.

Ушбу махсус тактик-ўқув машқига 4та шахсий таркиб ва 4та техника жалб қилинди. Унда ҳудудда қутуриш касаллиги бўйича фавқулодда вазият содир бўлганда туман Фавқулодда вазиятларнинг олдини олиш ва уларни бартараф этиш давлат қуйи тизимининг ҳамкорликдаги ҳаракатлари амалий тарзда кўрсатиб берилди.

Махсус-тактик ўқув машқи 2та босқичда ўтказилди. Биринчи босқичда Олмазор маҳалласи ҳудудидаги марказий ўйингоҳ олдида тегишли Фавқулодда вазиятлар давлат қуйи тизими таркибидаги хизматчилар ва куч-воситаларнинг шайлиги кўрикдан ўтказилди. Сўнгра соҳа ходимлари томонидан ўз функционал вазифаларидан келиб чиққан ҳолда амалга оширилиши лозим бўлган тадбирларга аниқлик киритиб олинди.

Махсус тактик-ўқув машқнинг иккинчи босқичида кўргазмали ва амалий ўқув-семинари тарзида ўтказилди.

Амалий ўқув-семинарда туман Фавқулодда вазиятлар бўлими тезкор бўлинмаси бошлиғи, капитан Ахан Утебаев аҳоли ўртасида қутуриш касаллигининг тарқалиши билан боғлиқ фавқулодда вазиятлар юзага келиши хавфи, уларнинг олдини олиш ва бартараф этишда Фавқулодда вазиятлар давлат қуйи тизимининг аҳамияти тўғрисида маъруза қилди.

Шундан сўнг, туман Санитария-эпидемиологик осойишталик ва жамоат саломатлиги бўлими эпидемиология ва иммунопрофилактика бўлими мудири Гулшод Тажибоева Амударё тумани ҳудудида қутуриш касаллигининг эпидемиологияси, этиологияси ҳамда бу борада олиб борилаётган профилактик тадбирлар тўғрисида маълумот берди.

Семинар давомида туман Тиббиёт бирлашмасининг юқумли касалликлар бўлими шифокори Фарҳод Қўшмановнинг “Қутуриш касаллиги патогенези, клиникаси, даволаш ва профилактика усуллари” тўғрисидаги, туман Ветеринария ва чорвачиликни ривожлантириш бўлими бошлиғи Алишер Маткаримовнинг “Амударё тумани ҳудудида қутуриш касаллиги бўйича мавжуд эпизоотик вазият ҳамда унинг олдини олиш борасида олиб борилаётган эпизоотияга қарши тадбирлар” тўғрисидаги маърузалари ҳам тингланди. Маърузачилар қутуриш касаллиги тарқалишининг олдини олиш борасидаги чора-тадбирлар ҳақида кенг тўхталиб, керакли тавсияларни бериб ўтдилар.

Тадбир давомида Олмазор маҳалласи ҳудудидаги Исломобод кўчасида жойлашган 16-уйда кўргазмали машқ ўтказилди. Унда қутуриш касаллигига гумон қилинган бемор аниқланганда Фавқулодда вазиятлар давлат қуйи тизими хизматларининг ҳаракатлари амалий равишда кўрсатиб берилди.

Қутуриш – ҳайвонлар ва одамларда учрайдиган, асаб тизимининг оғир шикастланиши билан кечадиган ҳамда ўлим билан якун топадиган ўта ҳавфли юқумли вирусли касалликдир. Қутурган уй ҳайвонлари – ит, мушук, сигир, от, эшак, чўчқа, ёввойи ҳайвонлардан чиябўри, тулки ва бошқалар одамлар учун касаллик манбаи бўлиб ҳисобланади. Одамларга қутуриш касаллиги 90-95 фоиз ҳолатларда итлардан юқади. Яъни, шу касалликка чалинган ҳайвонларнинг тишлаши, тирнаши, тишларининг қадалиши, шунингдек, жароҳатланган тери ва шиллиқ қаватларига сўлаги тушиши натижасида юқади.

Маҳалла аҳолиси ўртасида ўтказилган тушунтириш-тарғибот учрашувида таъкидланганидек, жаҳон соғликни сақлаш ташкилотининг маълумотига кўра, дунёда ҳар йили 40 мингдан 70 минг нафаргача одам, 1-2 млн.дан ортиқ ҳайвонлар қутуриш касаллиги билан касалланади.

Қутуриш касаллиги билан касалланган беморларда тишлаган жойи қичийди, тортишиб увишади, бемор тушкунликка тушади, одамлар билан мулоқотдан қочади. Уйқуси бузилиб, иштаҳаси йўқолади, унда қурқув ҳисси пайдо бўлади. Нафас олиши қийинлашади, сувдан, шамолдан, ёруғликдан, товушдан қўрқади. Беморнинг уйқуси бузилиб, ўзини-ўзи тишлайди, эс-ҳуши кирди-чиқди бўлиб қолади, кейинчалик беморнинг кўзига йўқ нарсалар кўринади, у алаҳсирайди. Тана ҳарорати кўтарилади, мускулларида фалажлик пайдо бўлиб, бемор юрак-томир фаолияти етишмаслиги ёки нафас марказининг фалажи оқибатида вафот этади.

Тадбир якунида масъуллар қутуриш касаллиги ҳақида батафсил маълумотлар бериб, ит ёки бошқа ҳайвонлар тишлаганда ва тирнаганда зудлик билан тиббий ёрдамга мурожаат қилиш зарурлигини таъкидладилар.

Д.БАБАЖАНОВ, Амударё туман СЭО ва ЖСБ эпидемиолог врачи.