Жорий йилда туманимиздаги 44-сонли мактабгача таълим ташкилотини 75 нафар тарбияланувчи тамомлади
Узлуксиз таълим тизимининг пойдевори ҳисобланган мактабгача таълим соҳаси болажонларни ҳар томонлама соғлом ва баркамол қилиб тарбиялаш ва мактабга тайёрлашда муҳим аҳамият касб этади. 3 ёшдан 7 ёшгача бўлган даврдан бошлаб боланинг мустақил фаолияти ривожланади ҳамда инсоний фазилатлари шаклланади. Амударё туманининг Қум ёп маҳалласи ҳудудидаги 44-сонли мактабгача таълим ташкилоти ходимлари ҳам маҳалла болажонларининг соғлом ва баркамол бўлиб улғайишлари йўлида бор куч ва имкониятларини ишга солмоқдалар.
Жорий йилда мазкур мактабгача таълим ташкилотини 75 нафар тарбияланувчи тамомлади ва 8 июнь куни болажонларни мактабга кузатиш муносабати билан “Хайр, боғчам – салом, мактаб!” тадбири ўтказилди.
Тадбирда Халқ депутатлари туман Кенгаши депутати Замира Сапарова, 39-сонли мактаб директори Саид Дурдибоев, мактабгача таълим ташкилоти директори Айнур Раҳманова ва болажонлар, уларнинг бобо-бувилари ҳамда ота-оналари иштирок этишди. Тадбирга тарбиячи Латофат Бобожонова бошловчилик қилди.
Дастлаб Ўзбекистон ва Қорақалпоғистон Республикаларининг Давлат мадҳиялари янгради. Шундан кейин Халқ депутатлари туман Кенгаши депутати Замира Сапарова тадбирни очди ва барча болажонларнинг келгуси мактаб таълимида аъло баҳоларга ўқишларига тилакдош бўлди.
Тадбирда сўз олганлар сўнги йилларда мамлакатимизда мактабгача таълим тизимида амалга оширилган ислоҳатлар, боғча таълимининг аҳамияти тўғрисида тўхталиб ўтишди. Қум ёп маҳалласидаги 39-сонли мактаб директори Саид Дурдибоев ўз сўзида болажонларга кейинги ўқув йилидан муқаддас даргоҳ – мактаб остонасига қадам қўйишлари муносабати билан омад ва муваффақиятлар тилаб, мактабда бир-биридан қизиқарли фанларни қунт билан ўрганишлари зарурлигини таъкидлади. Ҳақиқатдан ҳам боғчада тарбияланган бола мактаб таълимини ўзлаштириш давомида бошқа ўқувчилардан зийраклиги билан ажралиб туради.
“Хайр, боғчам – салом, мактаб!” тадбирида болажонлар ўтган давр давомида ўрганган билимларини меҳмонларга намойиш этишди. Болажонлар бахтли болалик, она Ватан, мактаб, боғча ҳақидаги ўзбек, рус ва инглиз тилларида ёд олган шеърларини ифодали ўқишди. Шунингдек, шўх қўшиқларга ҳамоҳанг тарзда гуруҳ рақсларини ижро этишди. Тадбирда жам бўлган барча иштирокчилар уларни қарсаклар билан олқишлашди.
Айниқса, болажонларнинг оналари ва бувилари иштирокида ўрказилган савол-жавоб ўйинлари тадбирга кўтаринки руҳ бағишлади. Мазкур саволлар болажонларнинг қизиқишлари, севимли машғулотлари, яқин дўстларининг исмлари, яхши кўрган таомлари ва шунга ўхшаш мавзуларда тузилганлиги билан ўйин иштирокчиларининг фарзанди ҳақида қанчалик кўп маълумот билишларини синовдан ўтказди.
Шу ўринда айтиш жоизки, 44-сонли мактабгача таълим ташкилоти 1982 йилда қурилган ва “Обод маҳалла” дастури асосида 2022 йилда қайта таъмирланиб, бугунги кунда замонавий қиёфа касб этган. Ҳозирда боғчанинг асосий биносида 194 нафар тарбияланувчи шинам-ёруғ хоналарда, қулай шарт-шароитларда тарбия қилиняпти. Қўшимча равишда ҳудуддаги 74-сонли мактабда қисқа гуруҳлар ташкил этилиши натижасида у ерда 110 нафар тарбияланувчи таълим билан қамраб олинган. Мазкур мактабгача таълим ташкилотида жами 60 нафар ходим фаолият юритади. Шулардан 24 нафарини педагоглар ташкил қилади.
2023 йилда муассаса тарбиячиси Сарбиназ Жаббарбергенова “Йилнинг энг яхши тарбиячиси – 2023” кўрик танловида иштирок этиб, Қорақалпоғистон Республикаси босқичида фахрли 2-ўринни қўлга киритди.
Дарҳақиқат, боланинг келажаги боғчадан, унга берилаётган эътибордан бошланади. Унинг жамиятга тез мослашиши, мулоқот кўникмаларининг шаклланиши ва теран тафаккур қила олиши учун ҳам боғча ва ундаги таълимнинг аҳамияти ниҳоятда беқиёс.
Унутилмас лаҳзаларга бой ўтган тадбир нафақат кичкинтойларга, балки ота-оналарга ҳам ниҳоятда манзур бўлди.
Айнур Рахманова, 44-сонли мактабгача таълим ташкилоти директори
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
