Дарё бўйи маҳалласида аҳоли турмуш тарзи яхшиланмоқда

Маълумки, бугунги кунда давлатимиз раҳбари ташаббуси билан юрт равнақи ва фаровонлиги йўлида амалга оширилаётган ислоҳотларнинг жойлардаги ижроси натижасида инсонларнинг турмуш тарзи тобора яхшиланиб бормоқда. Бунда маҳаллаларда фаолият юритаётган “еттилик” масъулларининг ўрни ва аҳамияти жуда муҳим.

Амударё туманидаги Дарё бўйи маҳалласига ташриф буюрар эканмиз, маҳалла “еттилиги”нинг ўзаро ҳамжиҳатлигига, аҳолининг уюшқоқлигига, ҳудуднинг обод ва файзли масканга айланганлигига, инсонларнинг кўзларидаги самимият, ўзаро меҳр-оқибатнинг кучли эканлигига гувоҳ бўлдик.

Дарё бўйи МФЙ масъуллари ҳудуддаги ижтимоий ҳимояга муҳтож инсонлар, ёлғиз кексалар ҳолидан хабар олиб, уларнинг мавжуд муаммоларини ҳал қилишга, ҳаёт шароитларини яхшилашга амалий ёрдам бериб келмоқдалар.

Жумладан, маҳаллада яшовчи Фарҳод Холбоев 16 йилдан буён ёлғиз яшаб келаётган, яшаш шароитлари жуда ачинарли ҳолга келиб қолган, ҳатто хонадони электр энергиясидан узилиб қолганлиги маҳалла масъулларини бефарқ қолдирмаган. Маҳалла раиси Маҳмуд Тўлибоев, ҳоким ёрдамчиси Ботир Атабиллаев, ёшлар етакчиси Шаҳло Ўразбоевалар Фарҳод ака хонадонида таъмирлаш ва тозалаш ишларини ташкил қилишди. Ҳашар йўли билан ҳовлининг уй деворларини оқлаб, дераза ва эшиклар, хоналарни тозаланб, хонадон эгасига янги кийим-бош, ошхонага идиш-товоқлар олиб беришди. Шунингдек, хонадонга электр линиялари ҳам янгидан тортилиб, электр ҳисоблагич ҳамда телевизор олиб келиб ўрнатилди. Қўлида ҳунари бор бўлган Фарҳод аканинг бандлигини таъминлаш бўйича ишар ҳам ташкил этилмоқда.

Таъкидлаш керакки, муҳтарам Президентимиз томонидан Қорақалпоғистон Республикасидаги ҳар бир маҳаллага ажратилган 500 млн сўм маблағ ҳисобидан маҳалларда тизимли ишлар олиб борилмоқда.

Мана шу маблағ ҳисобидан амалга оширилган ишлар сабабли маҳалладаги 60та хонадоннинг томорқасига сув етиб бормоқда. Маҳаллага ажратилган маблағни аҳоли фаровонлиги йўлида тўғри йўналтиришни кўзлаган масъуллар ҳудудда яшовчи аҳоли томорқаларига оқар сувларининг етиб бориши ҳамда мавжуд сув ресурсларидан самарали фойдаланиш мақсадида катта ариқлардан сув чиқарувчи 4та насос ўрнатиш ишларини ташкил этдилар.

Маҳалла фаоллари билан суҳбатлашар эканмиз, катта ариқдан сув чиқарувчи насос орқали Тараққиёт, Тараққиёт-3, Нурота кўчаларидаги 60 та хонадонга сув етиб бораётганини мамнуният билан эътироф этишди. Шунингдек, аҳолининг уюшқоқлиги орқали маҳалладаги барча ариқлар тозаланиб, хонадонлардаги томорқаларнинг суғорилиши бўйича муаммолар ҳам баратараф қилинди. Ташрифимиз мобайнида маҳалладошларнинг ўзаро аҳиллиги, меҳнатсеварлиги натижасида ҳашар йўли билан маҳалладаги яна 19 та хонадонлар томорқаларига сув етказиш мақсадида ўзларининг ҳисобидан тупроқ ташланиб, Табиат-3 ва Табиат-4 кўчаларидан ариқ ўтказаётганларининг гувоҳи бўлдик.

Маҳаллада ҳоким ёрдамчиси кўмаги билан бандлиги таъминланаётган, оиласига даромад олиб келаётган, тадбиркорлик билан шуғулланаётган фуқаролар сафи ортиб бормоқда. Биз ҳоким ёрдамчиси Ботир Атабиллаев ёрдамида кредит олиб, асаричилик билан шуғулланаётган Анвар Янгибоев фаолияти билан танишдик.

Анвар Янгибоев ёш оила бошлиғи бўлиб, ушбу фаолият билан 3 йилдан буён шуғулланиб келмоқда. Бу йил 33 млн сўм кредит маблағи ҳисобига асалари қутилари сонини 30 тага етказди. Анвар аканинг таъкидлашича, асаларичилик энг даромадли фаолият турларидан бири. Кўп меҳнат талаб қилмайдиган, ҳар томонлама фойдали иш. У ҳар бир қутидан камида 30 кг.гача асал олиб, оиласига яхши даромад келтириётганини қайд этиб ўтди.

Ҳудудда ёшлар бандлигини таъминлашда ҳоким ёрдамчиси Ботир Атабиллаев ва ёшлар етакчиси Шаҳло Ўразбоеваларнинг ўзаро ҳамжиҳатликдаги ишлари натижасида Шерзод Бобожонов чорвачилик фаолиятини йўлга қўйди. Шерзод билан суҳбатлашар эканмиз, қишлоқ хўжалигининг турли соҳаларига қизиқиши юқори эканлигини таъкидлайди. Ёш бўлишига қарамай, хонадонида чорвачилик, паррандачилик, биогумус етиштириш каби ишлар билан чекланиб қолмасдан, томорқасидан ҳам самарали фойдаланиб келмоқда.

Ҳоким ёрдамчиси кўмаги билан олинган 33 млн сўмлик кредит маблағи ҳисобига 5 бош қорамол сотиб олиб, ҳозирда қорамоллари сонини 7 бошга етказган. Тиришқоқ ва интилувчан Шерзоднинг орзулари бисёр. Ўзига ўхшаган кўплаб ёшларнинг бандлигини таъминлаш, чорвачиликни ривожлантириб, катта фермер хўжалигини ташкил этишни мақсад қилган.

Маҳаллага ташрифимиз мобайнида ўзи ўқитувчи бўлишига қарамай, хонадонида турли оилавий тадбиркорлик соҳаларини ҳамда чорвачиликни йўлга қўйган, бу орқали 3 нафар ёшнинг бандлигини таъминлаётган, шунингдек, томорқасидан самарали фойдаланаётган Рустам Ҳайтбоевнинг амалга ошираётган ишлари ҳам бизда катта таассурот қолдирди.

Ҳудуддаги 65-сонли умумтаълим мактабида психолог лавозимида фаолият олиб бораётган Рустам Ҳайтбоев 2019 йилда оилавий тадбиркорлик фаолиятини йўлга қўйган. Давлат ишидан бўш вақтларида эшик ва дераза ромларини ишлаб чиқариш орқали 2 нафар банд бўлмаган фуқароларнинг бандлигини таъминлаган. Унинг хонадонида пахта титиш ускунаси ҳам мавжуд бўлиб, маҳалладошларининг оғрини енгил, узоғини яқин қилиб келмоқда. Пахта титиш ускунаси орқали ҳам 1 нафар ишсиз ёшнинг бандлиги таъминланган.

Қолаверса, Рустам ака томорқасидан ҳам самарали фойдаланиб келмоқда. Томорқасида қишлоқ хўжалиги маҳсулотларининг деярли барча туридан экилган ҳамда йилига камида 2 мартадан яхши ҳосил олинади. Чорвачилик сирларини болалигидан ўрганиб келаётган Рустам Ҳайтбоевнинг ҳозирда 10 бошга яқин қорамоллари мавжуд. Ҳамюртимизнинг ҳам келгусидаги мақсад ва режалари бисёр. Катта ун заводини очиш орқали 20 нафарга яқин ишсиз фуқароларнинг бандлигини таъминлаш бўйича аниқ режалар тузмоқда ва ушбу мақсадига яқин 2 йил ичида эришишни режалаштирмоқда.

Биз фаол ва ташаббускор, фидойи ҳамда меҳнатсевар Дарё бўйи маҳалласи аҳлининг ишларига ривож, рўзғорига қут-барака тилаб, улар билан хайрлашдик.

Чарос Арслонова, туман ҳокимлигининг Ахборот хизмати раҳбари.