НУРОНИЙЛАР ВА ЭҲТИЁЖМАНД ОИЛАЛАР УЧУН ИФТОРЛИК ТАШКИЛ ЭТИЛДИ
Эзгулик, саховат, меҳр-оқибат ва шукроналик тимсоли бўлган муборак Рамазон ойида кишиларнинг кўнглини кўтариш, уларга ҳурмат ва эҳтиром кўрсатиш азалий қадриятларимиздан биридир. Шундай қутлуғ кунларда юртимизнинг барча ҳудудларида рўзадорлар учун ифторликлар ташкил этилиб, хайр-саховат тадбирлари ўтказилмоқда.
Амударёда ҳам туман ҳокимлиги томонидан ифторлик дастурхони ёзилиб, элдаги ёши улуғлар, меҳнат фахрийлари, ижтимоий кўмакка муҳтож аҳоли, рўзадорлар таклиф этилди. “Нурота” кафесида бўлиб ўтган ушбу тадбирда “Ҳожи Эшон бобо” масжиди имом-хатиби Ражаббой Ҳабибуллаев, “Бобо Рустам бобо” жомъе масжиди имом хатиби Ҳайитбой Айтековлар қатнашишди.
Ифторлик тадбирида тумандаги “Ҳожи Эшон бобо” масжиди имом-хатиби Ражаббой Ҳабибуллаев маъруза қилиб, ушбу фазилатли ойда амалга ошириладиган савобли ишлар хусусида кенг тўхталди. Шу кунларда кам таъминланган, ижтимоий ҳимояга муҳтож кишиларга хайр-саховат кўрсатиш, ногиронлар, беморлар, ёлғиз инсонлар ҳамда нуронийлар ҳолидан хабар олишдек эзгу амаллар кўпроқ бажарилаётганини айтиб, уларнинг савоби ҳақида сўзлади.
Бундай хайрли тадбирларнинг ташкил этилиши Рамазон ойининг мазмун-моҳиятида мужассам бўлган одамийлик, инсон шаънини улуғлаш, яхшилик ва саховат, тинч ва осойишта ҳаётни қадрлаш, оила ва маҳаллаларда меҳр-оқибат, ўзаро ҳурмат муҳитини мустаҳкамлаш каби эзгу фазилатларни ўзида намоён этади.
Таъкидланганидек, муқаддас ислом динининг асосий улуғ рукнларидан бири Рамазон ойидаги рўза ибодатидир. Аллоҳ таоло бандалари учун ҳар икки дунё саодатини кўзлаб, бу ибодатни исломнинг улуғ фарзлари қаторига қўшган. Рўза нафақат Муҳаммад саллолоҳу алайҳи васалламнинг умматларига, балки аввалги пайғамбарларнинг умматларига ҳам буюрилган. Рамазон рўзаси Ҳазрати Пайғамбаримиз Муҳаммад саллолоҳу алайҳи васаллам Мадинага ҳижрат қилганларидан сўнг, ҳижратнинг иккинчи йили шаъбон ойида фарз қилинган. Рамазон очлик, ташналик, нафсни қийнаш билан Аллоҳ таолога қурбат, тақво ҳосил қилинадиган буюк ойдир.
“Ҳожи Эшон бобо” масжиди имом-хатиби Ражаббой Ҳабибуллаев бу муборак ойда қилинган хайрли, савобли ишларга бошқа ойлардагидан кўпроқ ажру-савоблар берилишини айтиб, шу кунларда илм-маърифатни бойитиш билан шуғулланиш ҳамда ёрдамга муҳтож инсонларга хайру-эҳсон қилишни кўпайтириш фазилатли ишлардан ҳисобланишини таъкидлаб ўтди.
Рамазон ойи рўзасини тутиш Қуръони карим, Суннати набавий ва Ижмои уммат билан собит бўлган. Расулуллоҳ саллолоҳу алайҳи васаллам, у зотнинг саҳобалари, тобеинлар ва солиҳ инсонлар Рамазон ойига катта эътибор беришган, бу ой келганида ниҳоятда хурсанд бўлишган. Бу ойда ҳар қачонгидан сахийлик ва олийҳимматлилик кўрсатиб, фақир ва мискин одамларга садақа, эҳсон, таом улашишган, рўзадорларга ифторликлар уюштиришган.
Ифторлик дастурхони атрофида мамлакатимиздаги ўзгаришлар, бунёдкорликлар, халқимиз фаровонлигини таъминлаш йўлида кўрсатилаётган ғамхўрликлар тилга олинди. Шунингдек, сўнгги йилларда турли соҳаларда амалга оширилаётган кенг кўламли ислоҳотлар, миллий қадрият ва анъаналаримизнинг ёш авлод тарбиясидаги ўрни, аҳамияти сингари мавзуларда ҳам дилдан суҳбатлашилди.
Тадбир сўнгида кексалар дуога қўл очиб, юртимизга тинчлик, халқимизга фаровон ҳаёт, эзгу ва хайрли ишларга бардавомлик, ҳар бир хонадонга файз-у барокат тилашди ҳамда кўрсатилган ҳурмат-эҳтиром учун масъулларга миннатдорлик билдиришди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
