ЭЛ-ЮРТ ХИЗМАТИ ЙЎЛИДА КАМАРБАСТАМИЗ
Ўзбекистон Республикаси Мустақиллигининг 24 йиллиги нишонланган жорий йилда барча фуқароларнинг ўзини ўзи бошқариш органлари қатори мен раҳбарлик қилаётган "Янгиобод” маҳалла фуқаролар йиғинида ҳам ижтимоий-маънавий муҳит барқарорлигини таъминлаш, ҳудудни ободонлаштириш, санитария ҳолатини яхшилаш ва шунга ўхшаш аҳоли фаровонлигини яхшилашга хизмат қиладиган бир қанча ишларни амалга оширишга алоҳида эътибор берилди. Бунда албатта, биз маҳалла фаолларининг ёрдамларига, жамоат ташкилотларининг кўмакларига таянамиз.
Натижада эса маҳалла хонадонларидаги мавжуд ҳолатлар ўрганиб чиқилди ва оилаларда соғлом муҳитни шакллантириш, репродуктив саломатликни мустаҳкамлаш ва баркамол авлодни вояга етказиш ишларига кенг жамоатчиликни жалб қилиш юзасидан аҳоли ўртасида кенг миқёсда тушунтириш ишларини олиб боришга эришилди.
Мен кейинги сайловда 4-"Дўстлик” сайлов округидан халқ депутатлари туман Кенгаши депутатлигига сайланганман. Асосий ишим – "Янгиобод” МФЙ раиси вазифаси билан биргаликда албатта, депутатлик фаолиятимни ҳам бекам-у кўст бажаришга ҳаракат қилаяпман. Шу мақсадда "Дўстлик” маҳалла фуқаролар йиғини биносида ташкил этилган депутатлик хонасида Кенгаш томонидан тасдиқланган фуқароларни қабул қилиш куни ва сайловчилар билан учрашувлар ўтказиш жадвалига мувофиқ ҳар ойнинг охирги шанба куни фуқароларни қабул қилиш билан биргаликда ҳар чорак якуни бўйича сайловчиларим билан учрашиб, уларга мамлакатимиз сиёсий ҳаётидаги ўзгаришлар, туман Кенгаши ва ҳокимлиги томонидан амалга оширилаётган ишлар ҳақидаги маълумотларни етказиб тураман.
Мен тадбиркорлар ва ишбилармонлар ҳаракати – Ўзбекистон Либерал Демократик партиясининг депутатлик гуруҳи раҳбари ҳамда халқ депутатлари туман Кенгашининг Маҳаллий бюджетни шакллантириш ва уни ижро этиш, иқтисодий ислоҳотларни амалга ошириш ҳамда тадбиркорликни ривожлантириш масалалари бўйича доимий комиссияси раиси сифатида ҳам бир қанча ишларни амалга ошириб келмоқдаман. Жорий йилнинг ўтган даври мобайнида доимий комиссия томонидан 9 та йиғилиш ўтказилди.
Жумладан, 2015 йилнинг 27 март куни доимий комиссия аъзолари "Хитой” овул фуқаролар йиғинидаги "маслаҳат маркази” томонидан олиб борилаётган ишларни, 12 июнда эса "Куюк кўпир” овул фуқаролар йиғинида янги иш ўринларини яратиш, аҳолининг, айниқса хотин-қизларнинг бандлигини таъминлаш бўйича олиб борилаётган ишларни ўрганиб чиқдик.
"Янгиобод” маҳалла фуқаролар йиғини ҳудудидаги Амударё қишлоқ хўжалик касб-ҳунар коллежи биносида 13 март ва 5 июнь кунлари "Репродуктив саломатлик, оналик ва болаликни муҳофаза этиш ҳамда ҳудудларда санитария ҳолатини яхшилашнинг долзарб масалалари” мавзусида йиғилишлар ўтказилди.
Шунингдек, август ойидаги йиғилишда "Ўзбекистон Республикаси Вазирлар Маҳкамасининг 2013 йил 15 февралдаги "Кам таъминланган оилаларга ижтимоий нафақалар ва моддий ёрдам тайинлаш ва тўлаш тартиби тўғрисидаги Низомни тасдиқлаш ҳақида”ги қарори талаблари асосида "Қиличбой” ОФЙда олиб борилаётган ишлар тўғрисида”ги масала кўриб чиқилди.
Мен ўз депутатлик фаолиятимни янада яхшилаш мақсадида сайловчиларим билан тез-тез учрашишга, улар билан ўтказилган суҳбатлар чоғида бизга ишонган юртдошларимизнинг хоҳиш-истакларини ўрганишга, уларга имкони борича кўпроқ ёрдам кўрсатишга ҳаракат қиламан.
Чунки, биз депутатлар ўз сайловчиларимиз қалбига йўл топиб, уларнинг ишончини қозонсаккина депутат деган шарафли номни оқлаган бўламиз.
Мадамин КАЗАКОВ, халқ депутатлари туман Кенгаши депутати, туман Кенгашининг Маҳаллий бюджетни шакллантириш ва уни ижро этиш, иқтисодий ислоҳотларни амалга ошириш ҳамда тадбиркорликни ривожлантириш масалалари бўйича доимий
комиссияси раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
