Вазир ўринбосари ва ёшлар учрашуви бўлиб ўтди

30 январь куни Қорақалпоғистон Республикаси Ички ишлар вазири ўринбосари, подполковник Ғуломжон Эшимбетов Амударё тумани 3-сектор ҳудудида яшовчи ёшлар билан учрашди. Учрашув доирасида ёшларни ватанпарварлик руҳида тарбиялаш мақсадида спорт мусобақалар ва кўнгилочар тадбирлар ўрказилди. Шунингдек, ёшлар муамоларини ўрганиш ва уларни ҳал этишга амалий ёрдам бериш мақсадида вазир ўринбосарининг сайёр қабули ташкил этилди.

Учрашув доирасидаги тадбирларда туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодир Камолов, Ёшлар ишлари агентлиги туман бўлими бошлиғи Сардор Исмоилов, 3-сектор ҳудудидаги ёшлар етакчилари, корхона-ташкилотлари масъуллари иштирок этдилар.

Учрашувда вазир ўринбосари Ғуломжон Эшимбетов сўзга чиқиб, давлатимиз раҳбари томонидан ёшлар сиёсати борасида устувор ислоҳотлар олиб борилётганини алоҳида таъкидлаб, айниқса, қорақалпоғистонлик ёшларни ҳар томонлама қўллаб-қувватлашга алоҳида эътибор қаратаётгани хусусида сўз юритди.

Шу ўринда қайд этиш жоизки, муҳтарам президентимизнинг 2022 йил 31 август санасида имзоланган “Қорақалпоғистон Республикасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги фармони билан қорақалпоғистонлик ёшлар учун олий таълим муассасаларига киришга давлат гранти ва тўлов-контракт асосида қўшимча квота ажратилиши натижасида 3 мингдан ортиқ ёшларимиз олий таълим муассасаларида талаба бўлиш бахтига муяссар бўлдилар.

Шунингдек, давлатимиз раҳбари томонидан жорий йил давомида тўрт миллион нафар ёшлар билан алоҳида ишлаш, уларни ватанпарварлик, жамият ҳаётига даҳлдорлик ва қонунни ҳурмат қилиш каби юксак туйғулар асосида тарбиялаш, касб-ҳунарга ўргатиш, иш билан таъминлаш юзасидан илгари сурган вазифаларни амалга ошириш мақсадида тизимли ишлар йўлга қўйилмоқда.

Хусусан, маҳаллаларда ёшлар масалаларини мувофиқлаштириш мақсадида Амударё тумани 3-сектор ҳудудида яшовчи 7 та тоифадаги 500 нафарга яқин ёшлар ИИВнинг Маънавий-маърифий ишлар ва кадрлар тайёрлаш хизматига бириктирилиб, масъул раҳбарлар бошчилигида бириктирилган ёшлар ўртасида маънавий, маърифий, спорт, интеллектуал тадбирлар ўтказилди.

Туман ИИБда “Ватанпарварлик бурчаги” ташкил этилди. Маънавий-маърифий, кўнгилочар тадбирлар доирасидаги ажойиб чиқишлар барча ёшларда катта тассуротлар қолдирди.

Қорақалпоғистон Республикаси Ички ишлар вазирлиги қошидаги академик лицей ўқувчиларининг кўргазмали чиқишлари тадбирда иштирок этаётган ёшлар қалбидаги ватанпарварлик ҳиссини янада кучайтирди.

Тадбир мобайнидаги “Арал жулдизлари” жамоаси қизиқчиларининг ҳазил тариқасидаги саҳна кўринишлари тадбир иштирокчиларига юқори кайфият бағишлади. Шунингдек, ватанпарварлик руҳидаги ажойиб куй-қўшиқлар барчага байромана кайфият бахш этди.

Туман ИИБнинг ҳовлисидаги спорт майдончасида спортнинг ҳар хил турлари бўйича “Ички ишлар вазирлиги кубоги” мусобақалари ташкил этилди. Ёшлар спортнинг стол тенниси, турникда тортилиш, тир, армрестлинг, тош кўтариш, дартс, камондан отиш турлари бўйича ўз куч ва маҳоратларини синаб кўрдилар. Мусобақалар ажойиб, баҳс-мунозаларга бой тарзда ўтказилди. Барча спорт турлари бўйича 1-, 2-, 3-ўрин соҳиблари аниқланиб, ғолибларга ва фаол иштирокчиларга спорт анжомлари ҳамда қимматбаҳо совғалар топширилиб, муносиб тақдирланди.

Вазир ўринбосари 3-сектор ҳудудида яшовчи ёшларнинг муаммолаларини ўрганиш ва ижобий ҳал қилиш юзасидан ўтказган сайёр қабулида ёшлар билан очиқ мулоқот қилди. Қабул жараёнида ёшлар бандлигини таъминлашда, ўқиган мутахассислиги бўйича ишга жойлашишда амалий ёрдам сўраб мурожаат қилдилар. Мурожаатларни ижобий ҳал этишда тумандаги тегишли масъуллар билан чора-тадбирлар белгилаб олинди.

 Чарос Арслонова, туман ҳокимининг Ахборот хизмати раҳбари.