“Раҳбар ва ёшлар” учрашувида амударёлик йигит-қизларнинг муаммоларига ечим изланди
Мамлакатимизда ёшлар масалалари давлат сиёсати даражасига кўтарилган бўлиб, уларнинг ҳуқуқлари, манфаатлари ва ташаббусларини қўллаб-қувватлаш йўлида кенг кўламли ишлар амалга оширилмоқда. Хусусан, келажагимиз эгаларининг таълим олиши, тадбиркорлик билан шуғулланиши, касб-ҳунар ўрганиши ва уларнинг ижтимоий фаоллигини ошириш учун яратилаётган имкониятлар ёшларнинг барча соҳалардаги фаол иштирокига кенг йўл очмоқда. Шу мақсадда ташкил этилган “Раҳбар ва ёшлар” учрашуви ёшлар билан бевосита мулоқот қилиш, уларнинг муаммолари ва таклифларини ўрганиш, шунингдек, янги ташаббусларни қўллаб-қувватлаш учун муҳим платформа бўлиб хизмат қиляпти.
22 январь куни Амударё туман Маданият бўлими биносида ҳам Ёшлар ишлари агентлиги туман бўлими ташаббуси билан шундай учрашув ташкил қилинди. Учрашув ёшларнинг мурожаатларини қабул қилиш, шунингдек, 2025 йилда ёшлар сиёсати соҳасида амалга ошириладиган чора-тадбирларни ишлаб чиқиш учун уларнинг таклифларини ўрганиш мақсадида ташкил қилинди.
Тадбирда Амударё тумани ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодирбек Камолов, Ўзбекистон Ёшлар ишлари агентлигининг маҳалладаги ёшлар етакчилари фаолиятини мувофиқлаштириш ва методологик таъминлаш бўлими бош мутахассиси Шаҳзод Қаюмов, агентликнинг Қорақалпоғистон бўлими бош мутахассиси Анвар Маратов, Ёшлар ишлари агентлиги туман бўлими бошлиғи Бекзод Ўринбоев, овул ва маҳаллалардаги ёшлар етакчилари ҳамда туманнинг барча овул ва маҳаллаларидан ёшлар иштирок этдилар.
Мулоқот давомида туман ҳокимининг ўринбосари Нодирбек Камолов сўзга чиқиб, туманимизда ёшлар учун яратилаётган кенг имкониятлар ва давлат сиёсатининг ёшларни ҳар томонлама қўллаб-қувватлашдаги аҳамияти ҳақида сўз юритди. Ҳоким ўринбосари ҳар бир раҳбар ёшлар муаммоларига ечим топишга масъул эканлигини таъкидлаб, бу каби мулоқотлар ёшларнинг ташаббусларини рўёбга чиқаришга замин яратишини қайд этди.
Тадбир давомида ёшлар ўз муаммолари ва таклифлари билан масъулларга мурожаат қилишди. Мурожаатлар асосан ёш тадбиркорларни қўллаб-қувватлаш, бизнес учун ер ҳамда имтиёзли кредитлар ажратиш масалаларида бўлди.
Шунингдек, туманда хизмат кўрсатиш соҳасини ривожлантириш мақсадида Call Center лойиҳасини амалга ошириш таклифи илгари сурилди. Бу орқали турли хизмат кўрсатувчи ходимларни бир тизимга жамлаш ва аҳолига қулай хизмат кўрсатиш имкониятини яратиш кўзда тутилган.
Инфратузилмани яхшилаш бўйича ҳам бир қатор таклифлар берилди. Хусусан, Аёқчи маҳалласидаги саноат иншоотларини хусусийлаштириш ва таъмирлаш орқали янги иш ўринларини яратиш, шунингдек, 63-сонли мактабга спорт зал қуриб, ёшларнинг бўш вақтларини мазмунли ўтказиши учун шароит яратиш каби таклифлар илгани сурилди.
Бундан ташқари, IT соҳасини ривожлантириш мақсадида малакали мутахассисларни жалб қилиш, Ўзбекистондаги IT парклари билан ҳамкорлик ўрнатиш ва янги стартап лойиҳаларини амалга ошириш таклифлари билдирилди. Бу таклифлар ёшларнинг IT соҳасига қизиқишини кучайтиришга хизмат қилиши таъкидланди.
Шунингдек, тадбир давомида масъуллар ёшлар томонидан билдирилган ҳар бир масала ва таклифни ўрганилиб, уларни амалиётга жорий этиш учун зарур чоралар кўрилишини маълум қилишди. Мазкур лойиҳа ва ташаббусларнинг амалга оширилиши тумандаги ижтимоий-иқтисодий ривожланишга катта ҳисса қўшиши алоҳида қайд қилинди. Қолаверса, муносиб таклифлар билан чиққан ёшлар рағбатлантирилиб, қўллаб-қувватланиши таъкидланди.
Бундан ташқари, шу куни тадбир доирасида туман Камбағалликни қисқартириш ва бандлик бўлими томонидан бўш иш ўринлари меҳнат ярмаркаси ҳам ташкил этилди. Меҳнат ярмаркасида ёшлар турли соҳа ва касблардаги бўш иш ўринлари билан танишиш имкониятига эга бўлишди. Шунингдек, туман Адлия бўлими ёшларнинг ҳуқуқий масалаларини ўрганиш ва уларга ҳуқуқий маслаҳатлар бериш мақсадида учрашув ўтказди.
Шубҳасиз, бу каби мулоқотлар келгусида ёшларнинг ижтимоий ва иқтисодий фаоллигини янада оширишга хизмат қилади.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
