“ЭНГ НАМУНАЛИ МАҲАЛЛА РАИСИ” ТАНЛОВИНИНГ АМУДАРЁ ТУМАНИ БОСҚИЧИ ҒОЛИБЛАРИ АНИҚЛАНДИ

Ўзбекистон Республикаси Президентиниң 2023 йил 21 декабрдаги “Ўзбекистон маҳаллалари уюшмаси фаолиятини йўлга қўйиш ва маҳаллаларда бошқарув тизимини такомиллаштиришга оид қўшимча чора-тадбирлар тўғрисида”ги Қарори билан тасдиқланган “Йўл харитаси” ҳамда Қорақалпоғистон Республикаси маҳаллани қўллаб-қувватлаш Кенгашининг 2024 йил 12 февралдаги баёнига мувофиқ, Амударё туманида жорий йилнинг 19-25 февраль кунлари “Энг намунали маҳалла раиси” Республика танловининг сектор босқичи ўтказилиб, унда тўртта сектор ҳудудидаги овул ва маҳалла фуқаролар йиғинлари раислари иштирок қилдилар.

Сектор босқичида ғолибликни қўлга киритган овул ва маҳалла фуқаролар йиғинлари раислари кўрик-танловнинг туман босқичида ўзаро куч синашдилар.

“Энг намунали маҳалла” кўрик-танлови Низоми талабларига кўра, ҳар бир овул ва маҳалла фуқаролар йиғини раиси раҳбарлигида амалга оширилаётган ишларнинг натижадорлигига, айниқса инфратузилмаларининг ривожланишига алоҳида эътибор қаратилди.

Кўрик-танловининг Амударё тумани босқичи жорий йилнинг 28 февраль санасида тумандаги 82-сонли умумтаълим мактаби фаоллар залида бўлиб ўтди. Танловда сектор босқичида 1-, 2-, 3-ўринларни эгаллаган жами 12та маҳалла ва овул фуқаролар йиғинлари раислари иштирок этдилар ва белгиланган Низом талабларига кўра, танлов очиқлик ва шаффофлик асосида амалга оширилди.

Кўрик-танловда овул ва маҳалла фуқаролар йиғинларининг Кенгашлари, жамоатчилик тузилмалари, ҳудудларда амалга оширилаётган маънавий-маърифий тадбирлар, халқни ижитмоий ҳимоялашга қаратилган чора-тадбирлар ва бу чора-тадбирларнинг аҳоли ҳаётида тутган ўрни, ёшлар бандлигини таъминлаш, уларнинг бўш вақтларини мазмунли ўтказиш борасидаги амалий ишларнинг натижадорлигига алоҳида эътибор қаратилди.

Кўрик-танлов якунида аҳоли пунктларида олиб борилган ободонлаштириш ва кўкаламзорлаштириш ишларини, юқори савияда олиб борган айниқса, ўзлари яшаб турган ҳудудни боғ-роғларга айлантириш, ёшлар ўртасида жиноятчилик ва ҳуқуқбузарлик ҳолатларини кескин камайтиришга эришган, ёш оилалар ўртасидаги келишмовчиликлар, ажрашиш ҳолатлари содир бўлмаган овул ва маҳалла фуқаролар йиғинлари раислари ғолиб бўлдилар. Унга кўра, кўрик-танловнинг Низоми талабларига тўла мос келадиган Хитой овул фуқаролар йиғини раиси Давлатбой Отажонов фахрли 1-ўринни эгаллади.

Ўзи раҳбарлик қилаётган маҳалла фуқаролар йиғини ҳудудида хотиржам ва осойишта турмуш тарзини яратган, шунингдек, аҳолини ижтимоий ҳимоя қилишни замон талаблари даражасида амалга ошираётган, аҳоли муаммолари билан ишлашда ўзига хос тажрибага эга деб топилган Ўзбекистон МФЙ раиси Акбаржон Болтабоев фахрли 2-ўрин соҳиби бўлди.

Амалга ошираётган ишлари кўрик-танловнинг барча шартларига тўла жавоб берадиган, расмий ҳужжатлар, ариза ва шикоятлар бўйича ўзига хос тажрибага эга деб топилган Чойкул овул фуқаролар йиғинининг раиси Бегзод Айтеков 3-ўринга лойиқ кўрилди.

Кўрик-танлов якунида фуқаролар йиғинларининг ғолиб раислари ташкилотчилар томонидан муносиб рағбатлантирилдилар.

Хитой овул фуқаролар йиғини раиси Давлатбой Отажоновга кўрик-танловнинг Қорақалпоғистон Республикаси босқичига йўлланма берилди.

Робия ЙЎЛДОШЕВА.