Nurli manzillarga intilgan yigit

Goʻdakning dunyoga kelishi, ilk qadami, ilk soʻzi yaqinlari uchun qanchalik quvonarli boʻlsa, hayoti davomidagi intilishlari, ezgu ishlarga qoʻygan ilk qadami, ilk muvaffaqiyatlari ham shunchalik qimmatlidir.

Mangʻit shahrining "Chordara” mahallasida istiqomat qiluvchi xalq taʼlimi faxriysi Gulchehra opa Saidova va Fayzulla aka Davlatovlar ikki nafar oʻgʻil farzandlarini moʻmin-qobil, mehnatsevar, ilmga, yangilikka intiluvchan qilib tarbiyalashga harakat qilishdi. Ezgu umidlari esa izsiz ketmadi. Ayniqsa kichkinasi, joriy yilda Mangʻit Iqtisodiyot kollejini soliq va soliqqa tortish yoʻnalishi boʻyicha imtiyozli diplom bilan tugatgan Abrorning erishayotgan yutuqlari ularni cheksiz quvonchga belamoqda.

Abror mamlakatimizda yoshlarning ilm olishi, oʻz intellektual salohiyatini namoyon etishi uchun yaratilgan imkoniyatlardan unumli  foydalanishga harakat qiluvchi yoshlarning biri. U 36-sonli maktabda ham barcha fanlardan aʼlo baholarga oʻqidi. Fan olimpiadalarida tuman gʻolibi boʻldi. Boʻsh vaqtlarida dars mashgʻulotlarida olgan bilimlarini mustahkamlash uchun tinmay oʻqidi, 1-Bolalar va oʻsmirlar sport maktabining boks toʻgaragining faol aʼzosi boʻldi.

Boks bilan shugʻullanganligi uning ilm olishi yoʻlidagi intilishlariga keng yoʻl ochdi. Boisi, sport oʻsmirlarni maʼnan va jismonan chiniqtiradi, mashqlar davomidagi tinimsiz harakatlar irodasini mustahkamlab, hech bir muvaffaqiyat oʻz-oʻzidan kelmasligini anglatib, olgʻa intilish koʻnikmasini shakllantiradi.

Bularni Abror Davlatov oʻquvchilik davrida ilk bora sport maktabi, tuman miqyosida oʻtkazilgan musobaqalarda oʻz vazn toifasida gʻolib boʻlgan damlarida chuqur anglab yetdi. Shuning uchunmi, kollejda oʻqish jarayonida ham boks bilan shugʻulanishni, chiniqishga intilishni kanda qilmadi. U taʼlim olgan soliq va soliqqa tortish guruhi rahbari Zulfiya Xidirboyeva guruhdagi barcha oʻquvchilarga ham eʼtiborli boʻlsa-da, alohida qobiliyati yaqqol sezilib turgan Abror bilan jiddiy shugʻullandi. Nafaqat ilm olishda, balki jamoat ishlarida ham faol, intiluvchan, guruhdoshlari, kollejning barcha oʻquvchilari bilan doʻst, hamfikr boʻlgan yigit 2-bosqichdan boshlab kollejning "Kamolot” boshlangʻich tashkiloti yetakchisi boʻldi.

- Mustaqillik yillarida yoshlarning komil insonlar boʻlib voyaga yetishlari uchun mamlakatimizda yaratilayotgan sharoitlar, imkoniyatlar oʻzining quvonarli natijalarini berayotir. Men rahbarlik qilgan guruhni 30 nafar yoshlar bitirib chiqqan boʻlsa, shularning deyarli barchasi oʻz sohasini mukammal egallashdi. Abror va yana bir oʻquvchimiz uch yil davomida barcha fanlardan aʼlo baholarga oʻqib, kollejni imtiyozli diplom bilan tugatishdi, - deydi Zulfiya Xidirboyeva faxr bilan.

Ha, intilishda hikmat koʻp. Buni Abror oʻzining kollejda oʻqishi jarayonida juda chuqur his etdi. U 2014-yilda "Yurt kelajagi” koʻrik tanlovining "Tadbirkorlikni rivojlantirish boʻyicha loyihalar” yoʻnalishida qatnashib, tuman bosqichi gʻolibi, Qoraqalpogʻiston Respublikasi bosqichida esa uchinchi oʻrinni egallab, yakunlovchi – mamlakat bosqichida qatnashishga muvaffaq boʻldi va diplom, maxsus sertifikat olishga erishdi. Xuddi shu yil oʻrta maxsus, kasb-hunar taʼlimi oʻquvchilari oʻrtasida tadbirkorlikni rivojlantirish maqsadida oʻtkazilgan "Mening biznes gʻoyam” tanlovining tuman bosqichi gʻolibi boʻlib, Qoraqalpogʻiston bosqichida ham maxsus sertifikatni qoʻlga kiritdi.

Shuningdek, 2015-yil 12-fevral kuni Nukus shahrida Toshkent Davlat Iqtisodiyot Universiteti tomonidan oʻtkazilgan "Eng yaxshi biznes gʻoya” koʻrik-tanlovining maxsus sertifikatini ham yengib olishga muvaffaq boʻldi.

Abror Davlatov barcha muvaffaqiyatlari sirini oʻqib-oʻrganishda, olgʻa intilishda, deb hisoblaydi va ilm olishni davom ettirishni oʻz oldiga maqsad qilib qoʻygan. Shu niyatda joriy yilda Nukus Davlat Universitetining huquqshunoslik fakultetiga hujjat topshirdi. Niyati esa yurt koriga yaraydigan farzand boʻlish.

Yurt koriga yarash! Hunari, ilmi, halol mehnati bilan ana shunday ulugʻ xizmatga bel bogʻlagan olovqalb yoshlar bilan suhbatlashishdan odamning koʻngli togʻday koʻtariladi. Boisi – ular ertangi kunimiz, Vatanimizning kelajagi.

- Men koʻpgina xorijiy davlat-lardagi yoshlarga yaratilayotgan imkoniyatlar bilan qiziqdim. Oʻqib koʻrib angladimki, hech qaysi yurtda bizning mamlakatimizdagichalik yoshlarga gʻamxoʻrlik yoʻq. Toʻgʻri, ularning ilmda, izlanishda iqtidorli yoshlari bor. Biroq, ular davlatining emas, ota-onasining mablagʻi evaziga oʻqib-oʻrganib, kamolga kelishadi. Yurtimizdagi tengdoshlarim, barcha yoshlar davlatimizning gʻamxoʻrligini qadrlashini, unumli foydalanishini tilar edim, - deydi Abror kuyunchaklik bilan.

Abror Davlatov bilan suhbatlashgan kishi uning oʻz kelajagi sari dadil qadamlar qoʻyayotganligini yaqqol anglaydi, beixtiyor qaniydi, hamma yoshlarimiz ham unga oʻxshasa, deya havas qiladi, Abrorning oʻz kelajagi sari qoʻyayotgan dadil qadamlari uni nurli manzillarga yetkazishiga ishonadi.

Oygul RAJABOVA.