ИШЧИ ГУРУҲ АЪЗОЛАРИ ҲУДУДЛАРДА БЎЛИБ, ФАОЛ ВА ИШБИЛАРМОН ХОТИН-ҚИЗЛАР БИЛАН УЧРАШДИ

Маълумки, мамлакатимизда хотин-қизларнинг бандлиги ва тадбиркорлик фаолиятига кўмаклашиш мақсадида кўплаб ислоҳотлар амалга оширилмоқда. Жумладан, 2020 йилда қабул қилинган “Тадбиркорлик фаолияти ва ўзини ўзи банд қилишни давлат томонидан тартибга солишни соддалаштириш чора-тадбирлари тўғрисида”ги Президент қарорига мувофиқ, ўзини ўзи банд қилган шахслар учун фаолият турлари рўйхатига ўзгартиришлар киритилди. Бу ўзгаришлар хотин-қизларга ҳам ўз бизнесларини бошлаш ва ривожлантириш учун қўшимча имкониятлар яратиб берди.

Масалан, хотин-қизлар ўзини ўзи банд қилган шахслар сифатида рўйхатдан ўтиб, уй шароитида хонаки товуқларни етиштириш, чорва молларини боқиш, асаларичилик, миллий нон ва патирларни, салатлар ва тузламаларни тайёрлаш ва сотиш, гуллар ва декоратив дарахтлар етиштириш ва сотиш, атлас ва адрас тўқиш, майда мунчоқ тикиш, дўппидўзлик маҳсулотларини уй шароитида тайёрлаш, қуроқчилик усулида кўйлак, кўрпа ва ёпинчиқлар тикиш ва бошқа кўплаб фаолиятлар билан шуғулланишлари мумкин.

Амударё туманида ҳам ўзини ўзи банд қилган ҳолда оиласига даромад келтираётган хотин-қизлар сафи кун сайин ортиб бормоқда. Шундай оилалар билан яқиндан танишиш ва уларнинг иш тажрибаларини оммалаштириш, муаммоларини ўрганиб, ҳал қилиш мақсадида 22 апрель куни Қорақалпоғистон Республикаси Вазирлар Кенгаши Раисининг ўринбосари, Оила ва хотин-қизлар қўмитаси раиси Марям Аҳмедова бошчилигидаги ишчи гуруҳ Амударё туманида бўлиб, ўрганишлар ўтказди. Ўрганишлар давомида масъуллар ўзини ўзи банд қилган, томорқасидан самарали фойдаланаётган, тадбиркорлик билан шуғулланаётган оилалар билан яқиндан танишиб, уларнинг муаммо ва таклифларини тинглашди.

Мамлакатимизда хотин-қизларнинг ижтимоий ҳимоясини кучайтириш ва уларнинг иқтисодий мустақиллигини таъминлаш мақсадида қатор давлат дастурлари ишлаб чиқилиб, муваффақиятли амалга оширилмоқда. Биргина “Ҳунарманд” уюшмаси орқали ҳунармандчилик фаолияти билан шуғулланаётган хотин-қизларга кўмаклашиш, уларнинг маҳсулотларини ички ва ташқи бозорларда сотишга ёрдам бериш каби чора-тадбирлар амалга оширилмоқда. Шунингдек, ўзини ўзи банд қилган хотин-қизларни рўйхатдан ўтказиш жараёни ҳам соддалаштирилган ва автоматлаштирилган, бу эса уларга давлат хизматларидан осон ва тез фойдаланиш имконини бермоқда.

Бу каби ислоҳотлар хотин-қизларнинг иқтисодий фаоллиги ошишига ва оилаларнинг даромад манбалари яратилишига хизмат қилмоқда.

Маълумки, туман бўйича 4-босқич “Аёллар дафтари”га жами 5 398 нафар хотин-қизлар киритилган бўлиб,  шундан ижтимоий ҳимояга муҳтож ишсиз хотин-қизлар 1 941 нафарни, тадбиркорлик қилиш истагини билдирган эҳтиёжманд хотин-қизлар 685 нафарни ташкил қилади.

Хотин-қизларнинг бандлик даражаси ортиб, иқтисодий аҳволи яхшиланиши эса уларнинг “Аёллар дафтари” ва бошқа ижтимоий ҳимоя дастурлари орқали эмас, ўз меҳнати билан даромад топиб, рўзғор тебратишларига замин яратади.

Жамиятда аёлларнинг ижтимоий ва иқтисодий ролини янада оширишга қаратилган бу каби тизимли ишлар уларга тенг имкониятлар яратиб беришга хизмат қилиши билан ниҳоятда аҳамиятлидир. Шу билан бирга, бу ислоҳотлар мамлакатнинг иқтисодий тараққиётига ҳам ижобий таъсир кўрсатади. Чунки хотин-қизларнинг ишбилармонлиги ва тадбиркорлиги иқтисодиётнинг турли соҳаларида янги иш ўринлари яратишга ва маҳсулотлар ҳамда хизматларнинг кўпайишига олиб келади.