NURONIYLAR VA EHTIYoJMAND OILALAR UChUN IFTORLIK TAShKIL ETILDI
Ezgulik, saxovat, mehr-oqibat va shukronalik timsoli boʻlgan muborak Ramazon oyida kishilarning koʻnglini koʻtarish, ularga hurmat va ehtirom koʻrsatish azaliy qadriyatlarimizdan biridir. Shunday qutlugʻ kunlarda yurtimizning barcha hududlarida roʻzadorlar uchun iftorliklar tashkil etilib, xayr-saxovat tadbirlari oʻtkazilmoqda.
Amudaryoda ham tuman hokimligi tomonidan iftorlik dasturxoni yozilib, eldagi yoshi ulugʻlar, mehnat faxriylari, ijtimoiy koʻmakka muhtoj aholi, roʻzadorlar taklif etildi. “Nurota” kafesida boʻlib oʻtgan ushbu tadbirda “Hoji Eshon bobo” masjidi imom-xatibi Rajabboy Habibullayev, “Bobo Rustam bobo” jomʼe masjidi imom xatibi Hayitboy Aytekovlar qatnashishdi.
Iftorlik tadbirida tumandagi “Hoji Eshon bobo” masjidi imom-xatibi Rajabboy Habibullayev maʼruza qilib, ushbu fazilatli oyda amalga oshiriladigan savobli ishlar xususida keng toʻxtaldi. Shu kunlarda kam taʼminlangan, ijtimoiy himoyaga muhtoj kishilarga xayr-saxovat koʻrsatish, nogironlar, bemorlar, yolgʻiz insonlar hamda nuroniylar holidan xabar olishdek ezgu amallar koʻproq bajarilayotganini aytib, ularning savobi haqida soʻzladi.
Bunday xayrli tadbirlarning tashkil etilishi Ramazon oyining mazmun-mohiyatida mujassam boʻlgan odamiylik, inson shaʼnini ulugʻlash, yaxshilik va saxovat, tinch va osoyishta hayotni qadrlash, oila va mahallalarda mehr-oqibat, oʻzaro hurmat muhitini mustahkamlash kabi ezgu fazilatlarni oʻzida namoyon etadi.
Taʼkidlanganidek, muqaddas islom dinining asosiy ulugʻ ruknlaridan biri Ramazon oyidagi roʻza ibodatidir. Alloh taolo bandalari uchun har ikki dunyo saodatini koʻzlab, bu ibodatni islomning ulugʻ farzlari qatoriga qoʻshgan. Roʻza nafaqat Muhammad sallolohu alayhi vasallamning ummatlariga, balki avvalgi paygʻambarlarning ummatlariga ham buyurilgan. Ramazon roʻzasi Hazrati Paygʻambarimiz Muhammad sallolohu alayhi vasallam Madinaga hijrat qilganlaridan soʻng, hijratning ikkinchi yili shaʼbon oyida farz qilingan. Ramazon ochlik, tashnalik, nafsni qiynash bilan Alloh taologa qurbat, taqvo hosil qilinadigan buyuk oydir.
“Hoji Eshon bobo” masjidi imom-xatibi Rajabboy Habibullayev bu muborak oyda qilingan xayrli, savobli ishlarga boshqa oylardagidan koʻproq ajru-savoblar berilishini aytib, shu kunlarda ilm-maʼrifatni boyitish bilan shugʻullanish hamda yordamga muhtoj insonlarga xayru-ehson qilishni koʻpaytirish fazilatli ishlardan hisoblanishini taʼkidlab oʻtdi.
Ramazon oyi roʻzasini tutish Qurʼoni karim, Sunnati nabaviy va Ijmoi ummat bilan sobit boʻlgan. Rasululloh sallolohu alayhi vasallam, u zotning sahobalari, tobeinlar va solih insonlar Ramazon oyiga katta eʼtibor berishgan, bu oy kelganida nihoyatda xursand boʻlishgan. Bu oyda har qachongidan saxiylik va oliyhimmatlilik koʻrsatib, faqir va miskin odamlarga sadaqa, ehson, taom ulashishgan, roʻzadorlarga iftorliklar uyushtirishgan.
Iftorlik dasturxoni atrofida mamlakatimizdagi oʻzgarishlar, bunyodkorliklar, xalqimiz farovonligini taʼminlash yoʻlida koʻrsatilayotgan gʻamxoʻrliklar tilga olindi. Shuningdek, soʻnggi yillarda turli sohalarda amalga oshirilayotgan keng koʻlamli islohotlar, milliy qadriyat va anʼanalarimizning yosh avlod tarbiyasidagi oʻrni, ahamiyati singari mavzularda ham dildan suhbatlashildi.
Tadbir soʻngida keksalar duoga qoʻl ochib, yurtimizga tinchlik, xalqimizga farovon hayot, ezgu va xayrli ishlarga bardavomlik, har bir xonadonga fayz-u barokat tilashdi hamda koʻrsatilgan hurmat-ehtirom uchun masʼullarga minnatdorlik bildirishdi.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
