Ёш билимдонлар “Заковат”да беллашди

Юртимизда ёшларнинг интеллектуал салоҳиятини юксалтириш, билим ва дунёқарашини кенгайтириш мақсадида турли лойиҳалар амалга оширилмоқда. Айниқса, заковат, ҳозиржавоблик, тезкор тафаккур ва билимга чанқоқликни кучайтиришга хизмат қиладиган “Заковат” интеллектуал ўйини тобора оммалашиб бормоқда. Бу борадаги изчил саъй-ҳаракатлар, давлат томонидан яратилаётган имкониятлар ёшларимизни янада фаолликка ундамоқда.

Ўзбекистон Республикаси Президентининг 2022 йил 20 январдаги “Заковат” интеллектуал ўйинини аҳоли ўртасида оммавий-маърифий ҳаракатга айлантириш ва бошқа интеллектуал мусобақаларни ривожлантиришга доир қарори муҳим ҳуқуқий асос бўлди. Қарор асосида интеллектуал ўйинлар билан шуғулланаётган ўқувчи ва талабалар учун бир қатор имтиёзлар белгиланди. Жумладан, республика босқичида ғолиб бўлган ёшлар олий таълим муассасаларига тест синовларисиз, базавий тўлов-контракт асосида ўқишга қабул қилинади.

Ана шундай эзгу мақсадларга хизмат қиладиган навбатдаги йирик интеллектуал мусобақа – “Заковат” ўйинининг Амударё тумани босқичи жорий йилнинг 15 апрель куни бўлиб ўтди. “Олтин сарой” тантаналар мажмуасида ташкил этилган мазкур мусобақа кўтаринки руҳда, юксак ташкилий савияда ўтказилди. Унда тумандаги 86 та умумтаълим мактабларининг ҳар биридан интеллектуал жамоалар иштирок этди. Ҳар бир жамоа ғолиблик учун муносиб кураш олиб бориб, билим, ҳозиржавоблик, мантиқий тафаккур ва саволларга ёндашиш қобилиятини намоён этди.

Мусобақани “Заковат” интеллектуал клуби нодавлат нотижорат ташкилотининг Қорақалпоғистон Республикаси бўйича координатори Дилшод Жуманиязов бошқариб борди. Учрашув давомида иштирокчилар тарих, адабиёт, мантиқ, фалсафа ва ижтимоий мавзуларга оид турли саволларда ўз салоҳиятларини синовдан ўтказишди. Саволлар чуқур фикрлаш, хотира ва билимни бирлаштирган ҳолда ечим топишни талаб қилди. Жамоалар эса ҳар бир саволга пухта тайёргарлик билан жавоб топишга ҳаракат қилишди.

Бу мусобақа нафақат билимлар беллашуви, балки ёшлар орасида соғлом рақобат, бир-биридан ўрганиш ва жамоавий фикрлаш маданиятини шакллантирувчи муҳим майдон бўлди. Айниқса, овул ва маҳаллалардаги иқтидорли ёшлар ушбу ўйинда фаол иштирок этиб, ўз қизиқишларини реал натижалар билан исботлашди.

Мусобақа ниҳоясида ҳакамлар ҳайъати томонидан энг фаол ва билимли жамоалар аниқланиб, ғолиб ва фаол иштирокилар тақдирланди. Ғолиб жамоа Қорақалпоғистон Республикаси босқичида иштирок этиш ҳуқуқини қўлга киритди.

Дарҳақиқат, бундай мусобақалар нафақат ёшларнинг интеллектуал салоҳиятини ошириш, балки улар орасида дўстлик, фикр алмашиш ва жамоавий ишлаш кўникмаларини мустаҳкамлашда ҳам муҳим аҳамият касб этади. “Заковат” ўйини эса бугунги ёшларнинг билимга бўлган қизиқишини ёритувчи, келажак пойдеворини мустаҳкамловчи ижтимоий-маънавий кўприк бўлиб хизмат қилмоқда.

Шоҳзод Қурбонбоев.