КЕКСАЛАР ДУОСИНИ ОЛАЁТГАН МАҲАЛЛАДОШЛАР

Бизнинг Ойбек номли маҳалла фуқаролар йиғини кенгаши 15 нафар кишидан иборат бўлиб, ҳамкор ташкилотлар, жамоатчилик ҳамда маҳалла фаоллари билан ҳамкорликда бир оила вакилларидек бамаслаҳат иш олиб борадилар. Маҳалламизда 3546 нафардан зиёд ҳар хил миллат вакиллари бўлиб, 8 нафар меҳнат фахрийлари, 60 ёшдан ошган 154 нафар отахон ва онахонларимиз фарзандлари эъзозида яшашади.

"Кексаларни эъзозлаш йили” Давлат Дастурида "Ҳеч ким меҳр-эътибордан четда қолмасин!”, "Кексаларнинг дуосини олайлик”, "Қарияларимиз - хонадонимиз файзи”, "Меҳр ва муҳаббатда кечаётган умр”, "Қариси бор уйнинг париси бор”, "Уч авлод учрашуви” каби бир қанча акциялар ўтказиш белгилаб берилган. Кенгаш аъзоларининг қарори билан маҳалламизда "Ҳеч ким меҳр-эътибордан четда қолмасин” акцияси бўйича 60 ёшдан ошган 88 нафар онахонлар билан хомийлар ёрдамида "Орзу” тўйхонасида "Бир пиёла чой устида” суҳбат ўтказилди ва 55-сонли мактабнинг "Ораста қизлар” гуруҳи ва ўқувчилари, 6-сонли МТМ тарбияланувчиларининг "Зумрадойлар” гуруҳи томонидан тайёрланган концерт дастурлари намойиш этилди. Ҳудудга бириктирилган шифокорлардан Моҳимжон Абдураҳмонова, ҳамширалар Сарагул Тангирберганова, Феруза Бекимбетовалар иштирокида Ойбек номли маҳалла фуқаролар йиғини биносида 57 нафар 60 ёшдан ошган фуқаролар тиббий кўрикдан ўтказилиб, 50 нафар онахон ва отахонлар гепатит Б га қарши вакцина билан эмланди.

Бундан ташқари, "Кексалар дуосини олайлик” деб номланган акция ўтказилиб, 53 нафар кекса отахонлар учун 6-сонли МТМ тарбияланувчилари томонидан концерт дастури намойиш этилди, дастурхонга ош тортилди.

Ёқубов Маткарим бобо, Машарипов Раҳим бобо ва Бозорбоев Солий боболар фронт ортида қилган меҳнатлари ва бошидан ўтган қийинчиликлар ҳақида гапириб бердилар ҳамда ҳозирги фаровон ҳаётга етказганига шукроналар айтиб, Юртбошимиз кексаларни эъзозлаётгани учун мингдан-минг раҳмат айтиб, дуо қилдилар. Бу тадбирда туман Мудофаа бўлими томонидан 2 нафар мутахассис иштирок этишиб, кексаларни байрам билан табрикладилар.

Қурбониёзов Кенжабой, Авезов Йўлдош, Жабборов Эримбат, Эрдошев Қурбонбой, Аллаёров Тўрабой оталар эл-юрт фаровонлиги учун қилган меҳнатлари самарасини кўриб, ҳозирги тинч ва осойишта замонларга етказганига шукроналик билан, дилдан суҳбатлашдилар. Ҳудуддаги 55-сонли мактабда ташкил этилган "Ёрдамчи камолотчилар” гуруҳи аъзоларидан 7 нафар болалар келиб, ота-хонларга хизмат кўрсатишди. Тадбирдан кейин Жабборов Саъдулла бобонинг томарқасини тартибга келтириб, картошка экишга ёрдамлашдилар ва отахонларнинг дуоларини олдилар.

Маҳаллада яшовчи "Жайхун Аму мебель” МЧЖ раҳбари, тадбиркор уста Ражаб ака Матсапоев 8 нафар кекса онахон ва отахонларга ўз совғасини топширди. 14 апрель куни маҳалла фаоли Соатбой Далимов ҳомийлигида маҳаллада яшовчи 39 нафар кексалар "Шайх Жалил бобо” зиёратгоҳига боришди. Кексалар маҳалладошлари кўрсатаётган ҳурмат ва эъзоздан жуда хурсанд бўлишди.

Моможон РАҲИМОВА,

Ойбек номли МФЙ маслаҳатчиси.

(Фото - http://fikr.uz)