Xalq deputatlari tuman Kengashining 75-sessiyaci toʻgʻrisida axborot

2024-yil 2-iyul kuni Amudaryo tumani hokimligining majlislar zalida Xalq deputatlari tuman Kengashining 75-sessiyaci boʻlib oʻtdi.

Sessiyada deputatlar, tuman hokim oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiyani Kengash raisining oʻrinbosari Gʻulomjon Yeshniyozov ochdi va olib bordi. Sessiya kotibligiga 18-Xitoy saylov okrugidan deputat Muzaffar Yeshchanov saylandi.

Sessiya kun tartibidagi dastlabki masala yuzasidan Amudaryo tumani hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Kamiljan Aytbayev hisobot berdi.

Hisobotda Oʻzbekiston Respublikasi Prezidentining 2024-yil 4-apreldagi “Mehnat migratsiyasi jarayonlarini takomillashtirish hamda xorijda vaqtincha faoliyatini amalga oshirayotgan shaxslarni qoʻllab-quvvatlashga doir qoʻshimcha chora-tadbirlar toʻgʻrisida”gi Farmoni ijrosini taʼminlash maqsadida tumanda amalga oshirilayotgan ishlar haqida maʼlumotlar berildi.

Kun tartibidagi navbatdagi masala yuzasidan tuman Iqtisodiyot va moliya boʻlimi boshligʻi Javlonbek Jumamurodov hisobot berdi. Hisobotda bildirilgan tuman mahalliy byudjetining 2024-yilda iqtisod qilingan mablagʻlarini chegirib olish hamda birinchi va ikkinchi darajali toʻlovlarga qayta yoʻnaltirish toʻgʻrisidagi taklif deputatlar tomonidan maʼqullandi.

Sessiya kun tartibidagi keyingi masala yuzasidan Davlat kadastrlari palatasi tuman filiali boshligʻi Sherzod Sultanov hisobot berdi. Hisobotlarni tinglab va muhokama qilib deputatlar Oʻzbekiston Respublikasi Prezidentining 2023-yil 28-iyul kungi farmonida keltirilgan talablarga javob beradigan va soliq organlaridan qarzdorligi boʻlmagan, belgilangan bir martalik yigʻimni toʻlagan jami 1857 nafar fuqarolarga tegishli boʻlgan yer uchastkalariga ijara huquqi hamda bino va inshootlarga mulk huquqini eʼtirof etish boʻyicha Kengash qarorini qabul qildilar. Shuningdek, Amudaryo tumanining maʼmuriy-hududiy birliklar chegaralarini belgilash boʻyicha ishlarning yakuni ham koʻrib chiqilib, bu boʻyicha ham tegishli qaror qabul qilindi.

Sessiyada tuman fermer, dehqon xoʻjaliklari va tomorqa yer egalari kengashi raisi Ilxom Palvanovning taklifiga binoan Oʻzbekiston Respublikasi Prezidentining “Pillachilik sohasida kasanachilikni qoʻllab-quvvatlash hamda pilla yetishtirish uchun ozuqa bazasini yanada kengaytirishning qoʻshimcha chora-tadbirlari toʻgʻrisida”gi Farmoniga asosan yangi tutzorlarni barpo etish hamda yoshlarni ish bilan taʼminlash maqsadida Doʻrman ovulidagi tuman hokimligi zaxira yer fondi hisobidan umumiy maydoni 6,4 gektar boʻlgan ekin maydonini dehqon xoʻjaligi tashkil qilish uchun ochiq elektron tanlovga qoʻyish boʻyicha qaror qabul qilindi.

Sessiya kun tartibidagi navbatdagi masala yuzasidan Amudaryo tumani qishloq xoʻjaligi boʻlimi boshligʻi Qudrat Abdikalikov hisobot berdi. Hisobotda tumandagi baʼzi fermer xoʻjaliklari tomonidan tegishli qaror talablari buzilib, suvni koʻp talab qiladigan, joylashtirishda koʻrsatilmagan sholi ekinini ekish holatlari kuzatilayotgani taʼkidlanib, Kengashdan bu boʻyicha tegishli chora koʻrish soʻraldi. Ushbu masala yuzasidan Agrosanoat majmuasi ustidan nazorat qilish inspektsiyasi tuman boʻlimi boshligʻi Sarvar Matyakubov va tuman Irrigatsiya boʻlimi boshligʻi Shukrullo Yusupovlar ham soʻzga chiqib, rejasiz ekilgan sholi suvning meʼyoridan ortiq isteʼmol qilinishiga, boshqa hududlarga suv yetib bormasligiga sabab boʻlayotganini taʼkidlashdi.

Shuningdek, sessiyada xalq deputatlari tuman Kengashi vakolatiga kiruvchi boshqa masalalar ham muhokama qilindi.

Deputatlarning fikr va mulohazalari tinglanib, faol muhokamalardan keyin kun tartibidagi barcha masalalar boʻyicha tegishli qarorlar qabul qilindi.