Халқ депутатлари туман Кенгашининг 75-сессияcи тўғрисида ахборот
2024 йил 2 июль куни Амударё тумани ҳокимлигининг мажлислар залида Халқ депутатлари туман Кенгашининг 75-сессияcи бўлиб ўтди.
Сессияда депутатлар, туман ҳоким ўринбосарлари, ҳокимлик масъул ходимлари, бўлимлар, ташкилотлар раҳбарлари ҳамда оммавий ахборот воситалари вакиллари иштирок этди.
Сессияни Кенгаш раисининг ўринбосари Ғуломжон Ешниёзов очди ва олиб борди. Сессия котиблигига 18-Хитой сайлов округидан депутат Музаффар Ешчанов сайланди.
Сессия кун тартибидаги дастлабки масала юзасидан Амударё тумани ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Камилжан Айтбаев ҳисобот берди.
Ҳисоботда Ўзбекистон Республикаси Президентининг 2024 йил 4 апрелдаги “Меҳнат миграцияси жараёнларини такомиллаштириш ҳамда хорижда вақтинча фаолиятини амалга ошираётган шахсларни қўллаб-қувватлашга доир қўшимча чора-тадбирлар тўғрисида”ги Фармони ижросини таъминлаш мақсадида туманда амалга оширилаётган ишлар ҳақида маълумотлар берилди.
Кун тартибидаги навбатдаги масала юзасидан туман Иқтисодиёт ва молия бўлими бошлиғи Жавлонбек Жумамуродов ҳисобот берди. Ҳисоботда билдирилган туман маҳаллий бюджетининг 2024 йилда иқтисод қилинган маблағларини чегириб олиш ҳамда биринчи ва иккинчи даражали тўловларга қайта йўналтириш тўғрисидаги таклиф депутатлар томонидан маъқулланди.
Сессия кун тартибидаги кейинги масала юзасидан Давлат кадастрлари палатаси туман филиали бошлиғи Шерзод Султанов ҳисобот берди. Ҳисоботларни тинглаб ва муҳокама қилиб депутатлар Ўзбекистон Республикаси Президентининг 2023 йил 28 июль кунги фармонида келтирилган талабларга жавоб берадиган ва солиқ органларидан қарздорлиги бўлмаган, белгиланган бир марталик йиғимни тўлаган жами 1857 нафар фуқароларга тегишли бўлган ер участкаларига ижара ҳуқуқи ҳамда бино ва иншоотларга мулк ҳуқуқини эътироф этиш бўйича Кенгаш қарорини қабул қилдилар. Шунингдек, Амударё туманининг маъмурий-ҳудудий бирликлар чегараларини белгилаш бўйича ишларнинг якуни ҳам кўриб чиқилиб, бу бўйича ҳам тегишли қарор қабул қилинди.
Сессияда туман фермер, деҳқон хўжаликлари ва томорқа ер эгалари кенгаши раиси Илхом Палвановнинг таклифига биноан Ўзбекистон Республикаси Президентининг “Пиллачилик соҳасида касаначиликни қўллаб-қувватлаш ҳамда пилла етиштириш учун озуқа базасини янада кенгайтиришнинг қўшимча чора-тадбирлари тўғрисида”ги Фармонига асосан янги тутзорларни барпо этиш ҳамда ёшларни иш билан таъминлаш мақсадида Дўрман овулидаги туман ҳокимлиги захира ер фонди ҳисобидан умумий майдони 6,4 гектар бўлган экин майдонини деҳқон хўжалиги ташкил қилиш учун очиқ электрон танловга қўйиш бўйича қарор қабул қилинди.
Сессия кун тартибидаги навбатдаги масала юзасидан Амударё тумани қишлоқ хўжалиги бўлими бошлиғи Қудрат Абдикаликов ҳисобот берди. Ҳисоботда тумандаги баъзи фермер хўжаликлари томонидан тегишли қарор талаблари бузилиб, сувни кўп талаб қиладиган, жойлаштиришда кўрсатилмаган шоли экинини экиш ҳолатлари кузатилаётгани таъкидланиб, Кенгашдан бу бўйича тегишли чора кўриш сўралди. Ушбу масала юзасидан Агросаноат мажмуаси устидан назорат қилиш инспекцияси туман бўлими бошлиғи Сарвар Матякубов ва туман Ирригация бўлими бошлиғи Шукрулло Юсуповлар ҳам сўзга чиқиб, режасиз экилган шоли сувнинг меъёридан ортиқ истеъмол қилинишига, бошқа ҳудудларга сув етиб бормаслигига сабаб бўлаётганини таъкидлашди.
Шунингдек, сессияда халқ депутатлари туман Кенгаши ваколатига кирувчи бошқа масалалар ҳам муҳокама қилинди.
Депутатларнинг фикр ва мулоҳазалари тингланиб, фаол муҳокамалардан кейин кун тартибидаги барча масалалар бўйича тегишли қарорлар қабул қилинди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
