34-сонли мактабда депутатликка номзодларнинг сайловчилар билан учрашуви бўлиб ўтди
Сайловлар демократик давлатларнинг асосий тамойилларидан бири ҳисобланади ва фуқаролик жамиятининг ривожланишида муҳим роль ўйнайди. Улар орқали фуқаролар ўзларининг сиёсий иродасини ифода этишади ва давлат ҳокимиятининг вакиллик органларини шакллантиришда иштирок этадилар.
2024 йилнинг 27 октябрь куни Ўзбекистонда муҳим сиёсий жараён – Олий Мажлис Қонунчилик палатаси, Қорақалпоғистон Республикаси Жўқорғи Кенгеси ва халқ депутатлари маҳаллий кенгашларига сайловлар ўтказилади. Сайловлар Ўзбекистон Республикаси Конституциясининг 128-моддаси ва Сайлов кодексига мувофиқ очиқ ва ошкора тарзда ўтказилади.
Айни кунларда мамлакатимиздаги барча сиёсий партиялар ва депутатликка номзодлар сайловолди ташвиқоти доирасида ҳудудларда аҳоли билан учрашувлар ўтказмоқда. Амударё туманидаги 34-сонли мактабда ҳам депутатликка номзодларнинг сайловчилар билан учрашуви бўлиб ўтди. Учрашувда Ўзбекистон Республикаси Олий Мажлиси Қонунчилик палатаси, Қорақалпоғистон Республикаси Жўқорғи Кенгеси ва халқ депутатлари Амударё туман Кенгаши депутатлигига номзодлар, уларнинг ишончли вакиллари ва сайловда иштирок этаётган 5 та сиёсий партияларнинг вакиллари иштирок этди.
Дастлаб депутатликка номзодларнинг ишончли вакиллари сўзга чиқиб, номзодларнинг таржимаи ҳоли ва сайловолди дастурлари билан таништирди. Депутатликка номзодлар ўзлари мансуб бўлган сиёсий партияларнинг мақсад ва вазифалари, сайловолди дастури ҳақида маълумотлар берди.
Айтиш жоизки, сайловларда иштирок этиш ҳар бир фуқаронинг конституциявий ҳуқуқи ҳисобланади ва бу демократик жараёнларнинг ажралмас қисмидир. Жорий йилги Парламент ва маҳаллий кенгашлар депутатлигига бўлиб ўтадиган сайлов мутлақо янгича Конституциявий муҳитда ўтаётганлиги билан аҳамиятлидир. Олий Мажлис Қонунчилик палатаси депутатлигига сайловларнинг аралаш сайлов тизими асосида ўтказилиши жараёнларнинг энг муҳим босқичларидан ҳисобланади.
Бундан ташқари, жорий йилги сайловлар янги қабул қилинган Сайлов кодекси асосида ўтказилади. Ушбу ҳужжатда сайловларни умумэътироф этилган халқаро стандартлар ва принциплар асосида демократик, очиқ-ошкора ўтказишга хизмат қиладиган ўттиздан ортиқ янги норма ва қоидалар жой олган. Илгари амалда бўлган кўплаб чекловлар чиқариб ташланган. Сайловлардаги ҳар бир овоз эътиборга олинади ва ҳар бир фуқаро давлат ҳокимияти вакиллик органларини шакллантиришда бевосита иштирок этади. Сайловларда очиқлик, ошкоралик ва шаффофлик амалда кенг таъминланади. Бу – участка сайлов комиссияларидан то Марказий сайлов комиссиясигача – барча даражадаги сайлов комиссиялари ўз ишини юксак масъулият ва энг юксак демократик принциплар асосида амалга оширишида ўз ифодасини топади.
Тадбирда маҳалла фаоллари сўзга чиқиб, сайловчиларни ўзлари муносиб деб билган партиялар ва номзодларга овоз беришга ҳамда сайловда фаол иштирок этишга чақирдилар. Қайд қилинганидек, сайловларда иштирок этиш ҳар бир фуқаронинг сиёсий фаоллигини намоён қилиш ва мамлакат келажагига таъсир кўрсатиш имкониятини беради. Шу билан бирга, сайловлар натижалари мамлакатнинг келгуси йиллардаги сиёсий йўналишини белгилаб беради ва депутатларга халқ манфаатларини ифода этишлари учун масъулият юклайди.
Конституциямизнинг 36-моддасига мувофиқ, Ўзбекистон Республикасининг фуқаролари жамият ва давлат ишларини бошқаришда бевосита ҳамда ўз вакиллари орқали иштирок этиш ҳуқуқига эга. Шундай экан, ҳар бир сайловчини давлат органларини демократик тарзда шакллантиришдек муҳим сиёсий жараёнда иштирок этишга, сайловларда ўзлари муносиб деб билган сиёсий партия ва номзодларга овоз беришга чақириб қоламиз.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
