Амударё туманида қурувчилар касб байрами кенг нишонланди

Янги Ўзбекистоннинг мафтункор ва жозибали қиёфасини яратиш ишларининг самарадорлигини қурувчилар меҳнатисиз тасаввур қилиб бўлмайди. Қурувчи-бунёдкорларнинг олийжаноб меҳнати билан барпо этилаётган янги турар жойлар, ишлаб чиқариш объектлари, йўл ва коммуникация тармоқлари, таълим, соғлиқни сақлаш, маданият ва спорт масканлари мамлакатимиз кўркига кўрк қўшиб, ҳаётимиз фаровон бўлишига хизмат қилмоқда.

Амударё туманидаги “Хон” тантаналар мажмуасида бўлиб ўтган Ўзбекистон Республикаси қурилиш соҳаси ходимлари кунига бағишланган тантанали маросимга моҳир қурувчи ва муҳандислар, уста ва меъморлар, лойиҳачи ва пудратчи ташкилотлар вакиллари таклиф қилинди.

Байрам тадбирида туман ҳокими Собир Хўжаметов туманимиздаги бунёдкорлик ишларига салмоқли ҳисса қўшаётган заҳматли қурилиш фидойилари, соҳа фахрийларини касб байрами билан табриклаб, уларга эзгу тилакларини билдирди.

Дарҳақиқат, бугун мамлакатимизнинг барча ҳудудларида, жумладан Амударё туманида ҳам катта бунёдкорлик ишлари амалга оширилмоқда. Қурилиш соҳасидаги бу жараён нафақат овул ва маҳаллаларимизнинг қиёфасини ўзгартирди, балки одамлар ҳаётига ҳам ўзгача мазмун-моҳият бағишламоқда. Айниқса, аҳолини арзон ва қулай турар жойлар билан таъминлаш бўйича мақсадли дастурлар доирасида намунали кўп қаватли уйлар, маданият ва санъат марказлари, спорт иншоотлари, тиббиёт муассасалари ва бошқа ижтимоий объектлар қуриляптики, бу бунёдкорлик ишлари ҳудудлар инфратузилмасини яхшилашга ҳам хизмат қиляпти. Албатта, ушбу имкониятлар мамлакатимизда амалга оширилаётган инсонпарвар ислоҳотларни ўзида акс эттиради.

Тантанали тадбирда, ўз иш фаолияти давомида юқори самарадорликка эришаётган бир қатор қурилиш, лойиҳа, пудратчи, буюртмачи ташкилотлар муассасалари ҳамда уларнинг фидойи ишчи-ходимлари туман ҳокимлиги томонидан ташаккурнома билан тақдирланди.

Амударё туманининг янада обод ва фаровон бўлишига ҳисса қўшиб келаётган соҳа фидойилари томонидан мазкур йилда ҳам режага кўра кенг кўламли бунёдкорлик ишлари амалга оширилмоқда.

Хусусан, бугунги кунда туман бўйича жами 58та объектларда қурилиш-таъмирлаш ишлари олиб борилмоқда.

Маълумот ўрнида, Инвестиция дастури доирасида Беруний маҳалласи ҳудудидаги 31-сонли мактабнинг эски 330 ўринли биносини реконструкция қилиш бўйича пудратчи ташкилот “Sanjar Diyor building” МЧЖ томонидан қурилиш ишлари амалга оширилмоқда.

Ушбу дастур доирасида Жумур овул маҳалласи ҳудудидаги 48-сонли мактабга қўшимча 240 ўринли бино ва спорт зал қуриш бўйича пудратчи ташкилот “Жумуртов тех таъмир сервис” МЧЖ томонидан қурилиш ишлари олиб борилмоқда.

Бундан ташқари, Бўз солма маҳалласи ҳудудида янгидан сув иншоотини қуриш ва 30 км узунликдаги ичимлик сув тармоқларини тортиш бўйича пудратчи ташкилот “Тупроққалъа махсус қурилиш” МЧЖ томонидан қурилиш ишлари бажарилмоқда.

Шунингдек, бунёдкорлик ишлари Қорамон маҳалласида ҳам амалга оширилмоқда. Пудратчи ташкилот “Mang‘it invest maksimum” МЧЖ томонидан мазкур ҳудудда янгидан 150 ўринли мактабгача таълим ташкилоти биносини қуриш ишлари олиб бориляпти.

Таъкидланганидек, жонажон ватанимизнинг янги қиёфасини барпо этиш ва юксак тараққиётини таъминлаш, ҳаётимизни янада обод ва фаровон этишда минг-минглаб бунёдкор инсонларнинг меҳнатини ҳеч нарса билан баҳолаб бўлмайди.

Соҳа фидойиларига кўтаринки кайфият улашиш мақсадида туманимизнинг таниқли эстрада хонандалари томонидан тақдим этилган концерт дастури байрамга янада завқ бағишлади.

Фурсатдан фойдаланиб, қурилиш соҳасининг қадрли вакилларини касб байрами билан яна бир бор табриклаймиз. Юртимиз равнақи, халқимиз фаровонлиги ва ҳудудлар ободлиги йўлида олиб бораётган шарафли вазифани бажаришда сизларга куч-қувват, улкан ғайрат ва шижоат тилаймиз.

Р.Абдуллаев, Амударё тумани ҳокимлигининг қурилиш, тўсиқларсиз муҳит яратиш, коммуникациялар,

коммунал хўжалик, экология ва кўкаламзорлаштириш масалалари бўйича бош мутахассиси.