Тошқалъадаги “Ғойиб ота” қабристони ободонлаштирилиб, атрофига манзарали дарахт кўчатлари экилди

Юртимизга баҳор фасли кириб келиши билан юртдошларимиз чор-атрофни тозалаш ва ободонлаштириш ишларига уюшқоқлик билан киришадилар. Зеро, ободлик бор жойда қут-барака бўлади. Бу ҳикматли сўзни ҳаёти ва фаолиятига шиор қилиб олган амударёликлар жорий йилги баҳор фаслини ҳам ҳашарлар билан бошлаб, ҳовли ва кўчаларини, маҳалла ва гузарларни обод қилиш, кўкаламзорлаштириш ишларига муносиб ҳисса қўшмоқдалар.

Туманнинг Қиличбой овулидаги Тошқалъа маҳалласи ҳудудида ҳам ҳашарлар ўтказилиб, “Яшил макон” умуммиллий лойиҳаси доирасида кўчат экиш ишлари юқори суръатда, сифатли тарзда амалга оширилмоқда.

Рамазон ойи муносабати билан маҳалла аҳли фуқаролар йиғини масъулларининг ташаббуси асосида яна бир хайрли ишга қўл урдилар. Навбатдаги ҳашар давомида ҳудудда жойлашган “Ғойиб ота” қабристони атрофи ободонлаштирилиб, дарахтларга шакл берилди ва оҳакланди. Қабристон ҳудуди бегона ўтлардан, хас-ҳашаклардан тозаланиб, йўлаклар тартибга келтирилди.

Муқаддас ислом динимизда қабристонни зиёрат қилиш катта савоблар қаторига киритилган. Марҳумлар абадий қўним топган масканларни зиёрат қилиш ва уларнинг ҳақларига дуода бўлиш ҳар биримизнинг инсоний бурчимиздир. Шу сабабли ҳам ҳар бир юртдошимиз доимо миллий ва диний қадриятларимизни асрашга, ўтган аждодларимиз хотирасини улуғлашга, уларга ҳурмат-эҳтиром кўрсатишга интиладилар.

Рамазон ҳайити байрами тобора яқинлашиб келаётган шу кунларда ўтказилган ушбу ҳашар эса зиёратга келувчиларга шароитлар яратиш, аҳоли юрадиган йўлакларни тартибга келтиришга қаратилгани билан ниҳоятда аҳамиятлидир.

Ҳашар давомида қабристон атрофидаги 30 сотих ташландиқ ер ҳайдалиб, фермерлар томонидан ажратилган техникалар ёрдамида ерга ишлов берилди. Ушбу майдонга ва қабристон атрофига “Яшил макон” умуммиллий лойиҳаси доирасида 700 туп тут, 500 туп терак ва яна 500 тупдан ортиқ бошқа манзарали дарахтлар қаламчалари экилди.

“Яшил макон” умуммиллий лойиҳаси доирасида туман ҳокимлиги томонидан тасдиқланган режага мувофиқ Тошқалъа маҳалласи ҳудудига жами 3785 туп кўчат ва қаламчалар экиш режалаштирилган бўлса, шу кунгача экилган ниҳоллар сони 4 минг тупдан ошиб кетди.

Ободонлаштириш ва кўкаламзорлаштириш мақсадида ташкил қилинган ҳашарда маҳалла фаоллари, нуронийлари ва ёшлар бирдамликда фаоллик кўрсатдилар. Ёши улуғ нуронийлар ёшларга ҳаётий маслаҳатлар бериб, умр йўллари давомида бошидан ўтказган азоб-уқубатлари, тортган машаққатлари ҳақида сўзлаб бердилар. Ёшлар эса ғайрат ва шижоатини, шу азиз Ватанимизга садоқатини амалда намойиш қилиб, ҳашарда жонбозлик кўрсатдилар.

Ҳашар сўнгида маҳалла фаоли, фахрий ўқитувчи Санобар Бобожонова, ёшлар етакчиси Иззат Қурбонбоев ва қабристон шайхи Турсунбой Эшбековлар ободонлаштириш ишларида қатнашганларга ўз миннатдорчилигини билдирдилар.

Ғ.Ешниёзов