Joriy yilda tumanimizdagi 44-sonli maktabgacha taʼlim tashkilotini 75 nafar tarbiyalanuvchi tamomladi

Uzluksiz taʼlim tizimining poydevori hisoblangan maktabgacha taʼlim sohasi bolajonlarni har tomonlama sogʻlom va barkamol qilib tarbiyalash va maktabga tayyorlashda muhim ahamiyat kasb etadi. 3 yoshdan 7 yoshgacha boʻlgan davrdan boshlab bolaning mustaqil faoliyati rivojlanadi hamda insoniy fazilatlari shakllanadi. Amudaryo tumanining Qum yop mahallasi hududidagi 44-sonli maktabgacha taʼlim tashkiloti xodimlari ham mahalla bolajonlarining sogʻlom va barkamol boʻlib ulgʻayishlari yoʻlida bor kuch va imkoniyatlarini ishga solmoqdalar.

Joriy yilda mazkur maktabgacha taʼlim tashkilotini 75 nafar tarbiyalanuvchi tamomladi va 8-iyun kuni bolajonlarni maktabga kuzatish munosabati bilan “Xayr, bogʻcham – salom, maktab!” tadbiri oʻtkazildi.

Tadbirda Xalq deputatlari tuman Kengashi deputati Zamira Saparova, 39-sonli maktab direktori Said Durdiboyev, maktabgacha taʼlim tashkiloti direktori Aynur Rahmanova va bolajonlar, ularning bobo-buvilari hamda ota-onalari ishtirok etishdi. Tadbirga tarbiyachi Latofat Bobojonova boshlovchilik qildi.

Dastlab Oʻzbekiston va Qoraqalpogʻiston Respublikalarining Davlat madhiyalari yangradi. Shundan keyin Xalq deputatlari tuman Kengashi deputati Zamira Saparova tadbirni ochdi va barcha bolajonlarning kelgusi maktab taʼlimida aʼlo baholarga oʻqishlariga tilakdosh boʻldi.

Tadbirda soʻz olganlar soʻngi yillarda mamlakatimizda maktabgacha taʼlim tizimida amalga oshirilgan islohatlar, bogʻcha taʼlimining ahamiyati toʻgʻrisida toʻxtalib oʻtishdi. Qum yop mahallasidagi 39-sonli maktab direktori Said Durdiboyev oʻz soʻzida bolajonlarga keyingi oʻquv yilidan muqaddas dargoh – maktab ostonasiga qadam qoʻyishlari munosabati bilan omad va muvaffaqiyatlar tilab, maktabda bir-biridan qiziqarli fanlarni qunt bilan oʻrganishlari zarurligini taʼkidladi. Haqiqatdan ham bogʻchada tarbiyalangan bola maktab taʼlimini oʻzlashtirish davomida boshqa oʻquvchilardan ziyrakligi bilan ajralib turadi.

“Xayr, bogʻcham – salom, maktab!” tadbirida bolajonlar oʻtgan davr davomida oʻrgangan bilimlarini mehmonlarga namoyish etishdi. Bolajonlar baxtli bolalik, ona Vatan, maktab, bogʻcha haqidagi oʻzbek, rus va ingliz tillarida yod olgan sheʼrlarini ifodali oʻqishdi. Shuningdek, shoʻx qoʻshiqlarga hamohang tarzda guruh raqslarini ijro etishdi. Tadbirda jam boʻlgan barcha ishtirokchilar ularni qarsaklar bilan olqishlashdi.

Ayniqsa, bolajonlarning onalari va buvilari ishtirokida oʻrkazilgan savol-javob oʻyinlari tadbirga koʻtarinki ruh bagʻishladi. Mazkur savollar bolajonlarning qiziqishlari, sevimli mashgʻulotlari, yaqin doʻstlarining ismlari, yaxshi koʻrgan taomlari va shunga oʻxshash mavzularda tuzilganligi bilan oʻyin ishtirokchilarining farzandi haqida qanchalik koʻp maʼlumot bilishlarini sinovdan oʻtkazdi.

Shu oʻrinda aytish joizki, 44-sonli maktabgacha taʼlim tashkiloti 1982-yilda qurilgan va “Obod mahalla” dasturi asosida 2022-yilda qayta taʼmirlanib, bugungi kunda zamonaviy qiyofa kasb etgan. Hozirda bogʻchaning asosiy binosida 194 nafar tarbiyalanuvchi shinam-yorugʻ xonalarda, qulay shart-sharoitlarda tarbiya qilinyapti. Qoʻshimcha ravishda hududdagi 74-sonli maktabda qisqa guruhlar tashkil etilishi natijasida u yerda 110 nafar tarbiyalanuvchi taʼlim bilan qamrab olingan. Mazkur maktabgacha taʼlim tashkilotida jami 60 nafar xodim faoliyat yuritadi. Shulardan 24 nafarini pedagoglar tashkil qiladi.

2023-yilda muassasa tarbiyachisi Sarbinaz Jabbarbergenova “Yilning eng yaxshi tarbiyachisi – 2023” koʻrik tanlovida ishtirok etib, Qoraqalpogʻiston Respublikasi bosqichida faxrli 2-oʻrinni qoʻlga kiritdi.

Darhaqiqat, bolaning kelajagi bogʻchadan, unga berilayotgan eʼtibordan boshlanadi. Uning jamiyatga tez moslashishi, muloqot koʻnikmalarining shakllanishi va teran tafakkur qila olishi uchun ham bogʻcha va undagi taʼlimning ahamiyati nihoyatda beqiyos.

Unutilmas lahzalarga boy oʻtgan tadbir nafaqat kichkintoylarga, balki ota-onalarga ham nihoyatda manzur boʻldi.

Aynur Raxmanova, 44-sonli maktabgacha taʼlim tashkiloti direktori