СПОРТ МУРАББИЙЛАРИ БЎСМ БИРИНЧИЛИГИ УЧУН ЎЗАРО БЕЛЛАШДИЛАР

Спорт соҳасида иқтидорли, кучли спортчиларни тайёрлаш, турли мусобақаларда спорт мактаби, қолаверса, ўз устозларининг шаънини ҳимоя қилиб, ғолиблик шоҳсупаларидан муносиб жой оладиган шогирдлар етиштириш учун, аввало спорт мураббийлари ўз йўналишлари бўйича ҳам жисмоний, ҳам маънавий етукликка эга бўлишлари талаб этилади. Шу боис, спорт мураббийлари доимий равишда ўз устларида ишлаш орқали жисмоний чиниқиб, тажрибаларини бойитиб боришади.

Амударё туманидаги Чоршам Тожимуродов раҳбарлик қилаётган Болалар-ўсмирлар спорт мактаби томонидан бу борада амалга оширилаётган ишлар эътиборга муносиб.

Болалар-ўсмирлар спорт мактабидаги олимпиа спорт турлари бўйича турли йўналишларда фаолият олиб борувчи спорт мураббийлари ўртасида тез-тез спорт мактаби биринчилиги мусобақалари ўтказилиб, илғор тренернинг тажрибалари оммалаштирилиб борилаётгани боис, мактаб тарбияланувчилари орасидан Қорақалпоғистон ва Ўзбекистон миқёсидаги мусобақалар, чемпионат ва кубоклар ғолиблари етишиб чиқмоқда.

Жорий йилнинг 18 февраль санасида Амударё Халқ таълими бўлими тасарруфидаги 82-сонли умумтаълим мактаби спорт залида Болалар-ўсмирлар спорт мактаби ходимлари ва мураббийлари ўртасида спорт мактаби биринчилиги мусобақалари ўтказилди.

Ёшлар ўртасида соғлом турмуш тарзини тарғиб қилиш, уларнинг бўш вақтларини мазмунли ўтказишларига кўмаклашиш, уюшмаган ёшларни турли спорт тўгаракларига жалб этиш мақсадида режали равишда ташкиллаштирилган мазкур мусобақа муросасиз, қизғин баҳсларга бой қизиқарли тарзда ўтказилди.

Спорт мактабининг тақвим-иш режасига асосан ҳар ҳафтанинг шанба кунларида ташкил этиладиган мазкур мусобақанинг бу галги иштирокчилари спортнинг бадминтон тури бўйича ўзаро куч синашдилар.

Мусобақада 50 нафардан зиёд ишчи-ходим ва спорт мураббийлари иштирок этишди ва Умида Бозорбоева бош ҳакам, Зуҳра Шомуродова бош ҳакам ёрдамчиси сифатида спорт мураббийларининг ҳар бир ҳаракатини одилона бошқариб боришди.

Эркаклар ўртасида бўлиб ўтган беллашувлар ниҳоятда қизиқарли таассуротларга бой бўлди.

Мусобақанинг финал баҳсида стол тенниси тренери Бунёд Камолов ва Акбар Мавлоновлар ўзаро куч синашдилар ва бу учрашувда Акбар Мавлонов ғолиб чиқиб, 1-ўринни эгаллади. 2-ўрин Бунёд Камоловга, 3-ўрин Хурсанд Юсуповга насиб этди.

Аёллар ўртасида 1-ўринни волейбол спорти тренери Сабоҳат Собирова эгаллади. 2-ўрин Ҳамида Ражабовага, 3-ўрин Моҳира Хўжаниёзова ва Бахира Баянбоевага насиб этди.

Ғолиб ва совриндорларни Спорт мактаби директори Чоршам Тожимурдов диплом ва қимматбаҳо совғалар билан тақдирланди.

Шунингдек, мусобақанинг бош ҳаками Умида Бозорбоева ва Зуҳра Шомуродовалар мусобақани одилона бошқарганлиги учун Спорт мактаби томонидан ташаккурнома билан тақдирландилар.

Робия ЙЎЛДОШЕВА.