Хотира ва қадрлаш куни арафасида Афғон уруши фахрийлари иштирокида маънавий-маърифий тадбирлар ўтказилмоқда

Мамлакатимизда маънавий-маърифий соҳаларда амалга оширилаётган ислоҳотлар негизида ёши улуғ кексаларни эъзозлаш, нуронийларга ҳурмат-эътибор қаратиш каби эзгу ғоялар мужассамлашган.

Ҳар йили бутун мамлакатимиз бўйлаб 9 май санаси Хотира ва қадрлаш куни сифатида муносиб нишонланиб, сана муносабати билан катта тадбирлар ташкил этилади. Байрам арафасида ёши улуғ нуронийлар, уруш қатнашчилари ҳолидан хабар олиш, уларни йўқлаш, байрам билан табриклаш мақсадида учрашувлар, маънавий-маърифий тадбирлар, давра суҳбатлари ташкил этилади.

Урушлар инсоният тарихида доимо катта йўқотишлар ва узоқ муддатли салбий оқибатларга олиб келган. Биргина Иккинчи жаҳон уруши миллионлаб одамлар ўлимига сабаб бўлиб, бир неча ўн йиллар давомида инсониятга катта иқтисодий ва ижтимоий таъсирини кўрсатиб келди. Ўтган асрнинг 79-89-йилларида Афғонистон заминида бўлган аёвсиз уруш ҳам минглаб ватандошларимиз умрига зомин бўлди.

Шу сабабли ҳам ҳар йили 9 май – Хотира ва қадрлаш куни арафасида Ўзбекистон ветеран жангчи фахрийлар ва ногиронлар бирлашмаси аъзолари қуролдош дўстлари, кенг жамоатчилик билан учрашувлар уюштириб, ўша машъум кунларни ёдга олади, юртдошларимизни тинчликнинг қадрига етишга чорлайди.

Бу йил ҳам бирлашма Қорақалпоғистон Республикаси бўлимининг Амударё туманидаги вакили Баҳодир Жуманиёзов бошчилигида бир гуруҳ афғон уруши иштирокчилари тумандаги овул ва маҳалларда учрашувлар, маънавий-маърифий тадбирлар ташкил қилдилар.

Холимбег овулидаги 35-сонли умумтаълим мактабида ўқитувчи ва ўқувчилар иштирокида ўтказилган учрашув мобайнида собиқ қуролдошлар уруш ва унинг салбий оқибатлари, тинчликнинг улуғ неъмат эканлиги борасида фикр-мулоҳазалар юритдилар. Шунингдек, тадбир мобайнида мактабнинг маънавий-маърифий ишлар бўйича ўринбосари Комилжон Ўразимбетовга собиқ Совет қўшинлари Афғонистондан олиб чиқилганига 35 йил тўлиши муносабати билан медаль топширилди.

Маънавий-маърифий тадбир Холимбег овулидаги 73-сонли мактабда ҳам ўтказилиб, тадбирда мактаб директори Зарифбой Хўжаниёзовга ҳам шундай медаль топширилди.

Афғон уруши фахрийлари Манғит шаҳридаги 30-сонли мактабда ҳам бўлиб, мазкур мактабнинг собиқ ўқувчилари, Афғон уруши қатнашчилари Шавкат Шомуратов, Фарҳод Авезов, Шавкат Саидбоевлар билан учрашдилар ва ушбу қуролошларига ҳам медалларни тантанали тарзда топширдилар.

Шу каби учрашув Арна бўйи маҳалласидаги 57-сонли мактабда ҳам бўлиб ўтди. Учрашувда сўзга чиққанлар 1941-1945 йиллар уруш ва меҳнат фронтида тинчлик учун курашиб ҳалок бўлган жасур ва матонатли ўғлонлар хотирасини ёд этдилар ҳамда уруш ва меҳнат фронтида жасорат кўрсатган нуронийларимизнинг эъзозланиши халқимизга хос қадриятлар кўзгуси эканлигини таъкидладилар.

Ҳарбий хизматга чақирилишдан аввал туманнинг Боғ маҳалласида жойлашган 13-сонли мактабда таҳсил олган, кейинчалик Афғонистондаги урушда иштирок этган Қадамбой Эримбетов, Ҳамро Собиров, Озод Хўжаниёзовлар ҳам Афғон заминидан собиқ иттифоқ қўшинларини олиб чиқилганига 35 йил тўлиши муносабати билан таъсис этилган медаллар билан тақдирланди. Жангчи фахрийлар aфғон урушида хизмат пайтида ҳалок бўлган аскарларнинг оилалари ҳолидан ҳам хабар олиб, уларни байрам билан қутладилар ҳамда совғалар бердилар.

Аждодларни хотирлаш ва кексаларни эъзозлаш халқимизга хос улуғ қадрият ҳисобланиб, бу борада мамлакатимизда ҳар йили қабул қилинаётган дастурларда ёши улуғ, нуронийларга бўлган ҳурмат, эътибор диққат марказидадир. Уруш ва меҳнат фронти фахрийлари, нуронийлар, афғон уруши қатнашчилари холидан хабар олиш, юртимизнинг бугунги тинч-осойишта ҳаёти учун жасорат кўрсатиб, жонини фидо қилган ватандошларимиз хотирасини ёт этиш эса ҳар биримизнинг энг олий бурчимиздир. Зеро, инсон азиз, хотира – муқаддасдир.

Кириб келаётган қутлуғ сана – Хотира ва қадрлаш куни билан барча уруш фахрийларини, фронт ортида меҳнат қилган нуронийларимизни, барча юртдошларимизни табриклаймиз!

Чарос Арслонова, туман ҳокилигининг Ахборот хизмати раҳбари.