Фуқаролик жамияти ҳафталиги бошланиши муносабати билан байрам тадбири ташкил этилди
18 ноябрь куни Нукус шаҳрида мамлакатимиз ижтимоий-сиёсий ҳаётидаги муҳим воқелик – "Фуқаролик жамияти ҳафталиги"нинг бошланиши муносабати билан тантанали байрам тадбири ташкил этилди. Ушбу йирик анжуман давлат ва жамият ўртасидаги мулоқотни янги босқичга олиб чиқиш, нодавлат нотижорат ташкилотларининг мамлакат тараққиётидаги ўрнини мустаҳкамлаш мақсадида ташкил этилмоқда. Тадбирда фуқаролик жамияти институтлари, маҳалла фаоллари, давлат ташкилотлари мутасаддилари, оммавий ахборот воситалари ва кенг жамоатчилик вакиллари иштирок этиб, ўзаро ҳамкорликнинг янги қирраларини муҳокама қилдилар.
Тадбир ногиронлиги бўлган шахслар томонидан меҳр ва маҳорат билан тайёрланган маҳсулотлар ярмаркаси, давлат гранти маблағлари ҳисобига амалга оширилган ижтимоий аҳамиятга молик лойиҳалар тақдимоти ҳамда ҳудуддаги миллий маданият марказларининг ранг-баранг чиқишларидан иборат кўргазма билан бошланди. Ушбу кўргазма нафақат ютуқлар намойиши, балки инклюзив жамият ва миллатларларо тотувликнинг ёрқин ифодасига айланди.
Тантанали маросимда Қорақалпоғистон Республикаси Жўқорғи Кенгесининг Ижтимоий-маданий ривожланиш, ёшлар сиёсати ва жамоат бирлашмалари масалалари қўмитаси раиси Мурат Атамуратов сўзга чиқиб, барча йиғилганларни "Фуқаролик жамияти ҳафталиги"нинг бошланиши билан самимий қутлади. У ўз нутқида Ўзбекистон Республикаси Президентининг 2024 йил 26 августдаги "Фуқаролик жамияти институтларини давлат томонидан қўллаб-қувватлаш тизимини янада такомиллаштириш чора-тадбирлари тўғрисида"ги 124-сонли Фармони соҳа ривожида янги даврни бошлаб берганини алоҳида таъкидлади.
Мазкур ҳужжатга мувофиқ, эндиликда ҳар йили декабрь ойининг биринчи ҳафтаси "Фуқаролик жамияти ҳафталиги" сифатида кенг нишонланиши белгиланган. Бу йилги тадбирлар республикамиз ҳудудларидан бошланиб, 1-5 декабрь кунлари Тошкент шаҳрида якуний босқич билан давом этиши режалаштирилган. Ҳафталикнинг айнан Қорақалпоғистондан старт олиши ҳам бежиз эмас, чунки бугунги кунда ушбу ҳудудда фуқаролик жамияти институтлари фаол ва самарали иш олиб бормоқда.
Тадбир давомида Олий Мажлис ҳузуридаги Жамоат фондининг бўлим бошлиғи Зуҳра Ибрагимова сўзга чиқиб, соҳани молиявий қўллаб-қувватлаш борасидаги рақамларга тўхталди. Таъкидланишича, биргина жорий йилнинг ўзида мамлакат миқёсида фуқаролик жамияти институтларини қўллаб-қувватлашга рекорд даражада – 1 триллион 200 миллиард сўм маблағ йўналтирилган. Хусусан, Қорақалпоғистон Республикасида давлат ижтимоий буюртмаси шаклида 2 та ва давлат гранти шаклида 19 та лойиҳа жами 3 миллиард 724 миллион сўм миқдорида молиялаштирилган бўлиб, ҳозирги вақтда улардан 14 таси муваффақиятли якунланган. Бу рақамлар давлатнинг учинчи сектор ривожига бўлган жиддий эътиборидан далолат беради.
Маросимнинг давомида жамият ҳаётида фаол иштирок этаётган, долзарб муаммолар ечимида ташаббус кўрсатаётган бир гуруҳ нодавлат нотижорат ташкилотлари ва оммавий ахборот воситалари вакилларига ташаккурномалар ҳамда эсдалик совғалари топширилди. Шундан сўнг, Қорақалпоғистон Республикаси Маданият вазирлиги томонидан тайёрланган концерт дастури намойиш этилди. Янграган куй-қўшиқларда дўстлик, тинчлик ва ҳамжиҳатлик ғоялари тараннум этилиб, иштирокчиларга кўтаринки кайфият улашилди.
Ҳафталик дастурига мувофиқ Адлия вазирлигида очиқ мулоқот, Нодавлат нотижорат ташкилотлари миллий форуми, турли мавзулардаги конференциялар ўтказилиши кўзда тутилган. Шунингдек, имконияти чекланган шахсларнинг қўл меҳнати маҳсулотлари ярмаркаси, спорт мусобақалари ва хайрия акциялари ташкил этилади.
Ушбу ҳафталик давлат органлари ва фуқаролик жамияти институтлари ўртасида самарали мулоқот механизмини йўлга қўйиш, мавжуд муаммоларни тизимли таҳлил қилиш ҳамда мамлакат тараққиёти учун хизмат қиладиган истиқболли ғояларни ҳаётга татбиқ этишда муҳим платформа вазифасини ўтайди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
