SPORT MURABBIYLARI BOʻSM BIRINChILIGI UChUN OʻZARO BELLAShDILAR

Sport sohasida iqtidorli, kuchli sportchilarni tayyorlash, turli musobaqalarda sport maktabi, qolaversa, oʻz ustozlarining shaʼnini himoya qilib, gʻoliblik shohsupalaridan munosib joy oladigan shogirdlar yetishtirish uchun, avvalo sport murabbiylari oʻz yoʻnalishlari boʻyicha ham jismoniy, ham maʼnaviy yetuklikka ega boʻlishlari talab etiladi. Shu bois, sport murabbiylari doimiy ravishda oʻz ustlarida ishlash orqali jismoniy chiniqib, tajribalarini boyitib borishadi.

Amudaryo tumanidagi Chorsham Tojimurodov rahbarlik qilayotgan Bolalar-oʻsmirlar sport maktabi tomonidan bu borada amalga oshirilayotgan ishlar eʼtiborga munosib.

Bolalar-oʻsmirlar sport maktabidagi olimpia sport turlari boʻyicha turli yoʻnalishlarda faoliyat olib boruvchi sport murabbiylari oʻrtasida tez-tez sport maktabi birinchiligi musobaqalari oʻtkazilib, ilgʻor trenerning tajribalari ommalashtirilib borilayotgani bois, maktab tarbiyalanuvchilari orasidan Qoraqalpogʻiston va Oʻzbekiston miqyosidagi musobaqalar, chempionat va kuboklar gʻoliblari yetishib chiqmoqda.

Joriy yilning 18-fevral sanasida Amudaryo Xalq taʼlimi boʻlimi tasarrufidagi 82-sonli umumtaʼlim maktabi sport zalida Bolalar-oʻsmirlar sport maktabi xodimlari va murabbiylari oʻrtasida sport maktabi birinchiligi musobaqalari oʻtkazildi.

Yoshlar oʻrtasida sogʻlom turmush tarzini targʻib qilish, ularning boʻsh vaqtlarini mazmunli oʻtkazishlariga koʻmaklashish, uyushmagan yoshlarni turli sport toʻgaraklariga jalb etish maqsadida rejali ravishda tashkillashtirilgan mazkur musobaqa murosasiz, qizgʻin bahslarga boy qiziqarli tarzda oʻtkazildi.

Sport maktabining taqvim-ish rejasiga asosan har haftaning shanba kunlarida tashkil etiladigan mazkur musobaqaning bu galgi ishtirokchilari sportning badminton turi boʻyicha oʻzaro kuch sinashdilar.

Musobaqada 50 nafardan ziyod ishchi-xodim va sport murabbiylari ishtirok etishdi va Umida Bozorboyeva bosh hakam, Zuhra Shomurodova bosh hakam yordamchisi sifatida sport murabbiylarining har bir harakatini odilona boshqarib borishdi.

Erkaklar oʻrtasida boʻlib oʻtgan bellashuvlar nihoyatda qiziqarli taassurotlarga boy boʻldi.

Musobaqaning final bahsida stol tennisi treneri Bunyod Kamolov va Akbar Mavlonovlar oʻzaro kuch sinashdilar va bu uchrashuvda Akbar Mavlonov gʻolib chiqib, 1-oʻrinni egalladi. 2-oʻrin Bunyod Kamolovga, 3-oʻrin Xursand Yusupovga nasib etdi.

Ayollar oʻrtasida 1-oʻrinni voleybol sporti treneri Sabohat Sobirova egalladi. 2-oʻrin Hamida Rajabovaga, 3-oʻrin Mohira Xoʻjaniyozova va Baxira Bayanboyevaga nasib etdi.

Gʻolib va sovrindorlarni Sport maktabi direktori Chorsham Tojimurdov diplom va qimmatbaho sovgʻalar bilan taqdirlandi.

Shuningdek, musobaqaning bosh hakami Umida Bozorboyeva va Zuhra Shomurodovalar musobaqani odilona boshqarganligi uchun Sport maktabi tomonidan tashakkurnoma bilan taqdirlandilar.

Robiya YOʻLDOShEVA.