Амударё туманида "Соғлом ва осойишта ҳаёт" назорат тадбирлари ўтказилмоқда
Аҳоли ўртасида соғлом ва осойишта ҳаёт тарзини қарор топтириш, жиноятчиликнинг олдини олиш, айниқса, уюшмаган ёшлар, вояга етмаган ўсмирларнинг тунги вақтларда назоратсиз кўчада юришлари, спиртли ичимликлар истеъмол қилган ҳолда фуқароларнинг тинчини бузишларининг олдини олиш ҳамда ўзаро низоли оилалар ўртасидаги келишмовчиликларни бартараф этиш мақсадида мамлакатимизда Ўзбекистон Республикаси Ички Ишлар вазирлигининг фармойишига асосан икки босқичли “Соғлом ва осойишта ҳаёт” тадбирининг иккинчи босқичи муваффақиятли амалга оширилмоқда.
Жорий йилнинг 1 август санасидан 15 августга қадар давом этадиган “Соғлом ва осойишта ҳаёт” махсус профилактик рейд тадбирлари Амударё туманининг аҳоли энг гавжум ҳудудларида, хусусан, Манғит Деҳқон бозори атрофидаги тадбиркорлик субъектлари, интернет кафелар ҳамда автотураргоҳлар, умумий овқатланиш шохобчалари жойлашган ўринларда, шунингдек, ҳуқуқбузарлик ҳолатлари юз бериш эҳтимоли юқори деб ҳисобланган овул ва маҳаллаларда ўтказилмоқда.
Шуниси ачинарлики, туман Ички ишлар бўлими ходимлари, ҳудудлар бўйича профилактика инспекторлари иштирокидаги тунги рейд тадбирлари давомида шахсий бойлик орттириш мақсадида энг жирканч иш – фоҳишабозлик билан шуғулланишга мойил шахслар ҳам борлиги аниқланди.
Ўзбекистон ва Бештом маҳалла фуқаролар йиғинлари ҳудудида яшовчи С. ва И. исмли шахслар жинсий муносабатда бўлиб, фаҳш ишлар билан шуғулланаётган вақтда ҳудудий профилактика инспектори томонидан қўлга олиниб, уларга жамиятда юриш-туриш қоидаларини қўпол тарзда бузганликлари, ёшлар тарбиясига салбий таъсир кўрсатувчи хатти-ҳаракатларни содир этганликлари учун тегишли ҳужжатлар расмийлаштирилди.
Шунингдек, Бештом маҳалласида истиқомат қилувчи Ҳ. исмли шахс эса маълум миқдордаги пул эвазига ўз уйида икки нафар фуқарога жинсий муносабатда бўлишлари учун шароит яратиб бераётганида назорат гуруҳи томонидан қўлга олинди. Айни пайтда мазкур ҳолат бўйича терговга қадар суриштирув ишлари олиб борилмоқда.
Назорат тадбирлари давомида ёшлар ўртасида гиёҳвандликдек жирканч иллатнинг олдини олиш, кашандаликка қарши курашиш, ижтимоий тармоқлар орқали зўр бериб тарғиб этилаётган диний экстремизм ғояларидан уларни ҳимоя қилиш, давримизнинг глобал муаммоларидан бири бўлган мафкуравий хуружлар, порнографик ташвиқот воситаларининг ўсиб келаётган ёш авлод онгини заҳарлашидан ҳар лаҳзада огоҳ бўлиш тўғрисида зарур тавсиялар берилмоқда.
Халқимиз йилдан-йилга фаровонлашиб, яшаш шароитлари яхшиланиб бормоқда. Буни кўчаларни тўлдириб, истаган манзилларига шахсий автомобиллари билан тез ва осон етиб олишга интилаётган юртдошларимиз мисолида ҳам кўришимиз мумкин. Лекин бу шаҳар кўчалари бўйлаб ўзини кўз-кўз қилиш, кимўзарга автомобиль пойгасини қизитиш дегани эмас.
Афсусланарли томони шундаки, назорат тадбирлари давомида ана шундай “учар автомобиль” эгаларининг йўл ҳаракати қоидаларига хилоф равишда тезликни ошириш ҳолатлари ҳам аниқланиб, уларга нисбатан маъмурий тартибда чоралар кўриш учун тегишли ҳужжатлар расмийлаштирилди.
Шунингдек, интернет кафеларда ота-онаси ва уларнинг ўрнини босувчи васийлар ҳамроҳлигисиз ярим тунгача турли порнографик каналларга кириб, менталитетимизга ёт бўлган видеолавҳаларни томоша қилиш орқали вақтини ўтказаётган айрим тарбияси оғир ўсмирларга шароит яратиб бераётган интернет кафелар раҳбарлари ҳам аниқланиб, ўсиб келаётган ёш авлод тарбиясига салбий таъсир кўрсатувчи, бузғунчи сайтлар ва Телеграм каналларидан фойдаланишни чеклаш, назоратсиз ўсмирларнинг интернет кафеларда тунги вақтларда шуғулланишларига чек қўйиш зарурлиги ҳақида айрим тадбиркорлик субъектлари вакилларига муҳим тавсиялар, тушунтиришлар берилди.
Инобат Ўрозматова, туман Ички ишлар бўлимининг хотин-қизлар масалалари бўйича катта инспектори
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
