ОНА ТАБИАТНИ АСРАЙЛИК!
Қипчоқ Давлат ўрмон хўжалигида "Ўрмон тўғрисида”ги, "Табиатни муҳофаза қилиш тўғрисида”ги, Ўзбекистон Республикаси "Экологик назорат тўғрисида”ги Қонунларининг бажарилишини таъминлаш борасида ижобий ишлар амалга оширилмоқда. Давлат ўрмон хўжалигинининг давлат ўрмон фонди майдонлари жами 16469 гектар бўлиб, шундан ўрмон билан қопланган майдонлари 3124 гектарни, маданий ўрмонзорлар 180 гектарни, сийрак ўрмонзорлар 480,2, яйловлар 2800, қумликлар 2576, бошқа ерлар эса 6878 гектарни ташкил қилади. Ўрмон хўжалигида Назархон ва Қипчоқ ўрмон тузилмалари мавжуд бўлиб, ўрмон фонди ерлари тўртта ўрмон айланмаларига бириктирилган. Ўрмон хўжалигининг асосий вазифалари мавжуд ўрмонларни сақлаш, қўриқлаш, кўпайтириш, маданий ўрмонлар барпо қилиш, ниҳолхоналарда мевали, доривор ва манзарали дарахт кўчатларини етиштиришдан иборат. Ўрмон хўжалигимизда "Қипчоқ Давлат ўрмон хўжалигининг 2015-2017 йилларга мўлжалланган ривожланиш дастури” асосида режавий ишлар амалга оширилмоқда.
Дастурда жорий йилда 65 гектар майдонда маданий ўрмонзорлар бунёд этиш, 2,3 гектарга мевали ва манзарали дарахтлар уруғидан, 0,7 гектар ерга қаламча экиш, ниҳолхоналарни ташкил этиш ҳамда ушбу дастур асосида доривор ўсимликлар туркумига кирадиган 30 гектар ширинмия (бўён) плантацияси, 1,4 гектар ерга чилонжийда кўчатларини экишга киришилди. 10 гектар ерга ошқовоқ ва 5 гектар ерга бошқа қишлоқ хўжалиги экинларидан экиш, асаларичилик, паррандачилик ва балиқчилик маҳсулотларини етиштириш ҳамда 2015 йилда 100 тонна ширинмия (бўёнтомир), 500 килограмм исириқ каби доривор ўсимликлар тайёрлаш режалаштирилмоқда. Юқорида кўрсатиб ўтилган режаларни амалга ошириш, ерларни экишга тайёрлаш, техника таъминоти, ёқилғи-мойлаш манбалари заҳирасини яратиш, тайёрланадиган доривор ва озуқабоп ўсимликлар хом-ашёсини сотиш бўйича "Ўзфармсаноат” ДАК корхоналари билан контрактация шартномаларини тузиш ишлари олиб борилди.
Жорий йилнинг 1 апрель ҳолатига ўрмон хўжалигининг қум ҳудудига 38 гектар ерга саксовул кўчатлари, ниҳолхоналарга эса 14 турдаги мевали ва манзарали дарахт уруғлари экилди. "Табиатни муҳофаза қилиш тўғрисида”ги, "Ўрмон тўғрисида”ги ва "Экологик назорат тўғрисида”ги Ўзбекистон Республикаси Қонунлари ижросини таъминлаш мақсадида ўқув муассасалари ва аҳоли ўртасида кенг тушунтириш-тарғибот ишлари олиб борилганлиги боис, туманимизда йил сайин яшил дарахтзорлар майдони кенгайиб бормоқда.
Ўрмонзорларга кўп миқдорда зиён етказадиган ҳолат - бу ўрмон ёнғини бўлиб, ўсимлик ва ҳайвонот дунёси жиддий зарарланади. Ўрмонларда ўрмон ёнғинининг олдини олиш ва унга қарши курашни кучайтириш мақсадида ҳар йилнинг март ойидан бошлаб ўрмон ёнғини хавфсизлиги мавсуми бошланади. Туман ҳокимининг "Қипчоқ ўрмон хўжалигига қарашли ўрмонзорларда ёнғиннинг олдини олиш ва унга қарши курашни кучайтириш тўғрисида”ги қарори асосида корхона-ташкилотлар, деҳқон-фермер хўжаликлари, овул, маҳалла фуқаролар йиғинлари раҳбарларига, шу ҳудудда яшовчи аҳолига мавжуд ўрмон дарахтларини, ўсимлик ва ҳайвонот дунёсини муҳофаза қилиш, ёнғинга қарши чора-тадбирлар кўриш, туманда экологик муҳитни яхшилаш бўйича кўрсатмалар берилди.
Ўрмон фонди ерлари билан чегарадош ҳудудларда дала атрофларини, ариқ ва зовурларни тозалаш пайтида ёнғиннинг олдини олиш мақсадида қамишзорларга ўт қўймаслик, аҳоли ўртасида тарғибот-ташвиқот ишларини олиб бориш ҳамда ҳуқуқни муҳофаза қилувчи органлар ходимларига ўрмон дарахтларини ўзбошимчалик билан ноқонуний чопиб, ўғирлаш ҳолатлари, броконьерлар ва ўрмон қонунбузарларига нисбатан тегишли чоралар кўриш топширилди.
Ўтган йили ўрмон қўриқчилари томонидан 6 та ўзбошимчалик билан дарахт кесиш ҳолатлари аниқланиб, 4145,6 минг сўмлик ўсимлик дунёсига келтирилган зарар айбдорлардан ундирилди.
2014 йил давомида 58 гектар ердаги ўрмонзорлар табиий тикланишига эришилди, ўрмон зараркунандаларига қарши кураш ишлари 168 гектар майдонда олиб борилди.
Хулоса ўрнида айтиш керакки, ўрмон - миллий бойлигимиз. Уни асраш эса бурчимиздир.
Р.ДОСМАНОВ,
Қипчоқ давлат ўрмон хўжалиги директори в.в.б.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
