Нурли манзилларга интилган йигит

Гўдакнинг дунёга келиши, илк қадами, илк сўзи яқинлари учун қанчалик қувонарли бўлса, ҳаёти давомидаги интилишлари, эзгу ишларга қўйган илк қадами, илк муваффақиятлари ҳам шунчалик қимматлидир.

Манғит шаҳрининг "Чордара” маҳалласида истиқомат қилувчи халқ таълими фахрийси Гулчеҳра опа Саидова ва Файзулла ака Давлатовлар икки нафар ўғил фарзандларини мўмин-қобил, меҳнатсевар, илмга, янгиликка интилувчан қилиб тарбиялашга ҳаракат қилишди. Эзгу умидлари эса изсиз кетмади. Айниқса кичкинаси, жорий йилда Манғит Иқтисодиёт коллежини солиқ ва солиққа тортиш йўналиши бўйича имтиёзли диплом билан тугатган Аброрнинг эришаётган ютуқлари уларни чексиз қувончга беламоқда.

Аброр мамлакатимизда ёшларнинг илм олиши, ўз интеллектуал салоҳиятини намоён этиши учун яратилган имкониятлардан унумли  фойдаланишга ҳаракат қилувчи ёшларнинг бири. У 36-сонли мактабда ҳам барча фанлардан аъло баҳоларга ўқиди. Фан олимпиадаларида туман ғолиби бўлди. Бўш вақтларида дарс машғулотларида олган билимларини мустаҳкамлаш учун тинмай ўқиди, 1-Болалар ва ўсмирлар спорт мактабининг бокс тўгарагининг фаол аъзоси бўлди.

Бокс билан шуғулланганлиги унинг илм олиши йўлидаги интилишларига кенг йўл очди. Боиси, спорт ўсмирларни маънан ва жисмонан чиниқтиради, машқлар давомидаги тинимсиз ҳаракатлар иродасини мустаҳкамлаб, ҳеч бир муваффақият ўз-ўзидан келмаслигини англатиб, олға интилиш кўникмасини шакллантиради.

Буларни Аброр Давлатов ўқувчилик даврида илк бора спорт мактаби, туман миқёсида ўтказилган мусобақаларда ўз вазн тоифасида ғолиб бўлган дамларида чуқур англаб етди. Шунинг учунми, коллежда ўқиш жараёнида ҳам бокс билан шуғуланишни, чиниқишга интилишни канда қилмади. У таълим олган солиқ ва солиққа тортиш гуруҳи раҳбари Зулфия Хидирбоева гуруҳдаги барча ўқувчиларга ҳам эътиборли бўлса-да, алоҳида қобилияти яққол сезилиб турган Аброр билан жиддий шуғулланди. Нафақат илм олишда, балки жамоат ишларида ҳам фаол, интилувчан, гуруҳдошлари, коллежнинг барча ўқувчилари билан дўст, ҳамфикр бўлган йигит 2-босқичдан бошлаб коллежнинг "Камолот” бошланғич ташкилоти етакчиси бўлди.

- Мустақиллик йилларида ёшларнинг комил инсонлар бўлиб вояга етишлари учун мамлакатимизда яратилаётган шароитлар, имкониятлар ўзининг қувонарли натижаларини бераётир. Мен раҳбарлик қилган гуруҳни 30 нафар ёшлар битириб чиққан бўлса, шуларнинг деярли барчаси ўз соҳасини мукаммал эгаллашди. Аброр ва яна бир ўқувчимиз уч йил давомида барча фанлардан аъло баҳоларга ўқиб, коллежни имтиёзли диплом билан тугатишди, - дейди Зулфия Хидирбоева фахр билан.

Ҳа, интилишда ҳикмат кўп. Буни Аброр ўзининг коллежда ўқиши жараёнида жуда чуқур ҳис этди. У 2014 йилда "Юрт келажаги” кўрик танловининг "Тадбиркорликни ривожлантириш бўйича лойиҳалар” йўналишида қатнашиб, туман босқичи ғолиби, Қорақалпоғистон Республикаси босқичида эса учинчи ўринни эгаллаб, якунловчи – мамлакат босқичида қатнашишга муваффақ бўлди ва диплом, махсус сертификат олишга эришди. Худди шу йил ўрта махсус, касб-ҳунар таълими ўқувчилари ўртасида тадбиркорликни ривожлантириш мақсадида ўтказилган "Менинг бизнес ғоям” танловининг туман босқичи ғолиби бўлиб, Қорақалпоғистон босқичида ҳам махсус сертификатни қўлга киритди.

Шунингдек, 2015 йил 12 февраль куни Нукус шаҳрида Тошкент Давлат Иқтисодиёт Университети томонидан ўтказилган "Энг яхши бизнес ғоя” кўрик-танловининг махсус сертификатини ҳам енгиб олишга муваффақ бўлди.

Аброр Давлатов барча муваффақиятлари сирини ўқиб-ўрганишда, олға интилишда, деб ҳисоблайди ва илм олишни давом эттиришни ўз олдига мақсад қилиб қўйган. Шу ниятда жорий йилда Нукус Давлат Университетининг ҳуқуқшунослик факультетига ҳужжат топширди. Нияти эса юрт корига ярайдиган фарзанд бўлиш.

Юрт корига яраш! Ҳунари, илми, ҳалол меҳнати билан ана шундай улуғ хизматга бел боғлаган оловқалб ёшлар билан суҳбатлашишдан одамнинг кўнгли тоғдай кўтарилади. Боиси – улар эртанги кунимиз, Ватанимизнинг келажаги.

- Мен кўпгина хорижий давлат-лардаги ёшларга яратилаётган имкониятлар билан қизиқдим. Ўқиб кўриб англадимки, ҳеч қайси юртда бизнинг мамлакатимиздагичалик ёшларга ғамхўрлик йўқ. Тўғри, уларнинг илмда, изланишда иқтидорли ёшлари бор. Бироқ, улар давлатининг эмас, ота-онасининг маблағи эвазига ўқиб-ўрганиб, камолга келишади. Юртимиздаги тенгдошларим, барча ёшлар давлатимизнинг ғамхўрлигини қадрлашини, унумли фойдаланишини тилар эдим, - дейди Аброр куюнчаклик билан.

Аброр Давлатов билан суҳбатлашган киши унинг ўз келажаги сари дадил қадамлар қўяётганлигини яққол англайди, беихтиёр қанийди, ҳамма ёшларимиз ҳам унга ўхшаса, дея ҳавас қилади, Аброрнинг ўз келажаги сари қўяётган дадил қадамлари уни нурли манзилларга етказишига ишонади.

Ойгул РАЖАБОВА.